18
1 Hau: ayo, moo Israela mung" moo khokham anyid nghoid da:. Hau: apyaid moo Dan byumyu" kung: bang: gi nyid wa joyoo sho: yen" ago". Ciwim ga: ri Israela byumyu" yi phung: khoug: moo nyangnu" nya: mougmyid dacu' we' ayo" kham yu shigoo" nghoid da:.
2 Houg: yoomo Dan byumyu" yigi nyangnu" byumyu" kung: ikoin deungkhu: joem mo bue" doid da" byu wim yug ri khyen: yu ago". Houg: lho: houg: bang: ri joo" yhe: yu" wa shid re" jooyu" bang: khyo" Zora yo' Eshtaola voogung joem mo nhang: kaid ago". Nyangnu" Ephrim boem moug: khyoo: ju" lang" nyangnu" gi Mikha yhoem: moo yhe: theing: nyid ago".
3 Nyangnu" houg: moo nyid uri nyangnu" gi hau: Levi zooyam pho myeing" ri se' xoem" yu yoomo nyangnu" gi nya: jhang yhe: lho: ?Nang gi hid: moo cikoid nyid lha". Nang ri hid: khyoo: hang" wigi shu" lo lha"? ga: myid: ago".
4 Nyang: gi ?Ngoo ri khainjung khyo" dei byid: wa aphoug" byid: da" Mikha yo' nga" eig yug moo" deing go" to"? ga: tu" da:.
5 Nyangnu" gi nyang: ri ?Jeju" khyo" ngoonu" gyung: khyoo: oung: myug wa zi Mangsoo ri myid: byid: la? ga: tid ago".
6 Khainjung phoo gi ?Nanu" ciwe' aci' ca" nghoid ago". Aseing gi he: gyung: khyoo: moo nanu" ri yu" goem coung: byid: nyid da? ga: tid da:.
7 Houg: yoomo hau: byu wim: yug gi to' lho: Laisha voogung khyoo: yhe: lo" ago". Houg: moo: nyid bang: gi Sidon byu yi yo' dakhyoo" ti" goug: nyu: tung" za: nyid boem ziri nyangnu" myang ago". Nyangnu" gi yug yoo nu" nham' bang:- hang" yo' we' ce: myeing" amyoo: mo, nghoid. Nyangnu" ca" gu: joeb sho' yoo" bang: nghoid ago". Nyangnu" gi Sidon byu yi yo' ve: sho' nyid lho: gootu: hang" yo' we' azoem" khoug: bang: nghoid ago".
8 Hau: byu wim yug Zora yo' Eshtaola khyoo: doem tau" ju" lo" boem lang" nyangnu" moug: bang: gi nyangnu" cimyang lo boem khyoo: ri myid: ago".
9 Nyangnu" gi ?Ri" ge'. Laisha ri gyi yhe: zain: boem shang. Ngoonu" gi mougmyid ri myang bye:. Hau: zigi gye" ge da:. Hid: moo ci: we' akoid nyid loo: goo". Myab koid ge'. houg: khyoo: yhe: vang wigi seing: yu boem shang.
10 Nanu" houg: khyoo: ju" uri byumyu" yigi ci' ca" zi abo ziri yhe: myang goo" wa. Hau: mung" gi gye" gyi: da:. Houg: moo byu yi vho: ja: dangain" jo, da:. Hau: mung" ri Mangsoo gi nanu" ri byid: to" abye:? ga: phug tid ago".
11 Houg: yoomo Dan byumyu" kung: mo byu khyug shoo: yug gi Zora yo' Esthaola mo to' lho: gyi khaid wa shid re" jen" jen" nghoid ago".
12 Nyangnu" yhe: lo" wigi Yuda moug: Kiriad Yerim bidvang shoid moo dab yhe: koid nyid ago". He: gang mo akhid" ju" sho' Dan bang: da" dab ga: myheing boem ashi".
13 Nyangnu" gi hau: joyoo mo xo' yhe: lo" lho: Ephrim boem moug: mo Mikha da" yhoem: khyoo: ju" lo" ago".
14 Hau: thang: Laisha moug: lheing khoem moug: khyoo: joo" yhe: yu" boem da" hau: byu wim yug gi nyangnu" nyang: cang" ?Hid: moo hau: yhoem: joem mo dayham" moo ngei yo' thoeb to" da" seig soolhoo: daloem: jo, ziri nanu" si' goo" rhe"- houg: moo gootu: yu phara" soolhoo: joem yo' xoin" ngei" byizuang daloem: we' jo, da:. Ngoonu" cikoid eung: ein: nanu" myid go" la"? ga: tid ago".
15 Houg: yoomo nyangnu" gi Levi zooyam phoo nyid da" Mikha da" yhoem: khyoo: yhe: lho: Levi byu ri nyang: cikoid nyid khyoo: ri myid: ago".
16 Dan byumyu" kung: gyizoo: yi khyug shoo: gi gyi khaid wa shid re" jen" jen" koid lho: khoem" duang: moo yab jo, boem uri
17 Hau: jooyu" bang: wim: yug gi yhoem: khyoo: dain: za: vang yhe: wigi ngei yo' thoeb to" da" seig soolhoo:- gootu: soolhoo: joem yo' xoin" ngei' byizuang ri yhe: yu boem ago". Hau: uri khainjung phoo gi gyi jonu" ci: da" gyizoo: khyug shoo: yug yo' dage" khoem" moo" duang: moo yab jo, da:.
18 Hau: byu yi Mikha yhoem: khyoo: vang yhe: lho: younglho' zi joem yhe: yu nyid da" uri khainjung phoo gi nyangnu" ri ?Nanu" cikoid nyid boem ago"? ga: myid: da:.
19 Nyangnu" gi nyang: ri ?Sam: zoo: nyid we' dang: dakhoin" we' aji. Ngoonu" yo' dage" cang re" wigi ngoonu" da" khainjung yo' phajhi" byid: su: re" koid we'. Byu dayug da" ikoin deungkhu: daloem: shid re" khainjung koid da" tho' Israela byumyu" goin" da" khainjung koid wa je ge anghoid rhe"? ga: tid ago".
20 He: zigi khainjung phoo ri gye" gyo: pyoo: nhang: yoomo nyang: gi hau: younglho' zi joem ri yu ci: wigi nyangnu" thang: cang lo" da:.
21 Nyangnu" doem tau" lho: nyangnu" da" zooshang: yi nyangnu" da" gougnyhoug joem nyangnu" da" jonu" zi joem ri shid vhu" moo kaid wigi yhe: lo" ago".
22 Mikha nya: yhoem: kyoo" cang" yiri gyi zain: wa shid re" khe: da" uri nyangnu" gi hau: yhoem: mo dajhi' ve: sho' so" lo" abye: go". Nyangnu" gi Dan byumyu" kung: yiri cang myhi: wigi
23 Nyangnu" ri nyho: ago". Dan byumyu" kung: yigi lheing: lo wigi Mikha ri ?Cica" lha". He: byu phung: gi khasu" lha"? ga: myid: ago".
24 Mikha gi ??Cica" lha"? ga: da" dang: kang: gi cinghoid lha". Nanu" gi nga" khainjung yo' ngoo koid to" da" yu phara" soolhoo: joem ri yu lho: thu lo" ago". Nga" jang cijo, lo: lha"? ga: tu" da:.
25 Dan byumyu" kung: bang: gi nyang: ri ?Nang ci: atid ri je gi wa. Hougsu" anghoid ri hid bang: nheig yo: re" wigi nang ri gyi zain: ri" go" wa. Houg: lang" nang yo' re" yhoem: byu yi dangain" shid: boem wa? ga: tid ago".
26 Hau: thang: Dan byumyu" kung: yigi xo' yhe: lo" ago". Nyangnu" gi nya: tho' yoem: je" gyi: nyid ziri Mikha myang yoomo nyang: gi yhoem: khyoo: doem tau" lo" da:.
27-28 Dan byumyu" kung: yigi khainjung yo' Mikha koid to" da" zi joem ri yu pyam byid: thang: ri nyangnu" gi yug yoo nu" nham' da" byumyu" yi nyid da Laisha bang: ri yhe: khaid zain: ago". Hau: voogung gi Bethrehoba anam moo jo, da" janggyoin: moo: jo, da:. Nyangnu" gi hau: voobyu yiri said pyam lho: voogung ri nghe' pyam ago". Hougmoo nyangnu" ri khyoid yu wa hang" anyid nghoid da:. Ciwim gari Laisha gi Sidon yo' gye" ve: da:. Nyangnu" gi gootu: bang: yo' we' azoem" nghoid ago". Dan byumyu" kung: bang: gi voogung doem de: lho: houg: moo nyid boem ago".
29 Nyangnu" gi nyangnu" phoug" phyid" Yaku nya: zoo: Dan ri cang wigi Laisha ri Dan ga: thid myheing pyam ago".
30 Dan byumyu" kung: yigi noku coung" wa shid re" yu phara" soolhoo: joem ri zhug to" ago". Moshe da" myid: zoo: nghoid lho: Gershom da" nya: yuggi zoo: nghoid da" Yonathan yo' nya: amyed ashen yigi nyangnu" da" khainjung yi khyo" byumyu" yiri pyoung" she: loo" shau" boem da" ayo, ju" sho' Dan byumyu" kung: yi da" khainjung koid ago".
31 Shilo moo Mangso da" Zoem" jo, jo, da" myhang nyang: Dan byumyu" kung: yigi Mikha da" yu phara" soolhoo: ri no' boem ago".