YOELA
MOUGSOUG" PUG
(Joel)
He lapi: Yoela ga: su: khyoo: ri myoo: sho' ayo" si' nghoid da:. Nyang: kangso' dei nyid lid lo zi we' kha: yo, nghoid ein: goolho' ayo" se' nghoid da:. Nghoid loug we' he: da" mougsoug" gi Persi khosen yi da" ayo, 500-400 BC gyoo: moo lhid" too" nhoo: du da:.
Yoela gi Palestina mung" moo jhenkhyeug joem ju" ziyo' moug: phang" lo" wigi zooyoid phang" khoug ju" loo wa da" khyoo: ri tid to". Hid su" wim lo da" khyoo: ri yu" lho: Aseing nyang: gi nya: deingmain" khyo" myid vho: khyoo: ri ngeug pyam mo, da" atho' moo yooboo dam byid: wa Aseing da" bidnyid gi ju" loo bye: asoo" joem nghoid ga: shau" myang byid: da:.
Aseing gi nya: byumyu" yiri ?Nheigloem: thid lo boem wa ziyo' nya: byumyu" yiri doem khyoid yu wigi mainkaid jeju" byid: loo wa ga: da" dangsoo" byid: khe: yoid nyid ziri lapi: phoo tid kyo". Xoem" too" ge da" khyoo: dakhaid gi Mangsoo gi nya: Venyi: ri yuggi myiyi: mang: zoo:- zooshang: dangain" bang: da" atho' moo foid shoin" byid: wa? ga: da" khyoo: nghoid.
1
He: zigi Pethuela da" yuggi zoo: Yoela ri Aseing byid: kaid da" lu dang: nghoid.
Phoug" mang: zookho' yi we"- tam" gyo: yu" ge'.
Yuda mung" byu yi yugkhang" moo" we"- gyo: yu" ge'. Nanu" da" apyaid moo nghoid loug-
nanu" da" phoug" phyid" yi da" apyaid moo nghoid loug we'
hid: te" zi khanham we" lhung bue" yu" go" lha".
He: khyoo: nanu" da" zooshang: yiri tid shid we'.
Nyangnu" gi nyangnu" da" zooshang: yiri tid kyo" boem wa nghoid.
Houg: bang: we' thang: xeig moo bang: ri doem tid kyo" yhe: lo" boem wa nghoid.
Jhenkhyeug joem gi daphung: thang: moo daphung:
xo' lho: shivoo: gam joem moo foem: to" ago".
Daphung: wigi zo: teung to" ziri daphung: wigi zo: pyam byid: ago".
Yhid: ya: yi we"- so" re" boem lho: ngoug ge'.
zabyid yhid: shug mo, we" yoid ngau nyid ge'.
Zabyid yhid: aseig ri koid yu wa da" zabyid shi" joem gi
phyo' shoin: pyam zi shoug" bye:.
 
Jhenkhyeug gyi daphung: gi ngoonu" da" mougmyid ri lo zain: yu boem bye:-
houg: bang: gi yoem: bo lho: atho' nghab, loo: sho' myo: ago".
Nyangnu" da" zei joem gi khangkhyi zei yhang: ti" tho' ago".
Nyangnu" gi ngoonu" da" zabyid nei joem ri phyo' shoin pyam boem lho
ngoonu" da" lafoem gam joem ri zo: pyam byid: boem ago".
Seig ko' phyu: loo" sho' seig kug ri khyoid pyam byid: ago".
 
Byumyu" yi we"- myiyi: nu" gi
nyang: lo, xo' yu wa da" yuggi nu" shid: wigi ngau yhang: ti" ngau nyid we'.
Noku Yhoem: Moo" khoug: moo: xoin" to' wa shid mo gug zoo: we' ayoo"-
zabyid yhid: we' ayoo"- Aseing ri ngei" byid: wa xoin" ci" we' ayo" boem yoomo
khainjung yigi koug ngau nyid boem ago".
10 Yoothung" joem gi myid keing: doem nghoid jo, boem bye:-
gug yoo joem gi phyo' shoin, pyam zi shau" boem wigi mougmyid gi koug ngau nyid bye:.
Zabyid nei joem we' kyoug shid: byoug wigi
zhainloin: gam joem we' kyoug shoem: loo" bye:.
 
11 Yoo thung" zei mo, we"- koug ngau nyid ge'.
Zabyid khyam: ri yu" coung: nyid mo, we"- ngau nyid loo: we'.
Khasu" wim ga: ri sungsoo: yo' yoono,-
shivoo: shiloem dangain"- byo, yoin" lo" zi shoug" bye:.
12 Zabyid nei joem yo' lafoem gam joem we' yhau" loo" bye:.
Shigam joem dangain" gi yhau" shid: lo" abye: go".
Byu yi da" gau yi ngei pyo: khyoo: ein: zigi bei: lo" byug bye:.
13 Phoin: tho' moo: xoin" ngei" byid: nyid da" Khainjung yi we"-
jid: moo" byimi void lho: ngau nyid ge'.
Noku Yhoem: Moo" khyoo: yhe: lho: damyen goin" koug ngau nyid we'.
Nanu" da" Mangsoo ri xoin" to' byid: wa da"
gug zoo: yo' zabyid yhid: ayoo" loo.
14 Zoo: shug jang" pyam wa shid re" amyeing" khyoo' byid: ge'.
phung: foem: wa shid mo khe: zheing" we'.
Nanu" da" Aseing Mangso da" Noku Yhoem: Moo" khoug: khyoo:-
Yuda byumyu" yi dangain" bang: yo'
vhu" shi: bang: ri khe: zheung" kaid lho: nyang: ri mho' yoid we'.
15 Yoem: so' gyi: thang su: wigi
phyo' shoin' pyam wa Aseing da" bidnyid gi ju" lo nyid bye:-
hau: bidnyid moo gye" gyoug dain ja: bue" loo wa.
16 Ngoonu" da" shivoo: joem ri phyo' shoin' pyam zi shoug" nyid da" uri
ngoonu" gi hougsu" za: coem' yu" kaid boem bye:.
Ngoonu" da" Mangso Noku Yhoem: Moo" moo ngei pyo: khyoo: ci" we' ajo, loo.
17 Shivoo: myoug: shi" joem gi myid kyug foo: moo kyug shid: loo" bye:-
hougmoo: be" too" wa da" gug ajo, loo-
gug jhi: akoem joem we' yoem: gyo" loo" bye:.
18 Nu: kyung gi seing" kho" myeung nyid boem-
khasu" wim gari nyangnu" shid mo coung" yoo ajo, loo-
yang phung: joem we' yau: khe" zi shoug" nyid abye: go".
19 Aseing we"- ngoo gi nang ri yoid mho' nyid
khasu" wim gari coung" yoo yo' seiggam joem gi
myi: nge" pyam ziyo' dakhyoo" ti"- kyug shid: lo" abye: go".
20 Gougnyhoug lam" joem lang" nang ri nyho: yoid nyid ago"-
Khasu" wim gari gyid gyung: nu" joem we' kyoug kain" byug bye:.