2
1 Mangso da" gyeung" shang: bouggung Ziun tho' moo
gyi: poin" da" laboo" ri moid kaid loo ge'.
Yuda byumyu" yi we' nain nyid ge'.-
Aseing da" bidnyid gi jhang loo bye:.
2 Hau: bidnyid gi moug: doeb lho:
no, seing" kyid: ziyo' moug: coid lo wigi jhoemmoug" nheung: da" bidnyid nghoid.
Boem tho' moo moug: coid nghoeb lo yhang: ti"-
jhenkhyeug phung: moo" zeing dang: ju" loo bye:-
houg: te" zigi khanham we' abue" yu" shi"-
he: thang: nab we' khanham we' doem bue" loo wa zi anghoid.
3 Nyangnu" gi myi: yo' dakhyoo" ti"-
shivoo: shiloem joem dangain" ri zo: pyam boem ago".
Nyangnu" da" shidkhoin" moo- hau: mougmyid gi Eden khyam: yo' du da:.
Nghoid loug we' nyangnu" da" nungthang moo gi
kyug byug da" dain" pyoid yoo ti" bue" byug wa.
Nyangnu" mo ci" we' aloid nghoid da:.
4 Nyangnu" gi myang: joem yhang: ti" nghoid boem wigi
gyi khaid da" myang: joem yhang: ti" tang" lo" ago".
5 Boem tho' moo nyangnu" tang" ju" lo" ri
gyi myang: rheing" yhang: ti" myeung ago".
Myo, yoo moo myi: nge" yhang: ti" pyug pyug ga: myeung nyid.
Nyangnu" gi gyi khaid wa jen" nyid da"
gyidab moo" daloem: yhang: ti" jen so" lo" ago".
6 Nyangnu" ju" lo" nyid lang" gi yugkhang" moo" gyoug boem ago".
Myonhoo: khang" mo" gi shoem" shid: yid bue" lo" byug boem abye: go".
7 Nyangnu" gi gyi sarhi' joem yo' dakhyoo" ti"- khaid zain: lo" ago"-
vang joem moo we' gyizoo: yi yo' dakhyoo" ti"- do, yhe: lo" ago".
Nyangnu" dangain" bang: gi shid khyoo: dain: dain: za: do, yhe: lo" boem wigi
khyoo: thung avang nghoid boem ago".
8 Nyang: cang" nyang: khyoo: ri we' alhoid soo" nghoid ago".
Nyangnu" gi kyam to" jang" khyo" phung: goin" goin" cang vang yhe: lho:
nyangnu" rigi ce" ze we' ayo" toem' too" nghoid ago".
9 Nyangnu" gi voomoo" joem khyoo: khaid vang yhe: lho:
vang khyam: joem ri rhue, vang yhe: lo" ago".
Yhoem: joem da" atho' khyoo: do, lo" wigi khoug" mo, yo' dakhyoo" ti"-
bang: zo: khoem" khyo" vang yhe: lo" ago".
10 Nyangnu" jhen" yhe: lo" ri myid leig leug lo lho:
mougkhung: we' nain" nyid bid yo' lhammoo" we' coid shoem: lo" wigi
kyi: joem we' ayo" bang boem loo.
11 Aseing gi nya: gyidab moo" ri moug: goin da" thui: yhang: ti"- amyeing" byid: da:.
Nyang: ri tam" gyo: cang yhe: da" gyiphung: yigi gye" myo: lho:
yoem: so' gyi: ago". Aseing da" bidnyid gi khayhi' gyeing" gyoug dain pho" zi nghoid lha".
Hougmoo: ashid: loo: hang" se' yo" nyid deing wa lha".
12 Aseing tid zigi ?Akhid" nghoid loug we' nheigloem: gyeing" thid lho:
zoo: shug jang" pyam wigi ngoug byid gyo" lho:
koug ngau ziyo' nga" jhang khyoo: doem tau" loo we'.
13 Nanu" da" kougshu: khyoo: ri nheigloem: gyau: khyo" toin" shed we'.
Nanu" da" byimi lang: ceug zi za: we' atham: shi"? ga: tid.
Nanu" da" Mangsoo Aseing jhang khyoo: doem tau" loo we'.
Nyang: gi myid ge wigi nheig khyeug shoomyen: da" nheigloem: yo' byeung" su: nghoid nyid.
Nyang: gi nheigloem: sheing: ziyo' nya: dangsoo" zung" su: nghoid wigi
nyang: gi yooboo dam abyid: loo: za: yooboo khyoid pyam byid: wa shid re"
khanham we' jen" nyid su" nghoid.
14 Nanu" da" Aseing Mangsoo gi nheigloem: thid lo lho:
nanu" ri shivoo: shiloem myoo" sho' mainkaid byid: loo abe.
Houg: lang" gi nanu" nyang: ri shivoo: yo'
zabyid yhid: xoin" yo" to ngei" byid: wa zi nghoid.
15 Ziun boem tho' mo laboo" ri moid kaid ge'.
zoo: noem jang" wa amyeing" byid: lho:
byu phung: foem: wa zi khe: kaid we'.
16 Mung" byu yiri dajo, yoo moo za: zhung: jo, nhang: ge'.
Gyeung" shang: phung: foem: wa shid re" nyangnu" ri nyheing too" ge'.
Mang: zoo: yi zooshang: mi" yo' nu" nain" yiri khe: zheung" too" we'.
Aseig shi" lo, xo' too" bang: lang" nyangnu" yhoem: mo thu lo lho: ri" ca" boem da:.
17 Xoin" ngei" wa phoin: yo' Noku Yhoem: Moo" khyoo: vang lo" da"
khoem" duang: agyoo: moo Aseing ri xoin" ngei" byid: nyid da" khainjung yigi
?Aseing we" re" da" byumyu" yiri nheig khyeug yu shi" we'
gootu: byumyu" yi wigi nanu" da" Mangsoo gi khayoo: nyid lha" ga: ngoonu" ri aphoug" akhyoid koid lho:
ajuang" yi pyam nhang:? ga: wigi koug ngau lho:
akyu" mho' boem ca" wa nghoid.
18 Houg: lang" Mangsoo gi nya: mougmyid ri yu" ci' wigi
nya: byumyu" yiri nheig doem khyeug wa zi nghoid.
19 Aseing gi nya: mung" byu yiri hidsu" ga: phoug tu"-
?Akhid" ngoo gi nanu" ri shivoo:-
zabyid yhid: yo'
zhainloin: xu: byid: wigi nanu" gi nheugdeug loo goo" wa.
Tungbau byumyu" yigi nanu" ri aphoug" akhyoid ayo" koid loo goo" wa.
20 Moug: zhung: shoid khyo" gyoo" lo da" jhenkhyeug gyiphung: rigi
nanu" mo ve: gang: loo" nhang: wa zi nghoid.
Nyangnu" ri kyug kyi" ri da" dain" pyoid yoo khyoo: khaid thu pyam wa zi nghoid.
Nyangnu" da" shid vhu" she: da" phung: rigi xoo" thoem" khyoo:-
hau: thang: mo daphung: rigi Meing: gung panglai: khoug: khyoo: khaid thu pyam wa.
Nyangnu" da" mang joem gi gye" boeb nam nyid wa nghoid.
Nanu" ri koid byid: da" moo" zoo" yoomo ngoo gi nyangnu" ri phyo' shoin' pyam wa.
21 Yoothung" joem we"- agyug loo" goo"-
Aseing gi nanu" shid mo koid byid: bye: yoomo ngei bu: gau yi nyid loo: boem we'.
22 Gougnyhoug joem we"- agyug loo: goo"-
coung" yoo shoem" shoem" nyoug jo, bye:-
seiggam' joem we' nya: ashi" ri zei: jo, bye:-
lafoem gam yo' zabyid joem we' myoo" sho' jo, jo, bye:.
23 Ziun mung" byu yi we"- gau yi nyid loo: ge'.
Nanu" shid re" nanu" da" Mangsoo koid byid: bye: da" khyoo: yoomo ngei bu nyid ge'.
Nyang: gi nanu" ri lid jhen" moug: myoo" sho' voo byid: da:-
nyang: gi shid phyang" yo' dakhyoo" ti"- xung" moug: yo'
zain vang khoem" mo moug: ri voo byid: nyid.
24 Gug nang: jang: moo gi shivoo byeung" jo, wa zabyid shi" yo'
zhainloin: shi" pyeig jang: anam mo, duang: joem moo: we'
zabyid yhid: yo' zhainloin: xu:-
byeung" shoin: yau, loo" wa nghoid.
25 Jhenkhyeug phung: joem wigi
nanu" da" shivoo: zoo: joem ri zo: pyam byid: da" zain nyid khoug: moo
nanu" mo byug yoin" lo" gu: ri ngoo doem tau" byid: wa nghoid.
Nanu" ri thougtheung gyi zain: da" he" gyiphung: ri nanu" jhang khyoo: nhang: kaid su: gi ngoo nghoid.
26 Akhid" gi nanu" moo agoin agoo" shoug" zo: lho: nheugshid: loo goo" wa.
Nanu" shid re" mau" pho" moo" ri koid da" nanu" da" Aseing Mangsoo ri
nanu" gi coung" byid: lo boem wa nghoid.
Nga" byumyu" yigi aphoug" akhyoid koid zi khanham we' adoem shau" loo wa.
27 Houg: lang" Israela bi" we"- ngoo gi nanu" da"
mo, phung: gung moo nyid jo, ziri ngoo Aseing gi
nanu" da" Mangsoo nghoid wigi nga" tho' mo lid lho:
gootu: anyid lo: khyoo: ri nanu" yo" se' lo: boem wa zi nghoid.
Nga" byumyu" yigi aphoug" akhyoid koid zi khanham we' adoem shau" loo wa.
28 Hau: thang: ri ngoo gi yugkhang" mo" da" atho' moo:
nga" Venyi: foid shoin" byid: loo wa nanu" da" myiyi: zoo:- yug gi zoo: yigi
nga" mungdang: tid fu" lo" boem wa nghoid-
nanu" da" mang: zoo: yi we' yhoebmo, myang lo boem wigi
nanu" da" zoolu: yi we' yoeb myang myang lo boem wa.
29 Hau: da" bidnyid moo dei zoo: myhi' dei zoo: phoo yi da" atho' moo lang"
nga" Venyi: foid shoin" byid: wa nghoid.
30 Hau: bidnyid khyoo: ri mougkhung: tho' moo we'
myidjang tho' moo: we' ngoo tid poin" byid: loo wa nghoid.
Houg: moo suid" shoin: wa myi: ngi" wa myikhoug" jhoemmoug" jo, jo, wa.
31 Aseing da" gye" gyoug dain pho" bidnyid aju" loo shi" uri
bid moo" gi teing: no, lo" byug wigi
lhammoo" we' suid" su" ne lo" byug wa nghoid.
32 Nghoid loug we' Aseing jang" mo
pang" thoug khyoo: mho' yu mo, dangain" bang: koem' gi
khyoid yu zi shau" boem wa nghoid? ga: tid to".
Yerusalem voomoo" mo mo, dayham" gi loid byoin loo" goo" wa.
Houg: bang: gi ngoo khyen: yu too" bang: nghoid wigi
ashid: loo: nyid deung jo, boem wa? ga: Aseing tid nyid.