3
1 Houg: yoomo Aseing gi Khanan mung" moo gyi khaid pui" avang yu" lho: lid lo boem da" Israela byu yiri jham" yu" wa shid re" byumyu" dayham" ri hau: mungdain: moo teing too" byid: da:.
2 Nyang: gi he: ziri Israela byuxeig khang" moo" moo gyi khaid wa shid re" za: nghoid da:. Je wigi shid phyang" gyi khaid pui" moo khanham we' avang yu" da" bang: shid re" nghoid da:.
3 Hau: mungdain: moo nyid deing jo, da" bang: gi Philisti voomoo" wim: loem:- Khanan byu yi dangain"- Sidon byu yi yo' Bala Hermon boem mo Hamad boem gyoo: moo ju" sho' nyid boem da" Lebanon boem mo Hivi byu yi nghoid ago".
4 Moshe khyo" wigi nyangnu" phoug" phyid" yiri Aseing wigi byid: to" da" amyeing" dang: joem ri Israela byu yi tid dang: gyoo: go" la- agyoo: go" la- ga: ziri si' wa shid re" jham" yu" wa nyangnu" ri to" to" zi nghoid.
5 Hougsu" yoomo Israela byu yigi Khanan byu yi Hiti byu yi Amori byu yi Perizi byu yi Hivi byu yi Yebusi byu yi phung: moo nyid boem ago".
6 Nyangnu" gi houg: bang: yo' myi: yu yoobyen koid wigi houg: bang: yu phara" joem ri no' ago".
7 Israela byumyu" yigi nyangnu" Aseing Mangsoo ri to" myhed pyam ago". Nyangnu" gi nyang: ri yooboo shoid thougtheung wigi Bala yo' Ashera yu phara" joem ri no' ago".
8 Houg: yoomo Aseing gi Israela byumyu" yiri nheig yo: wigi Mesopotamia khokham Kushan- Rishathim ri nyangnu" adang moo oung: pyam nhang: da:. Nyangnu" gi nyang: vhoebkhang" da" akhoug: moo shed zain nyid ago".
9 Hau: thang: Israela byumyu" yigi Aseing ri yoid mho' boem yoomo nyangnu" ri lhoid pyoin' kaid wa da" byu dayug ri Aseing nhang: kaid byid: da:. He: yug gi Othniela nghoid. Othniela gi Khaleb da" nya: nhung" Kenaza da" nya: yuggi zoo: nghoid da:.
10 Aseing da" Venyi: gi nya: adang moo ju" re" lho: nyang: gi Israela byumyu" yi da" vhujhung: bue" lo da:. Othniela gi gyi khaid pui" khyoo: yhe: wigi Aseing gi nyang: ri Mesopotamia khokham ri oung: pyam nhang: da:.
11 Mungdain: gi myid: xi: zain yug yo nyid wigi hau: thang: ri Othniela shid: lo" da:.
12 Israela byu yigi Aseing ri yooboo dalheing: doem shoid thougtheung boem ago". He: gang mo Aseing gi Moba khokham Eglon ri Israela byumyu" yi tho' yoem: je gyi: nhang: da:.
13 Eglon gi Amon byumyu" yi yo' Amaleg byu yi yo' xo' yu da:. Nyangnu" gi Israela byumyu" yiri oung: pyam wigi thab gam voomoo" Yerikho ri seing: yu pyam ago".
14 Israela byumyu" yigi Eglon vhoeb da" akhoug: moo daxe: shed zain nyid boem ago".
15 Hau: thang: Israela byumyu" yigi Aseing ri yoid mho' yoomo nyangnu" ri lhoid pyoin' wa shid re" byu dayug ri nhang: kaid byid: da:. Hau: yug gi Benyamin kung: mo Bera da" nya: yuggi zoo: lo, kung" kung" yug Ehud nghoid da:. Israela byumyu" yigi Ehud ri Moba khokham Eglon jhang jhungshug joem yo' dage" nhang: kaid ago".
16 Ehud gi sham: soo" eig shoid dab lho: dape: khyug lo, shi" koo: sheing: da" shamcoin" dacam" ri nyang: nyang: baid yu da:. Nyang: gi hau: ziri lo, yo shoid phyid" doem: nya: byikhoug: moo tei" tab ci: da:.
17 Hau: thang: nyang: gi Eglon ga: da" gye" xu: su: jhang khyoo: jhungshug ci: yhi: byid: da:.
18 Ehud gi jhungshug joem Eglon ri bain byid: lang" nyang: gi hau: jhungshug ri voin ri" mo, ri yhoem: khyoo: tau" lo" boem wa shid re" tid da:.
19 Nghoid loug we' Ehud nyang: gi Gilgala nam moo jo, da" lug pyo' moo" joem mo tau" wigi Eglon jhang doem yhe: lho: ?Aseing khokham we" re" shid re" dang" nyhoem" dakhoin" ngoo yo"? ga: lo" tid.
Houg: lang" khokham phoo gi nya: dei zoo: yiri ?Nga" eig tang: kyeing" nyid deing nyid wa? ga: amyeing" byid: kaid da:. Houg: yoomo nyangnu" dangain" bang: thu lo" boem ago".
20 Khokham phoo gi nya: da" lid jham" yab atho' pyam: moo nyang: kyeing" zhung: jo, uri Ehud gi nya: jhang do, lo" wigi ?Re" shid re" Mangso jang" mo ju" re" da" mungdang: ngoo yo"? ga: tid. Khokham phoo to' yab re" da:.
21 Ehud gi nya: lo, kung" lo, yo' lo, yo shoid phyid" doem mo shamcoin" ri she: yu lho: khokham pho voem: dau ri thau" kyang kaid da:.
22 Shamcoin" gi sham: zhug noeb sho' vang lo" byug wigi hau: zi bain sho' vang byug da:. Ehud gi hau: ziri khokham pho voem: dau: mo ashe: yu nghoid da:. Hau: shamcoin" gi: nungthang shoid khyid: gyoo: khyo" kyang thu lo" da:.
23 Hau: thang: Ehud gi tunggung khyoo: thu lo" lho: khoem" myhid" wigi khoem" soo" so" lho:
24 thu loo" khare" da:. Dei zoo: yi re" lo wigi khoem" kyang kyang to" ziri re" myang ago". Nghoid loug we' nyangnu" gi yab akhoug: moo khokham phoo nyang: nghi: yhe: nyid sam" ga: za: myid jho: ago".
25 Nyangnu" lang" eung: da" gu" lang" nghoid loug we' nyang: gi khoem" aphang loo yoomo nyangnu" gi khoem" thau" shi" ri yu lho: phang kaid ago". Akhoug: moo nyangnu" da" aseing: gi phyang" gung moo shid: leung jo, da:.
26 Ehud gi nyangnu" lang" nyid da" uri phang loid byug da:. Nyang: gi lug soolhoo: joem ri lid kho' wigi Seira khyoo: phang: loid lo" da:.
27 Nyang: gi Ephrim boem moug: khyoo: ju" lang" gyi khaid wa shid re" Israela byu yiri khe: da" laboo" ri moid kaid da:. Houg: lho: nyang: gi nyangnu" ri boem moug: mo shu" gyoo" lo" da:.
28 Nyang: gi nyangnu" ri ?Nga" thang: cang ge'. Aseing gi nanu" gyivoo Moba byumyu" yi adang moo nanu" ri oung: doid nhang: bye:? ga: tid. Hougsu" yoomo nyangnu" gi Ehud thang: khyoo: cang gyoo" lo" wigi Moba byumyu" yi Yodan gyid lang gu: dab wa joyoo ri seing: yu pyam ago". Nyangnu" gi dayug ri we' lid wa akhang" abyid: goo" nghoid da:.
29 Hau: nyid" ri nyangnu" gi reung: thang da" Moba gyizoo: damoin koo: ri said pyam ago". Houg: bang: mo dayug we' aloid goo" nghoid da:.
30 Hau: nyid" ri Israela byumyu" yi Moba byumyu" yiri khaid oung: pyam wigi mungdain: gi shid xi: zain yug yo nyid da:.
31 Hau: thang: mo vhujhung: gi Anad da" yuggi zoo: Shamgara nghoid da:. Nyang: we' pyang" coin: wigi Philisti byu khyug shoo: ri said pyam wigi hougsu" Israela byumyu" yiri khyoid yu da:.