15
1 Dayo, zoo: myang" thang: ri Samson gi sungsoo: yham" yo, ri nya: yhoem: seing: myhi' ri yhe: shoug" wa shid re" coidbaid dadu: she: wigi yhe: da:. Nyang: gi myiyi: nu" nya: phoo ri ?Nga" yhoem: seing: myhi' yab khyoo: ngoo vang yhi: nau da? ga: tid da:.
Nghoid loug we' nya: phoo gi nyang: ri vang wa akhang" abyid: nghoid da:.
2 Nyang: gi Samson ri ?Ngoo gi nyang: ri nang gyeing" nyang: ngheing" bye: ein: myid jho: yu lho: re" byencang" phoo ri byid: zho" pyam bye:. Nghoid loug we' nya: nhung" je yung" zi dayug nyid da:. Gung thid khyo" nang hau: yug ri yo" yu wa? ga: tid.
3 Samson gi ?He: lheing: gi Philisti byu yiri ngoo koid da" moo" zoo" shid re" ngoo yoovoin ayu wa? ga: tid da:.
4 Houg: yoomo nyang: thu lo" lho: Zeigni soem" shoo: du: ri yhe: myheig yu da:. Eig du: dazoem" zoem" shoomyi: yo' shoomyi: xo' tei" byid: wigi tei" thang: moo myi: doem tei" tab da:.
5 Hau: thang: nyang: gi myi: doem moo myi: tab lho: zeigni joem ri Philisti byu yi da" sungsoo: yoo khyoo: nhang: kaid da:. Hidsu" khyo" nyang: gi yham" to" da" sungsoo: ri za: anghoid loo: yoo joem moo yug jo, shi" da" sungsoo: joem ri nghe' khyo' pyam byid: da:. Zabyid khyam: joem yo' Zhainloin: khyam: joem ri we' nghe' pyam byid: da:.
6 He: ziri hang" koid ga: Philisti yi myid: boem lang" nya: yugphoo' nghoid da" Timna voobyu dayug gi Samson da" yhoem: seing: myhi' ri Samson da" byencang" phoo ri byid: zho" pyam yoomo Samson koid ziri se' yu ago". Houg: yoomo Philisti byu yigi hau: myiyi: myhi' ri yhe: nghe' said pyam lho: nya: pho yhoem: ri we' yhe: nghe' pyam byid: ago".
7 Samson gi nyangnu" ri ?Nanu" hidsu" koid nhung: la". Nanu" ri ngoo latoo: bain phug sho' ngoo atheing: wa ein: ngoo jham' tang: da? ga: tid.
8 Nyang: gi houg: bang: ri yu" gyoug yu" lhung: yhe: khaid zain: lho: nyangnu" mo myoo" sho' yug ri said pyam da:. Hau: thang: nyang: gi Etam lug pyo' mo lug-ug moo yhe: nyid da:.
9 Philisti byumyu" yigi re" lho: Yuda mung" moo dab koid nyid boem. Houg: lho: Lehi voogung ri zain: boem ago".
10 Yuda byu yigi nyangnu" ri ?Nanu" ciwim yoomo ngoonu" ri gyi zain: boem go" lha"? ga: myid: ago".
Nyangnu" gi ?Ngoonu" Samson ri myheig yu lho: ngoonu" ri nyang: koid bye: ziyo' dakhyo" nyang: ri we' ngoonu" koid wa shid re" ju" re" zi nghoid da? ga: tu" ago".
11 Houg: yoomo Yuda byu soem: khyeing" yug Etam lug pyo' mo lug-ug khyoo: yhe: lho: Samson ri ?Philisti byu yigi ngoonu" ri vhoebkhang" bang: nghoid ziri nang asi' rhe". Nang ngoonu" ri cikoid bye: lha"? ga: myid:.
Nyang: gi ?Nyangnu" ngoo ri koid gu: za: ngoo nyangnu" ri koid zi nghoid? ga: tu" da:.
12 Nyangnu" gi nyang: ri ?Ngoonu" nang ri nyangnu" lo, khyoo: yo" byid: sho' nang ri tei" yu wa shid re" hid: khyoo: ngoonu" ju" re" zi nghoid? ga: tid ago".
Samson gi ?Nanu" da" lo, wigi ngoo ri asaid wa ein: da" dang: khoin" ngoo ri byid: boem ge'? ga: tid da:.
13 Nyangnu" gi ?Gi bye:- Ngoonu" gi nang ri tei" za: tei" lho: nyangnu" ri yhe: ab byid: wa. Ngoonu" nang ri asaid wa? ga: tid boem ago". Houg: yoomo nyangnu" gi nyang: ri tei" seig eig khaid yo' tei" lho: hau: lug pyo' mo nyang: ri shu" thu lo ago".
14 Nyang: Lehi khyoo: ju" loo lang" Philisti byu yigi nya: jhang tang" re" lho: nyang: ri nyho: boem ago". Aseing yoem: so' gi nyang: ri nyeigdain tung" yoem: boo nhang: wigi nya: lo, pu' yo' lo, moo tei" to" da" tei" joem gi myi: zang" da" nghab khyeing: yhang: ti" byid byug da:.
15 Hau: thang: nyang: gi atung" myang" shi" ri shid: da" loo zei: mo amcam" daloem: ri myang da:. Hau: ziri koid: yu lho: hau: ziyo' byu dakhyeing" ri said pyam da:.
16 Houg: yoomo Samson gi
?Loo zei: da" amcam" yau yo' ngoo byu dakhyeing" ri said pyam bye:.
Loo zei: da" amcam" yau: yo' ngoo nyangnu" ri mang boem boem nhang: bye:? ga: jikhoin" khoin" da:.
17 Hau: thang: nyang: gi hau: amcam" yau: ri she: pyam da:. Hid: su" bue" da" joyoo ri Ramad Lehi ga: myheing ago".
18 Hau: thang: Samson gi gyid gye" shid ri" yoomo nyang: gi Aseing ri khe: lho: ?Nang gi ngoo ri he: oung: doid khyoo: ri byid: bye:. Akhid" ngoo gyid shid wigi shid: lo" nyid kyi' bye: wigi he: byu joem: joem nghoid da" Philisti byu yi wigi myheig yu zi shoug" nhang: wa la"? ga: mho' yoid da:.
19 Hau: thang: Mangsoo gi hau: Lehi joyoo moo myid khyung: daloem: phang byid: da:. Houg: mo gyid yau thu re" da:. Samson gi houg: mo gyid shug lho: nyid pyo: re" da:. Houg: yoomo hau: gyid bug ri Hakore ga: myheing ago". Hau: zigi Lehi moo da jo, jo, ashi".
20 Mungdain: ri Philisti byumyu" yi vhoebkhang" da" ayo, moo Samson gi eig xi: zain Israela byumyu" yiri shu" vhu" she: byid: da:.