11
1 Gilead mo Sarhi' gyizoo: phoo Yebtha gi shava myhi' da" nya: yuggi zoo: nghoid da:. Nya: phoo Gilead gi
2 gootu: yhoem: seing: myhi' wigi khu: da" yuggi zoo: yi gootu: we' yo" da:. Nyangnu" gyi: ri" lang" Yebtha ri yhoem: mo khaid thu pyam ago". Nyangnu" gi nyang: ri ?Nang gi ngoonu" da" nya: phoo mid daja: ri we' ayo" seing: wa. Nang gi gootu: myiyi: myhi' mo zoo: danghoid da? ga: tid ago".
3 Yebtha gi nya: mang: nhung" yi jang" mo thu lo" wigi Toba mung" mo yhe: nyid da:. Houg: moo byugang: yi daphung: ri nyang: zheing" yu lho: nyangnu" gi nyang: yo' dage" so" lam" yen" ago".
4 Dayo, zoo: myang" thang: ri Amon byu yigi Israela byumyu" yiri gyi khaid wa to' ago".
5 Hid su" bui" lang" Gilead mo vhujhung: yigi Toba mung" mo Yebtha ri yhe: doem tau" shu" yu ago".
6 Nyangnu" gi nyang: ri ?Amon byumyu" yiri ngoonu" gyi yo" zain: wa shid re" ngoonu" ri vhu" re" shi: la? ga: tid ago".
7 Nghoid loug we' Yebtha gi ?Nanu" ngoo ri gye" ngheing" yoomo nga" pho yhoem: mo ngoo ri nanu" khaid thu kaid ago". Akhid" nanu" yau: khi" shau" boem lang" ciwim yoomo nga" jhang re" lha"? ga: phug tid da:.
8 Nyangnu" gi Yebtha ri ?Nang ngoonu" yo' dage" Amon byu yiri gyi re" bo zain: lho: Gilead byu dangain" ri vhu" shu" shi: wa ziri ngoonu" vhoo: yoomo akhid" ngoonu" re" jhang re" lo zi nghoid? ga: tu" ago".
9 Yebtha gi nyangnu" ri ?Nanu" gi ngoo ri Amon byu yiri gyi khaid wa shid re" yhoem: khyoo: shu" tau" lo" wigi Aseing ngoo ri oung: doid pyam nhang: nghoid rigi ngoo gi nanu" da" vhoebkhang" su: koid wa? ga: tid da:.
10 Nyangnu" gi ?Ngoonu" myid veing" da:. Aseing gi ngoonu" da" sagse: nghoid da? ga: tu" ago".
11 Houg: yoomo Yebtha gi Gilead mo vhujhung: yi yo' dage" cang yhe: lho: byumyu" yigi nyang: ri nyangnu" da" vhoebkhang" su: yo' vhujhung: khyo" koid nhang: ago". Yebtha gi Aseing shidkhoin" Mizpa joyoo moo nya: khyoo: ri tid pyo: kaid da:.
12 Hau: thang: Yebtha gi Amon khokham jhang lagyoo: nhang: kaid wigi ?Nang ngoonu" yo' byo, goo" wa zigi ci: nghoid la". Nang ciwim yoomo ngoonu" mungdain: khyoo: jhen" vang re" lha"? ga: tid nhang: kaid da:.
13 Amon khokham gi Yebtha da" lagyoo: yiri ?Israela byumyu" yi Egutu mung" mo thu lo boem uri nyangnu" gi nga" mougmyid ri Arnon lang mo zi Yabug lang yo' Yodan gyid lang ju" sho' ri yu pyam byid: ago". Akhid" nanu" hau: mougmyid ri ngei pyoo: yug yoo tung" za: doem tau" byid: ca" ago"? ga: tu" da:.
14 Yebtha gi Amon khokham ri he: dang: phuid: yo' dage" lagyoo: yiri doem tau" nhang: kaid da:.
15 Hau: zigi ?Israela byumyu" yigi Moba mung"- anghoid lang" Amon mung" ri yu pyam da" khyoo: gi ajoo nghoid da:.
16 He: khyoo: gi hid su" nghoid da:. Israela byumyu" yi Egutu mung" mo thu lo boem uri nyangnu" gi dain" pyoid yoo ri so" lid: yhe: lho: Thoem" Ni khyo" wigi Kadesha khyoo: ju" yhe: ago".
17 Hau: thang: nyangnu" gi Edom khokham ri nya: mung" khyoo: so" lid: yhi: wa akhang" mho' wa shid re" lagyoo: yiri nhang: kaid ago". Nghoid loug we' Edom khokham gi nyangnu" akhang" anau byid: nghoid da:. Nyangnu" gi Moba khokham ri we' akhang" mho' ago". Nghoid loug we' nyangnu" ri nya: mung" khyo" so" lid: loo" wa akhang" abyid: nghoid da:. Houg: yoomo Israela byumyu" yigi Kadesha moo theing: nyid boem ago".
18 Hau: thang: nyangnu" gi Moba bid thu shoid Arnon lang thei: tab khyoo: ju" yhi: sho' dain" pyoid yoo khyo" Edom yo' Moba mung" ri so" lheing yen" ago". Nyangnu" gi houg: moo dab koid nyid ago". Nyangnu" gi Arnon lang ri agu dab yhi: nghoid ago". Ciwim gari hau: zigi Moba mougkyoo" nghoid yoomo nghoid.
19 Hau: thang: Israela byumyu" yigi Heshbon mo Amori khokham Sihon jhang lagyoo: yiri nhang: kaid lho: nya: mung" khyo" nyangnu" moug: khyoo: so" lid: yhi: wa shid re" nyang: ri akhang" mho' nhang: kaid ago".
20 Nghoid loug we' Sihon gi Israela byumyu" yiri akhang" abyid: nghoid da:. Nyang: gi nya: gyidab goin" ziri zheing" yu lho: Yahaza moo dab koid nyid wigi Israela byumyu" yiri gyi zain: da:.
21 Nghoid loug we' Israela da" Aseing Mangsoo gi Sihon yo' nya: gyidab adang moo Israela yiri oung: pyam nhang: da:. Hougsu" yoomo Israela byumyu" yigi hau: mungdain: moo nyid boem da" Amori byu yi da" mougmyid dangain" ri seing: yu pyam ago".
22 Nyangnu" gi mougpyi: shoid Arnon lang mo zi mougzhung: shoid Yabug lang ju" sho' bidthu shoid dain" pyoid yoo mo zi bidvang shoid Yodan gyid lang ju" sho' nghoid da" Amori byumyu" yi mougmyid dangain" ri seing: yu ago".
23 Houg: yoomo hau: zigi nya: byu yi nghoid da" Israela byumyu" yi shid re" Amori byumyu" yiri khaid thu pyam byid: da" Israela byumyu" yi da" Aseing Mangsoo koid zi nghoid da:.
24 Nang hau: ziri doem tau" yu wa shid re" soin' rhe". Nang gi re" yu phara" Khemosha wigi byid: to" da" gu: ri yo" seing: yu da:. Nghoid loug we' ngoonu" gi ngoonu" da" Aseing Mangsoo wigi ngoonu" ri byid: to" da" gu: ja" khang" moo" ri seing: wa.
25 Nang gi Ziphora da" yuggi zoo: Moba khokham Balag tho' je bui" yug nghoid ein: nang jho: rhe". Nyang: khanham we' Israela byumyu" yiri pyi: asho: yu" nghoid da anghoid rhe". Nyang: ngoonu" ri thougtheung gyi re" zain: yu" rhe".
26 Israela byumyu" yigi Heshbon- Aroera yo' hau: voomoo" joem ri lheing khoem mo voogung joem Arnon gyid yam mo voomoo" dangain" ri soem" shoo: zain seing: to" ago". Hau: ayo, gyoo: moo nang ciwim hau: mougmyid joem ri adoem tau" seing: lha".
27 Nang ri ngoo ci: ashoid. Nang ngoo ri gyi khaid da" khyo" ngoo ri shoid nyid da:. Aseing gi tarha" agyi nghoid da:. Nyang: gi akhid" nyid" Israela byumyu" yi yo' Amon byumyu" yi agyoo: moo dang: phyed byid: ri" wa? ga: tid nhang: kaid da:.
28 Nghoid loug we' Amon khokham gi Yebtha tid kaid da" mungdang: ri atam" gyoo: nghoid da:.
29 Hau: thang: Aseing da" Venyi: gi Yebtha jhang ju" re" da:. Nyang: gi Gilead yo' Manashe moug: khyoo: jang: sho' yhe: lho: Gilead mo Mizpa khyoo: tau" lo" lho: Amon khyoo: xo' yhe: lo" da:.
30 Yebtha gi Aseing ri ?Nang ngoo ri Amon byumyu" yi adang moo oung: pyam nhang: nghoid rigi
31 Ngoo oung: pui" mo doem tau" lo uri ngoo ri tau' yu wa shid re" nga" yhoem: mo xang: shi" thu re" da" su: ri xoin" khyo" ngoo nang ri nghe' ngei" byid: wa. Ngoo gi byu hau: yug ri xoin" khyo" ngei" byid: wa? ga: dangsoo" byid: to" da:.
32 Houg: yoomo Yebtha gi Amon byu yiri khaid zain: wa shid re" gyid lang ri gu: dab yhe: da:. Aseing gi nyang: ri oung: doid nhang: byid: da:.
33 Nyang: gi nyangnu" ri Aroera mo Minid lheing khoem voomoo" eig xi: dangain" ri yo' Abela Keramin khyoo: ju" sho' khaid zain: da:. Myoo: sho' said toem" pyam wigi Israela byumyu" yi wigi Amon byu yiri oung: pyam ago".
34 Yebtha gi Mizpa yhoem: khyoo: tau" lo" uri nya: myiyi: zoo: gi nyang: ri tau' yu wa shid re" go" wigi jhu: khuang baid lho: thu re" nyid da:. Nyang: gi Yebtha da" zooti" myiyi: zoo: nghoid da:.
35 Yebtha gi nyang: ri myang lang" koug wigi nya: byimi joem ri lang: ceig pyam lho: ?O" nga" myiyi: zoo: we"- nang gi nga" nheigloem: ri go, sain" loo" nhang: abye:. Ciwim yoomo ngoo ri koug nhang: da" su: nang bui" ca" lha". Ngoo gi Aseing ri geing: teing da" dangsoo" daloem: byid: too" bye:. Hau: ziri ngoo adoem yo" tau" yu loo:? ga: tid da:.
36 Nyang: gi nya: phoo ri ?Aseing gi re" gyivoo yi nghoid da" Amon byu yiri latoo: phug byid: nhang: bye: yoomo nang Aseing ri dangsoo" byid: too" bye: nghoid rigi nang nga" adang moo koid wa tid da" moo" ri koid we? ga: tid da:.
37 Nghoid loug we' nyang: gi nya: phoo ri ?Nga" shid re" he: daja: ri koid byid: we'. Ngoo gi zoomyi: gyeing" uri shid: ca" bye: yoomo nga" byencang" myhi' yi yo' dage" boem joem khyoo: yhe: lho: koug ngau so" lam" yen" wa shid re" ngoo ri kyeing" lhammoo" eig khyab nyhid: too" la? ga: mho' da:.
38 Yebtha gi nyang: ri lhammoo" eig khyab yhe: lam" yen" wa shid re" yhi: nhang: kaid da:. Nyang: gi nya: byencang" myhi' yi yo' boem joem khyoo: do, lo" wigi nyang: lo, axo'- zooshang: ayoo" loo: shid: wa yoomo yhe: koug ngau ago".
39-40 Lhammoo" eig khyab thang: ri nya: pho jhang doem tau" ju" lo da:. Yebtha gi Aseing ri nyang: dangsoo" byid: to" ziri koid bye:. Hau: myiyi: zoo: gi zoomyi: gyeing" khyo" nyid lo" da:.
He: zigi Israela myiyi: yigi Gilead mo Yebtha da" myiyi: zoo: shid re" thu yhe: wigi zain khang" moo" myid: nyid" yhe: koug ngau yen" da" thung" ri: Israela byumyu" yi moo bue" thu re" da" khyoo: ajhung: nghoid da:.