YONA
MOUGSOUG" PUG
(Jonah)
Yona lhid" pug gi Jhoem: mougsoug" moo gootu: lapi: joem da" lhid" pug yo' adu goo". Hau: tho' agoo" Mangsoo mungdang: ri atam" gyoo: loo: za: phang: wa yoem: kaid nyid da" byu dayug khyoo: ri lhid" to" da" mhoomyid: sungsoin: daloem: nghoid. Mangsoo gi nyang: ri Israela byumyu" yi da" gyi: thang gyivoo yi nghoid da" Asuri yi da" voo moo" zeing khyoo: yhi: nhang: da:. Nghoid loug we' Yona gi hau" voo moo Mangso mungdang: ri anau yhe: tid nghoid da:. Khasu" wim gari Mangsoo nyang: myid phyed to" da" moo" zoo" hau: voomoo" ri yooboo dam byid: wa khyoo: acang pyeing wa ziri Yona nyang: si' yoomo nghoid. Nghoid loug we' mhoomyid: da" athang: moo ade noug yang: yang: tam" gyoo: bye:. Hau: lho: thang" thang moo gi byo, yoin" loo" wa ga: da" nya: dang: gi azung" loo.
He: lhid" pug moo Mangsoo gi nyang: phain" so: to" da" jo, moo jo, dangain" ri khanham we' daseing: ci: nyid da" khyoo: ri lhid" to". Nghoid loug we' atho' moo tid gyo" lo da" khyoo: dangain" gi Mangso jheddab ziyo' nheig khyeug khyoo: nya: gyivoo yiri lang" byo, yoin" loo" wa da" yooboo dam abyid: loo: za: lhoid pyoin' kaid khyoo: ri lhid" to".
1
Danyid" ri Amitai da" nya: zoo: Yona jang" moo Aseing mungdang: ju" re". Nyang: tid zigi ?Gyi: sheung: da" Nineve voomoo" khyoo: yhe: lho houg: bang: khayhi' akhyeing" ashoeb da" khyoo: ri ngoo si' bye: khyoo: ri yhe: tid kyoo" we'? ga: tid. Nghoid loug we' Yona gi Aseing nhang: khyoo: ayhi: loo: za: nya: jang" mo phang: byug da:. Nyang: gi Yopa khyoo: yhe: lo". Houg: mo gukhuang" moo Spain khyoo: gu: loo" wa gyid sangphoo ri yhe: myang. Nyang: gi gukhoo' ri kaid lho: Aseing yo' vi: wa bye: ga: Sangphoo moo" voin mo, yo' dage" Spain khyoo: yhe: loo" wa shid re" sangphoo moo vang lo". Nghoid loug we' Aseing gi panglai: tho' moo uglid zeing ri nhang: kaid. Houg: yoomo hau: sangphoo gi alug lug gyoeb moin" loo" sho' panglai: gyid thoem" tho' moo gye" gyoug pho" da" uglid moo" hau' vang loo bye:. Houg: yoomo sangphoo moo" voin mo, gi gyoug dain wigi pang" thoug yu wa shid re" yugkhang" moo" nyang: nya: da" yu phara" ri yoid nyho: nyid. Hau: thang: ri gye" gyoug ca" loo yoomo ziyoo joem ri we' sangphoo tho' moo de" khyo' pyam ago". Hau: uri Yona gi sangphoo akhau: yab moo yhe: vang yhoeb pyo: nyid.
Sangphoo khang" su: gi nyang: ri houg: moo yhe: myang lho: tid zigi ?Nang khasu" wigi yhoeb pyo: nyid lha". Too' we' pang" thoug yu zi shoug" wa shid re" re" yu phara" ri mho' we' nyang: gi nyhang" ri nheig khyeug lho: yha" kangso' ri to' lhoid pyoin kaid shi" abe? ga: tid.
Sangphoo moo" voin mo nyang: cang" nyang: tid go" nyid zigi ?Hang" yooboo yoomo nyhang" hidsu" bue" lo" la' si' wa shid re" me" lab yu" shang? ga: tid ago". Hau: me" gi Yona moo eung: lo" da:. Houg: yoomo nyangnu" Yona ri tid zigi ?Ce: yooboo mo he: khyoo: bue" lo lha". Nang cire" koid nyid. Nang kha: moug: bang: nghoid- ce: noem byumyu" nghoid. Akhid" ngoonu" ri tid kyoo" we'? ga: zheung: myid: nyid.
Yona gi ?Ngoo gi Hebre" byumyu" nghoid. Ngoo gi mougkhung: myidjang yo' panglai: ri phain" so: su: moug: di tho' mo Aseing Mangsoo ri no' ku" su: nghoid. 10 Nyang: gi ?Hau: Aseing jang" mo phang: su: nghoid? ga: tid.
Houg: yoomo sangphoo moo" zei: bang: gi gyoug dain ziyo' nyang: ri hougsu" koid zigi ?Gyug pho" moo" danghoid? ga: tid ago". 11 Uglid moo" gi je" je thain: lo nyid yoomo sangphoo moo" voin mo, gi nyang: ri ?He: da" uglid tam" loo" wa shid re" ngoonu" nang ri khasu" koid wa? ga: myid: boem.
12 Yona gi ?Ngoo ri panglai: khyoo: dang: khyo' pyam we'. Houg: lang" he: uglid noem: loo" wa. He: gyoug pho" uglid gi nga" yooboo yoomo bue" nyid zi ngoo si' bye:? ga: phug tid.
13 Nghoid loug we' sangphoo khang" bang: gi tunggung khyoo: ju" sho' ga: gye" yoem: kaid lho: gu: lo" boem ri we' panglai: gi je" dadoin: lhoin" lo nyid lho: nyangnu" nooyoo amyang nghoid da:. 14 Houg: yoomo nyangnu" gi Aseing ri ?O" Aseing we" he: yug kangso' yoomo ngoonu" ri shid: wa yooboo dam ajen" byid:-Aseing we" nang koem' gi nanyang: Koid eung: ziyo' dakhyoo" ti" koid abye:? ga: mho' yoid boem. 15 Hau: thang: ri nyangnu" gi ?Yona ri dang lho: panglai: moo du" zei kaid boem. Houg: lang" panglai: being: mhoid joem we' tam" loo" khari" bye:. 16 Hougsu" nghoid yoomo sangphoo moo" voin mo, gi Aseing ri atho' tid sho' gyoug phau" boem wigi Aseing ri xoin" to' byid: lho: nya: moo" ri kyeing" voin nyid wa ga: dangsoo" byid: boem.
17 Mangsoo amyeing" byid: yoomo wimdo, zeing gi: Yona ri myhau: pyam bye:. Yona we' wimdo, moo" zeing voem: doug: khoug: moo soem" nyid" soem" myen loung" jo da:.