21
1 Israela byumyu" yi Mizpa moo dage" zeing: foem: nyid boem uri nyangnu" gi Aseing ri ?Ngoonu" mo hang" we' ngoonu" da" myiyi: zoo: yiri Benyamin byu yi yo' lo, axo' nhang: wa? ga: dangsoo" byid: ago".
2 Houg: yoomo akhid" Israela byu yigi Bethela khyoo: yhe: lho: hougmoo Mangsoo shidkhoin" moo myen" thang: ju" sho' yhe: zhung: jo, ago". Nyangnu" thui: zeing yo' vhoo: loo khoo" koug ngau nyid zigi
3 ?Israela da" Aseing Mangsoo we"- hid su" ciwim bue" lo lha". Israela byumyu" mo Benyamin byumyu" kung: yi ciwim byug loo" wa soin' go" lug lha"? ga: zi nghoid.
4 Byumyu" yigi thang: nyid" nab soin: no' mo to' wigi houg: moo phoin: daloem: koid ago". Nyangnu" gi zoem" khau: xoin" joem yo' nghe' ngei" xoin" joem ri du goin" goin" nghe' ngei" byid: da:.
5 Nyangnu" gi ?Mizpa joyoo Aseing shidkhoin" mo yhe: zeing: foem: jang" moo abo boem da" Israela byumyu" kung: dangain" mo daphung: phung: nyid boem lha"? ga: myid: ago". (Nyangnu" gi Mizpa khyoo: ayhe: da" yug hang" nghoid loug we' said pyam zi shoug" ca" ga: jham' tang: to" ago".)
6 Israela byumyu" yigi nyangnu" mang: nhung" Benyamin byumyu" kung: bang: shid re" nheig myid koug wigi ?Akhid" nyid" Israela gi nya: byumyu" kung: dakung: ze" phyug pyam abye:.
7 Benyamin kung: mo deing nyid boem shi" da" yuggi yi shid re" nyangnu" gi yhoem: seing: myhi' yi khasu" yo" byid: loo: wa lha". Ngoonu" gi nyangnu" ri ngoonu" da" nya: myiyi: zoo: dayug ri we' abyid: zhoo" wa shid re" Aseing ri ngoonu" dangsoo" byid: too" bye:? ga: tid ago".
8 Nyangnu" gi Mizpa joyoo khyoo: ayhe: bo foem: phung: da" Israela byumyu" kung: mo daphung: phung: nyid boem lha" ga: myid: boem lang" Gilead moug: Yabesha voobyu yi dayug we' aboo nghoid ziri nyangnu" se' boem ago".
9 Gyizoo: yiri myeing khe: koid: uri Yabesha mo dayug we' atu" goo" nghoid da:.
10 Houg: yoomo byu phung: gi sarhi' gyizoo: yi damoin eig khyeing" ri ?Yabesha voogung khyoo: yhe: wigi myiyi: yi zooshang: yi dangain" bo lho: yugkhang" moo" ri said pyam ge'.
11 Yuggi dangain" ri said pyam ge'. Zoomyi: gyeing" anghoid da" myiyi: yi yugkhang" moo" ri we' yhe: said pyam ge'? ga: da" amyeing" dang: yo' dage" nhang: kaid ago".
12 Nyangnu" gi Yabesha voobyu yi phung: mo zoomyi: gyeing" myid: shoo: yug yhe: shoug" ago". Hougsu" yoomo nyangnu" gi Khanan mung" mo Shilo voogung khyoo: houg: bang: ri shu" lo wigi dab lo koid nyid ago".
13 Hau: thang: byu phung: goin" gi Rimon lug pyo' moo nyid boem da" Benyamin byumyu" kung: yiri meing: bain zain: bye: khyoo: yhe: tid wa shid re" byu nhang: kaid boem ago".
14 Benyamin byumyu" yi doem tau" lo" boem wigi gootu: Israela byumyu" yigi nyangnu" asaid pyam loo: shu" lo boem da" Yabesha mo myiyi: nu" yiri nyangnu" ri byid: boem. Nghoid loug we' atham: nghoid ago".
15 Byumyu" yigi Benyamin byumyu" kung: yi shid re' nheig myid koug nyid ago". Ciwim ga: ri Aseing gi Israela byumyu" kung: yi dadeing: daloem: nghoid nyid ziri phyo' pyam bye: yoomo nghoid.
16 Houg: yoomo zeing: foem: nyid bang: da" vhujhung: yigi ?Benyamin byumyu" kung: yi moo myiyi: anyid loo: nghoid da:. Deing nyid boem da" yuggi yi shid re" ngoonu" khasu" yhoem: seing: myhi' yo" byid: wa lha".
17 Israela gi nya: da" byumyu" kung: daxe: eig kung: mo dakung: we' age ci phyug nghoid da:. Ngoonu" gi Benyamin byumyu" kung: shid re" nyid deing jo, wa khyoo: shoo: ca" da:.
18 Nghoid loug we' ngoonu" da" myiyi: zoo: yiri nyangnu" yo' lo, xo' wa akhang" age byid: nghoid da:. Ciwim gari ngoonu" da" myiyi: nu" mo dayug yug Benyamin byu ri lo, xo' yu nhang: da" su: hang" ri we' ngoonu" nheing" khoin" kaid too" bye: yoomo nghoid da? ga: tid ago".
19 Hau: thang: nyangnu" gi ?Shilo moo zain khang" moo" koid da" Aseing pui" gi jhang lo nyid ziri myid ago". (Shilo gi Bethela da" mougzhung: shoid- Lebona da" mougpyi: shoid- Bethela yo' Shekhem agyoo: khyoomoo" bidthu shoid moo nghoid da:.)
20 Nyangnu" gi Benyamin byu yiri ?Zabyid khyam: khoug: moo yhe: goug" nyid lho: lhoem: nyid yu" ge'.
21 Pui" ayo, moo goo" wa ga: Shilo mo myiyi: nu" yi thu ri" lang" nanu" gi hau: zabyid khyam: joem mo thu yhi: ge'. Nanu" mo yuggi khang" moo" gi hau: myiyi: nu" yi mo dayug yug ri yhoem: seing: myhi' khyo" agyoo: atho' she: yu ge'. Houg: lho: nyangnu" ri nanu" yo' dage" Benyamin moug: khyoo: shu" phang: loo" ge'.
22 Houg: bang: nya: phoo anghoid lang" nya: mang: nhung" yi nanu" jhang re" wigi nanu" ri youg: re" zhug myeing" myo: boem lang" ?Jeju" khyo" ngoonu" gi nyangnu" ri seing: nhang: la. Ciwim ga: ri ngoonu" yhoem: seing: myhi' koid wa shid re" meing: zain: jang: moo nanu" lo, mo ngoonu" yu zi anghoid. Houg: lho: nanu" wigi houg: bang: ri ngoonu" jhang byid: zho" ziwe' anghoid. Houg: yoomo nanu" dangsoo" ri phyo' pyam da" khyo" nanu" yooboo ayoo" nghoid ago"? ein: nanu" yo" tid ago"? ga: tid boem.
23 Benyamin byu yigi hougsu" koid ago". Nyangnu" mo yugdu: ngab gi Shilo moo go" nyid boem da" myiyi: nu" yi mo yhoem: seing: myhi' dayug yug khyen: yu lho: shu" lo" byug ago". Nyangnu" mougmyid khyoo: ju" lo" lang" nyangnu" voogung joem ri doem de lho: houg: moo nyid boem ago".
24 Hau: ayo, moo deing da" Israela byu yi we' houg: mo to' yhe: lo" wigi yugkhang" moo" nyang: nya: byumyu" kung:- nyang: nya: yhoem:- nyang: nya: mougmyid khyoo: tau" lo" boem ago".
25 Hau: apyaid moo Israela byumyu" yi moo khokham anyid nghoid da:. Yugkhang" moo" nyang: nyang: vho: ngei da" khyo" koid wigi nyid ago".