5
Yoba we"- nyho: yoid kaid we' dayug yug tu" byid: abe yu" yu" we'.
Nang lheing: yu" wa moug: lagyoo: dayug yug nyid rhe".
Nheig yo: wigi nanya: gung nanyang: shid: sho' myid myo: zigi
dang: kang: abo da" akoo" adau: moo" nghoid loo wa.
Goem loem nyid yhang: ti" yu" wim da" koo" bang: ri ngoo myang yu".
nghoid loug we' nyangnu" da" yhoem: joem moo ngo wigi nheing" khoin" khe: khyo' byid:.
Nyangnu" da" yuggi zoo: yigi khanham we' goem loem zi ayo" yu nghoid da:.
Nyangnu" ri tarha" yung" moo tid goo byid: wa dayug we' ato' loo nghoid da:.
Zooyoid bang: gi koo" bang: da" gug zoo: ri zo: lo boem wa.
Zukyen: yoo moo: yug da" gug zoo: rilang" zo: pyam loo goo" wa.
Gyid shid bang: gi nya: jonu" ri yu" zo loo goo" wa.
Myid xu: moo akhyeing" zi age yug nghoid da:.
myidgung khoug: mo yau: khi" yug thu ri" wa zi anghoid.
Nghoid nyang: anghoid- myi: mo myijhen" zain dang: lo" yhang: ti"
nyang: gi nyang: nya: gung moo yau: khi" kaid yu da:.
Ngoo gi nang danghoid rigi ngoo gi Mangso jhang yhi: wa wigi
nga" khyoo: ri nyang: ri yhe: tid khyoo" wa.
Ngoonu" gi nyang: koid da" gyi: sheing: moo" zoo" ri atho' se' gyoo:.
Houg: lho: nya: da" mau" pho" alhoo: again gi thang ga: zi ajo,.
10 Nyang: gi moug: voo nhang: kaid wigi
Tung: yoo yoothung" ri gyid shoin" da:.
11 Nghoid- nyhoem: khyoo' bang: ri tu: to' wigi
koug ngoug bang: dangain" ri ngei pyo: khyoo: ri byid: su: gi Mangsoo nyang: nghoid da:.
12-13 Nyang: gi khoug: lheing: lheing: da" byu yi myid soin' to" ziri tu: mhug byid: wigi
Phajhi" boo bang: koid da" moo" zoo" aoung: doid wa shid re"
nyangnu" gi nyangnu" nyang: soin' to" da" moo" moo myi" byug wa.
14 Nyid" bid gung tu: yo, moo lang" nyangnu" moug: coid khoug: moo ti" soeb jen yen" ago".
15 Nghoid loug we' Mangsoo gi sho" jen: bang: ri shid: jang" mo khyoid yu da:.
Nyang: gi jonu" ayoo" bang: subi" wigi doin zeig zo: jang" mo khyoid yu da:.
16 Nyang: gi myung bang: ri myid byu joyoo byid: wigi akhyeing" bang: ri shoem: loo" nhang: da:.
 
17 Mangso wigi jhau" shid zi shoug" su: gi ngei bu: nyid da:.
Nyang: wigi nang ri nheig yo: uri nheig aphoug yoo:.
18 Mangsoo gi nyang: wigi tab da" dam ri doem thoeb byid: da:.
Nya: lo, wigi nang ri dam noo nhang: wigi nya: lo, wigi dam gi nhang: da:.
19 Dalheing: thang: dalheing: nyang: gi nang ri dam dab jang" mo khyoid yu wa.
20 Phang" khoug khoug lo da" uri nyang: gi nang ri dei nyid nhang: wa.
Houg: lho: gyipui" moo nyang: gi nang ri goem loem byid: loo wa.
21 Mangsoo gi nang ri mhoug fain" zoo: bang: lo, moo khyoid yu wa.
Byo, yoin khyoo: ju" lo uri nyang: gi nang ri khyoid yu wa.
22 Nang gi athoug" akhyoug: ziyo' zooyoid ziri yi jhuang" pyam loo wa.
Houg: lho: gougnyhoug lam" joem ri agyug ca" wa.
23 Nang phug da" yoothung" moo lugzeing ajo, wa.
Gougnyhoug lam" joem gi nang ri khanham we' gyi akoid wa.
24 Houg: lang" nang gi re" zoem" khoug: moo ngei pyoo: yug yoo tung" yo" nyid wa.
Re" yang joem ri nang yu" kaid ri yang joem goem loem nyid ziri shau" myang wa.
25 Nang gi jang: pa: mo vu fu" fu' joem nho' myo: da" zooshang: yi yo" loo wa.
26 Shivoo: yham" yo, ju" sho' myheing da" sungsoo: yhang: ti"
nang gi vhu" phyu: zei ni sho' dei nyid wa.
27 Yoba we"- ngoonu" gi gye" myang" sho' jhau" yu wigi he: zi se' zi nghoid.
He: zigi deingmain" nyid. Akhid" hau: ziri khab' yu we'.