5
Hau: bidnyid moo Debora yo' Abinoam da" yuggi zoo: Barag gi he: jikhoin" ri khoin" da:.
 
Aseing ri coung" ge'
Israela byu yigi gyi koid wa myid phyed wigi
byumyu" yi ngei bu: tung" za: nyang: nya: myid khyo" bo boem ago".
Khokham yi nanu" we"- tam" gyoo: ge'.
Vhoeb khang" bang: nanu" we"- nyeing" za: tam" gyoo: ge'
Ngoo gi Israela da" Aseing Mangsoo ri
music thui: yo' coung" nghei wa.
Aseing we"- Seira boem mo nang gyo" lo lho:
Edom mung" mo nang thu' lo da" uri
Myid gung gi nain" re" lho: mougkhung: mo moug: vo: gyoo" lo da:.
Nghoid bye:- jhoemmoug" mo moug: vo gyo" lo da:.
Israela byu yi da" Aseing Mangsoo shidkhoin"
Sina boem mo Aseing shidkhoin" mo boem joem dei loeb ago".
 
Anad da" yuggi zoo: Shamga da" pyaid moo yo'
Yaela da" pyaid moo
Phaga: byu yi hau: mung" khyoo: aso" lid loo goo" nghoid da
Gyung soo" bang: we' khyoo: kyang khyo" za: daso" ago".
Israela voogung joem gi jham" dung" khi" nghoid nyid da:. Debora we"
Nang ju" ri" sho' hau: joem gi akoem: nghoid nyid ago".
Debora gi Israela byu yi shid re" nya: myhi' yhang: ti" ju" loo wa.
Israela byumyu" yi yu phara" aseig ri khyen: yu boem lang"
hau: mungdain: moo gyi khaid pui" bue" loo wa.
Israela byumyu" myid: moin mo dayug yug gyi goo ci: wa rhe"
Lham: toid ci: wa rhe"
Nga" nheigloem: gi Israela byumyu" yi da" gyizoug: yi yo' dage"
Ngei bu: za: nyang: nya: myid khyo" cang boem da" bang: yo' dage" nghoid nyid da:.
Aseing ri coung" ge'.
10 Loo zei: phyu: joem dang moo ju: mo,
Doo: dang moo zhung: mo,
Khyid: khyo" soo" ca" mo, nanu" we" hau: khyoo: ri tid ge'.
11 Tam" gyoo: ge'. Gyid thung" joem lheing khoem moo doem go" nyid bang:
Byu phung: gi Aseing da" oung: doid khyoo: joem yo'
Israela byu yi da" oung: doid khyoo: joem ri tid nyid boem ago".
 
Hau: thang: Aseing da" byu yigi nyangnu" voomoo" khyo" jen gyoo" lo boem ago".
12 Shu" yhi: we' Debora we"- shu" yhi: we'
Shu" yhi: we' Jikhoin" nghei we'. Shu" yhi: we'
Abinoam da" yuggi zoo: we"- shid vhu" khyoo:
re" da" thung: byu yiri shu" loo" we'.
13 Hau: thang: jhug zug da" bang: gi nyangnu" da" vhujhung: yi jhang gyoo" re" lho:
Aseing da" byumyu" yigi gyi zain: wa jen" jen" nya: jhang ju" re" ago".
14 Nyangnu" gi Ephrim mo zi janggyoin: khyoo: ju" re" ago".
Benyamin kung: yo' hau: byumyu" yi nungthang moo nghoid da:.
Gyi zoug: moo" yigi Makhira mo gyoo" lo da:.
Gyizoug: yigi Zebulun- mo gyoo" lo da:.
15 Ishakha kung: da" vhujhung: yigi Debora yo' dage" ju" re" da:.
Nghoid bye:- Ishakha ju" re" lho: Barag we' ju" re" da:.
Hau: thang: nyangnu" gi janggyoin: khyoo: nya: thang: cang yhe: ago".
Nghoid loug we' Ruben kung: bang: gi kho' lo" ago".
Nyangnu" gi ri" wa ayo" myid phyed nghoid ago".
16 Nyangnu" gi nungthang moo yang joem yo' ciwim theing: nyid boem ago" lha".
Yang zung" bang: yang kyung ri khe: da" thui: ri shoug" gyoo: wa shid re" rhe".
Nghoid bye:- Ruben kung: bang: gi kho' lo" ago"
Nyangnu" gi ri" wa ayo" myid phyed nghoid ago".
17 Gad kung: bang: gi Yodan gyid lang bidthu shoid moo theing: nyid ago".
Dan kung: bang: gi gyid sangphoo joem anam moo nyid boem ago".
Ashe kung: bang: gi panglai: gyid yam nam moo theing: nyid ago".
Nyangnu" gi gyid yam cang theing: nyid boem ago".
18 Nghoid loug we' Zebulun kung: yo' Nabthali kung: bang: gi
gyi khaid pui" moo nyangnu" kangso' shid: gyoin noogyoin shau" da:.
 
19 Megido gyid lang zooyam mo Tanag joyoo moo
Khokham yi re" wigi gyi zain: ago".
Khanan khokham yi gyi zain: ago".
Nghoid loug we' nyangnu" gi ngei ayo" yu loo" nghoid ago".
20 Kyi: joem gi moug: khoug: moo dang: yen" da" khyo"
nyangnu" mougkhung: moo gyi zain: ago".
Nyangnu" gi Sisera ri thougtheung gyi khaid ago".
21 Kishon gyid lang mo dagyid gi nyangnu" ri khyoid she: lo" da:.
Kishon gyid lang gi gyid lo, thain: da:.
Ngoo gi so" yhi: wa yoem: yo' so" yhi: wa.
22 Hau: thang: myang: joem gi thau" byam lho: ju" re" da:.
Myidjang gi nyangnu" da" khyid: khoo: joem za: nghoid nyid.
 
23 Aseing da" moug: lagyoo: gi
?Mero ri nheing" khoin" kaid ge'?
?Houg: moo nyid bang: ri nheing" khoin" zang" goo" baja".
Nyangnu" gi Aseing ri are" pang" yu goo" nghoid da:.
Nya: shid re" gyi khaid wa gyizoo: khyo" ari" goo" nghoid da? ga: tid da:.
 
24 Gam ge thang da" myiyi: myhi' gi Yaela nghoid.
Nyang: gi Keni byu Hebera da" yhoem: seing: myhi' nghoid da:.
Nyang: gi zoem" joem khoug: moo nyid da" myiyi: yi tho' gam ge thang yug nghoid da:.
25 Sisera gi gyid mho' da:. Nghoid loug we' nyang: gi nunoug" byid: jhug da:.
Nyang: gi khu young" mo nunoug" paid ri Sisera jhang ci: loo byid: da:.
26 Nyang: gi lo, dashoid moo zoem" dung" zeing ci: lho:
Gootu: dashoid moo moo" zei: bang: da" du ri ci: da:.
Nyang: gi Sisera ri baid lho: nya: vhu" khang" ri baid khyoeb pyam da:.
Nyang: gi Sisera da" vhuloem ri baid kyang pyam da:.
27 Nyang: gi nya: poid lug khyoo:
jha" gyoo" lo" ziyo' leung lo" lho: Yaela da" khyid: yang: moo aloeb loo: leung jo, da:.
Yaela da" khyid: yang: moo nyang: gi nya: poid lug khyoo: jha" gyoo" lo" lho: leung jo, da:.
Nyang: gi myidgung khyoo: leung lo" lho: shid: jo, bye:.
28 Sisera da" nya: myhi' gi bangzoo: khoem" khyo" yu" kaid da:.
Yab kyo' pain" ruang: nungthang mo zhug yu" nyid da:.
Nyang: gi ?Nya: gyi myang: rheing" gi ciwim hid: yhi' thang: gyo" nyid lha"
Nya: myang: joem gi doem tau" loo phyang" houg: yhi' yoem" nyid go" lha"? ga: myid: da:.
29 Nya: da" phajhi" bo thang da" myiyi: yigi nyang: ri dang: phuid: byid: wigi
Nyang: we' pug gi pug gi tid da:.
30 Nyangnu" gi lanyhoeb joem ri cang sho: zheing" yu wigi gam go" nyid zi za: danghoid wa.
Gyizoo: dayug ri zoomyi: nu" dayug anghoid lang" eig yug-
Sisera shid re" pain" gi
Khokham myhi' leung zeung: moo void wa za: thau" to" da" ja: joem ri gam nyid go" boem wa zi nghoid.
 
31 Aseing we"- re" gyivoo yi dangain" houg yo' dakhyo" shid: boem goo" baja".
Nghoid loug we' re" bidnoem yigi bid yo' dakhyo" zhoo: goo" baja" o"? ga: khoin" ago".
 
Houg: lho: mungdain: gi zain loem: myid: xi: yug yo nyid da:.