4
(4:1-14:22)
Elipha
1-2 Yoba we"- ngoo dang: tid ri nang nheig gyo: yoo: wa la".
Ngoo sam zoo: ayo" nyid loo.
3 Nang gi byu myoo" sho' bang: ri jhau" shid wigi
yoem: nheing: da" lo, joem ri yoem: byid: lo abye:.
4 Byu dayug yug gi khyid: vhu" thung" leung- yoem: neing: lho: myung: dau uri
Re" dang: khoin" joem wigi nyang: ri to' loo" wa shid re" yoem: byid: da:.
5 Akhid" gi yau: khe" shoug" wa nang moo ju" jo, abye:.
Hau: lho: nang gi hau: ziri avoem" shoug" sho' gyoug dain nyid da:.
6 Nang gi Mangsoo ri noku wigi re" apyaid gi yooboo voin wa aboo nghoid da:.
hau: lho: nang gi myid loem ziyo' yo" myid lang" nyid.
7 Akhid" doem tau" myid yu" we' deingmain" da" byu dayug byo, yoin" zi shau" da" khyoo:
daloem: khyalang" tid yu" we'.
8 Akhyeing" da" yoothung" phug lho:
Akhyeing" ashoeb da" myoug: shi" sain" da" bang:
Akhyeing" ziyo akhyeing" ashoeb ziri yham" yu boem ziri ngoo myang yu" bye:.
9 Mangsoo gi uglid yhang: ti" nya: nheig yo: zi wigi nyangnu" ri phyo' shoin' pyam da:.
10 Akhyeing" ashoeb zigi khangkhyi yhang: ti" myeing nyid da:.
Nghoid loug we' Mangsoo gi nyangnu" ri tam" too" nhang: wigi nyangnu" zei joem ri khyau" pyam byid: da:.
11 Ngaid said zoo: wa ci: ayo" da" khang: khyi: joem yhang: ti" nyangnu" shid: lo" wigi
Nyangnu" nya: zoo: yi dangain" ri khaid sain" pyam zi shoug" ago".
12 Dalheing: ri ngoo lang" alug ashau" gyoo: sho' da" thui: yo'
mungdang: daloem sam: zoo: ju" lo da:.
13 Hau: zigi yhoeb zeig zeig yhang: ti" ngoo ri ayo" yhoeb bui" nhang: da:.
14 Ngoo gi ko' ko' gyoug nain" nyid.
Nga" gung goin" gyoug wigi nain" nyid da:.
15 Nga" myonhoo: moo lid yoem" lo hau' zang" wigi
Ngoo gi gyoug wigi gyo, shi" to' re" da:.
16 Houg: moo daja: yab jo, ziri ngoo shau" myang.
Ngoo zhug yu" nghoid loug we' ci: nghoid ziri ase' tid.
Hau: thang: sam: zoo: tam" jo, jang" mo thui: dathui: ri ngoo shau" gyo: kaid.
17 ?Mangso shidkhoin" moo hang" dayug yo" deungmain" wa la".
Anghoid lang" nya: phain" so: yhoem: seing: shidkhoin" moo yo" deungmain" wa la".
18 Mangsoo gi mougkhung: mo nya: dei zoo: yiri aloem.
Nyang: gi nya: da" moug: lagyoo: yiri lang" yooboo yo" myang byid: da:.
19 Boug goo: ri yhang: ti" yo" doin: phyi: said pyam da" pheilhoug: nghoid da"
Myid nhoug: dei noem ri nyang: myid loem wa ein: nang myid jho: rhe".
20 Nyang" gi nab soin: ri yo" dei nyid wa.
Nghoid loug we' myen" thang: aju" shi" ri hang" asi' aboin: loo za: ge shid: lo" da:.
21 Nyhang" yo" zi dangain" ri yu pyam byid: lho:
nyhang" gi phajhi" asi shi" ri shid: lo" da? ga: tid.