YUDA
LHID" FOIN: KAID DA" MOUGSOUG"
(Jude)
Yuda mougsoug" lhid" da" khyoo: gi- nyang: nya: da" gug du: ri Khristain nghoid ga: myeing za: tab ci: mhau' da" sara yi yo' sen: lho: wigi tid poin" to" da" khyoo: nghoid. Hid: leung" kyeing" te: lhid" to" da" mougsoug" moo bo da" akhyoo" again joem gi lagyoo: Petru eig lheung: lhid" foin: kaid da" mougsoug" yo' we' gye" du go". Mangsoo gi nya: byu yi ri dalheung: dam byid: kaid bye: da" loem" jeing" khoo: ri geing: geing: teing teing cang pyeung boem wa shid re" mougsoug" lhid" su: gi mougsoug" nghab mo, ri yoem: foin: byid: kaid da" khyoo: nghoid.
1
1 Phoo Mangsoo jheddab da" ziyo' Mangsoo khe: yu to" lho: Aseing Yesu lhoug zung" nyid mo, Mangsoo khe: yu shau" mo, dangain" bang: jhang khyoo:-
Aseing Yesu da" deizoo: yo' Yaku da" nya: no, Ngoo Yuda mo wigi- mougsoug" lhid" foin: kaid.
2 Nanu" gi nheigkhyeig go" khyoo: myenjham" yug yo khyoo: yo' jhed goo" kang: go" khyoo: ri joeb, joeb, byeung" byeung" shau" kham: yu nyid goo" baja" o".
3 Jheddab, da" bidnoem yi we"- nanu" dangain" mo, bain loem" jeing" kham: yu ci: bye: da" khyoid yu khyoo: ri ngoo gi nanu" jhang khyoo: lhid" kaid wa shid re" yoem: kaid nyid uri Mangsoo gi dalheung: dam nya: da" byumyu" yiri bain byid: too" bye: da" loem" jeing" khyoo: geingteing jo, baja" ga: loem: zain: oung: myid boem wa shid re" nanu" jhang khyoo: mougsoug" myab, myab, lhid" lho: wigi yoem: byid: ca" khyoo: shau" nyid.
4 Khasu" wim ga: ri tarha" aci: da" byu dayham" bang: gi aboin: aso" shoid khyo" lo vang loung" jo, boem bye:- nyangnu" gi nyha" phoo Mangso da" jeju" mungdang: ri nyangnu" da" akhyeung" khyoo: ri nghoeb, pyam byid: wa shid re" ci: yhoung: zoore dayug kyeung" ngoonu" da" khyoid yu Aseing Yesu Khristu rigi ngeug pyam bye:. Houg: bang: kham zoo: wa da" yooboo dam gi jhoem: mungdang: moo goolheung: mo tid lhoem: too" bye:.
5 Mangsoo gi Israela byumyu" yi ri khyoid yu lho: Egutu moug: mo wigi shu" thu' lo thang: ri nyang: ri aloem khoug: aloem" jeing" da" bang: ri byo, joem: thang loo" nhang: ziri nanu" nyang: se' deing gu nghoid loug we' nanu" ri hau: khyoo: ngoo doem tid poin" nau.
6 Nyang: nyang: yo" jo, da" amyeung" akhang" ri ci: lid' lo" lho: wigi nyang: nya: da" joyoo ri she: pyam kho' da" moug: lagyoo: yi da" khyoo: ri we' myid boin: yu" ge. Mangsoo gi nya: tarha" dang: phyed wa da" bidnyid zeing moo houg: bang: ri yooboo dam kaid wa shid re" mougcoid thung: khoug: moo apyaid ato: da" joto' jang coo" yo' datei" to".
7 Sodom voo yo' Gomora voo eig loem: ri we' hau: eig vo da" ayam, aqei: moo jo, da" voogung joem ri we' myid boin: yu" ge. Hau: voo mo voobyu mungbyu yi koem gi akhang: tid da" moug: lagyoo: yi yhang: ti" yau: shoo: go" lho: yug gi nyang: cang" we' aved, avhu; da" moo" ri koid nyid boem. Nyangnu" gi apyaid atoo: dadab nyid da" mi myikhyoem moo- yooboo dam ri shau" kham zo: boem khyoo:- byu dangain" mo, ri bang bang nyang: zid" lhid nhang: kaid.
8 Houg: yhang: ti" hau: byu hid: bang: we' myo, myang aja: ja: myang ziyo' nyang: nya: da" gungdu: moo yooboo koid wa Mangsoo ri ci: asoin:- aphoug" agyug lo: tho' mo phung" yoeb, boo bang: ri we' rue" pyam boem bye:.
9 Moug: lagyoo: moo" Mikhaela nyang: lang" hid: yhang: ti" akoid yu"- Moshe mang ri hang" yu eung: ga: yu zoug: moo" ri rue" da" dang: yo' yooboo foin: da" khyoo: avoem" koid loo za: nang ri Mangso wigi gyi koid baja" ga: date: tid.
10 Nghoid loug we' byu hid: bang: gi nyangnu" asi ashoug" gyo: yu" da" khyoo: dangain" ri rue" ziyo' yooboo foin: pyam boem. Kyang: da" gougnyhoug joem yhang: ti" nyangnu" nya: da" nheigloem: khoug: moo akhang: re boo gu ri te: se' gyo: da" khyoo: joem gi nyangnu" lhu: phyo' lhu: shoin' loo" nhang: da" myid nheigloem: za: nghoid.
11 Nyangnu" shid re" khayhi' gyoug pho" zi nghoid lha". Nyangnu" gi Ka-in so" da: khyoo: moo cang lo" boem bye:. Ngei yoomo Balam shoid vhang: da" yooboo ri bo bain shoid pyam abye: go". Ko" ra' yhang: ti" thoung" shau" yoomo byo, loo" nhang: bye:.
12 Nyangnu" gi sho' asi ngei yid' thu: boem lho: zoo: pyoo: shug pyo: zoore"- nanu" da" zoem" khau, myen" xoin: zo: pui" moo aco' ajhoid' bui" nhang: bye:. Nyangnu" gi nyang: nya: da" akyu" ri te: sho: nyid mo, nghoid boem ago". Nyangnu" gi moug: gyid' abo da" lid wigi hau' tang" lo" da" jhoem" moug" yo' date: du nyid boem. Nyangnu" gi xung" kain" thoin" moo ashi" azei: yoomo agyi: mo wigi poid' said to" da" seig kyug gam yo' du nyid ago".
13 Nyangnu" gi gye" thain: da" panglai: beingmhoid' yhang: ti" du nyid wigi nyangnu" koid da" asho, ashid: moozoo" we' panglai: gyid nyoeb, yang: ti" thu' nyid. Nyangnu" gi akhyoo" acang da" kyi:- moug: lam" kyi: joem yo' we' du nyid nyangnu" shid re" Mangsoo gi apyaid ato: joyoo daloem: ri no, athang da" mougcoid khoug: moo nyheung too" bye:.
14 Adam: mo xo' gyo" lo da" nyid' xeig ein: jangmo Enug gi hid: bang: khyoo: yo' sen: lho: goolheung: mo lapi: pe: too" bye:. Hau: zigi ?Aseing gi atho' nghab loo da" gyeungshang: mau: lagyoo: yi yo' doem gyoo" loo wa nghoid.
15 Byu yug khang" moo" ri we' Mangsoo ci: phyoug pyam da: dang: tid mo, ri we' yooboo dam kaid wa shid re" ju" ri" wa zi nghoid.
16 He: da" byu phung: yi gi khanham we' kyiyang' myeung zoore byen, cang" ri yooboo za: te: se' foin: nyid bang: nghoid- nyang: nya: da" anyhoin: athoung" akhyeing: ashoeb da" nheigloem: khyo" cang lho: te: se' koid mo, nghoid. Nyang: nya: da" khyoo: ri phau: khuang se' nyid nyang: nya: da" akyu" yo" yu wa jang" moo yen, gi byen, cang" ri mhau coung" byid: se' nyid boem.
17 Nghoid sho' loug we' jheddab da" bidnoem yi we"- ngoonu" da" Aseing Yesu Khristu lagyoo: yi- shid phyang" khasu" ga: tid too" khare" khyoo: ri myid boin: nyid ge.
18 Khasu" wim ga: ri lo" thang da" bidnyid moo nanu" ri juang" yi lho: wigi nyang: nya: vhoo: boo: myo, no, da" nheigloem: axoug" ri cang mo gyeungshang: da" Venyi: ri ayo" yu mo
19 Houg: bang: gi phung ri byo, loo" nhang: mo nyang: nya: da" nheigloem: axoug" ri cang mo gyeungshang: da" Venyi: ri ayo" yu mo nghoid nyid boem.
20 Nghoid loug we' bidnoem yi we"- nanu" gi nanu" nya: da" gye" young" lho' gyeungshang: da" loem" jeing" khyoo: moo ayang: zug, jo, lho: nanu" da" kangso dei khyoo: ri gyi: sheung: loo nhang: ge. Gyeungshang: da" Venyi: yoem: vhoo: ri nghe: khau: lho: akyu"- mho' nyid ge.
21 Mangso da" jheddab khoug: moo daloung" jo, ge- Hougsu" Aseing Yesu Khristu gi- nya: nheigkhyeig shoomyen: da" khoug: moo nanu" ri byid: wa da" apyaid ato: kangso ri dalang" nyid ge.
22 Loem gyam khau: gyam; nyid mo, ri nheig khyeug nheigloem: toin" shid nyid ge.
23 Dayham" ri myikhyoem mo xue: yu ge'. Dayham" bang: rigi gyoug nheigloem: yo' nheig khyeug nheigloem: toin" shid nyid ge. Nghoid loug we' nyangnu" vhoo: boo myo, no, da" moo" yo' aco' ajhoid da" byimi ri co' ngheung" nyid ge.
24 Nanu" ri ajhoid leung nhang: sho' zung" lhug byid: su: yo' ce: yooboo we' aboo nhang: looza: gau yi ngei pyo: ziyo' myonhoo: phung" yoeb, doug, bang da" Aseing shidkhoin" khyoo:- yo" shu" vang yi su.
25 Aseing Yesu Khristu moo ngoonu" ri yo" khyoid yu da" dayug kyeung" da" Mangsoo gi moug; thu' xang: poin: mo wigi he: yam: he: pyaid yo' thang: phyang" apyaid atoo: moo ju" sho' myonhoo: phung" yoeb, yoem: moo" so' zeing- amyeung" akhang" gi nyang: moo za: dabo jo, baja" o- A men.