33
Houg: lho: Yoba we"- akhid" ngoo tid ca" da" dang: dangain" ziri
jhug za: tam" gyo: yu we'
Ngoo gi nga" nheigloem: khoug: moo bo ziri tid kaid wa bye:.
Nga" dang: khoin" joem dangain" gi khyang: khyang: za: nghoid da:.
Houg: lho: ngoo gi deingmain" ziri tid nyid da:.
Mangso da" Venyi: gi ngoo ri phain" so: to" wigi ngoo ri kangso' byid: da:.
Nang yo" phug tid nghoid ri ngoo ri phug tid la. Nang ngeug tid wa khyoo: ri soin' ci: we'.
Nang yo' ngoo gi Mangso shidkhoin" moo dakhyo" danghoid.
Nga" eig yug goin" ziri myidzhoo" yo' byu azuang koid to" zi nghoid.
Houg: yoomo nang wigi ngoo ri gyoug wa khyoo: ci: ajo,
Ngoo gi nang ri a oung: pyam wa.
Akhid" ngoo gi nang hid: su" ga: tid thui: shau" gyo:
?Ngoo ce: yooboo ayoo"- ngoo ci: we' akoid shoid.
Ngoo moo yooboo aboo yoomo yooboo yo' ci: asen:
10 Nghoid loug we' Mangsoo gi ngoo ri khaid zain: wa shid re" cang sho: da:.
Houg: lho: ngoo ri gyivoo yhang: ti" to" to" da:.
11 Nyang: gi nga" khyid: joem moo jangcoo" foid byid: da:.
Nyang: gi ngoo koid yen" khyoo: ja: khang" moo" ri zung" yu" nyid da? ga: tid.
12 Nghoid loug we' Yoba we"- nang ri ngoo tid ba- nang shoid da:.
Mangsoo gi byu xangsu: yugkhang" moo" tho' je gyi: sheung: da:.
13 Mangsoo gi nyha" da" myeing" myo: thui: ri khanham we' aphug tid da" gang mo nang ciwim yoomo Mangsoo ri yooboo zhug la.
14 Mangsoo gi pug gi pug gi dang: ji nyid nghoid loug we'
nyang: tid ziri hang" agyoo: byid: goo" nghoid da:.
15 Myen" ri byu yi yhoeb jo, uri
Mangsoo gi yhoebmo, joem yo' yoeb myang joem khyo" dang: tid nyid.
16 Nyang: gi nyang: tid ziri tam" gyoo: sho' koid da:.
Houg: lho: nyangnu" gi nyang: wigi tid poin" ziri gyoug dain ago"
17 Mangsoo gi nyangnu" ri yooboo koid zi theing: pyam goo" wa shid re" tid da:.
Houg: lho: nghoid boin: lo jang" mo khyoid yu wa shid re" tid da:.
18 Nyang: gi nyangnu" ri phyo' shoin' pyam zi shoug" nhang: wa anghoid.
Nyang: gi nyangnu" ri shid: jang" mo we' khyoid yu da:.
19 Mangsoo gi nyhang" ri noo phyoo" bui" nhang: khyo" we'
gung moo no ziri kaid byid: khyo" we' jhau" shed' yu da:.
20 byu noo nghoid su: gi nhoid angham" nghoid da:.
Houg: lho: reung: thang da" zoo: shug lang" nheig yu" noo tung" nghoid da:.
21 Nyangnu" da" gung doem gi gyi" lo: da:.
Nyangnu" da" shoo" yau: dangain" ri yo" myang da:.
22 Nyangnu" gi moovo moug: khyoo: loo" wa za: danghoid lo:.
23 Moug: lagyoo: dayug yug gi nyangnu" ri re" pang" yu abe.
Ngoonu" da" moo" zoo" ri tid shed da" Mangso moug: lagyoo: khyeing" su: jang" mo dayug yug re" pang" yu abe.
24 Moug: lagyoo: gi nheig yu" khyeug wigi nyangnu" ri ?Nhang: kaid we'.
Nyangnu" gi moovo moug: khyoo: gyoo" loo" ca" wa zi anghoid.
Nyangnu" ri nhang: kaid wa shid re" aphoug" hid: moo: nghoid? ga: tid abe.
25 Nyangnu" da" gung du: gi gyi: sheung: lo wigi yoem: dalheing: doem bo loo wa.
26 Nyangnu" akyu" mho' ri Mangsoo nyangnu" ri tu" byid: wa.
Nyangnu" gi Mangsoo ri ngei bu: tung" noku byid: loo wa.
Mangsoo gi nyangnu" shid re" aja: ja: ri jo da" khyo" doem koid loo wa.
27 Yugkhang" moo" gi byu phung: gung moo tid zigi ?Ngoo yooboo shoid lid loo bye:.
Ngoo gi jo ziri akoid loug we' Mangsoo gi ngoo ri khyam" sa: byid: bye:.
28 Nyang: gi ngoo ri moovo moug: khyoo: aloo" sho' khoem ci: da:.
Houg: lho: ngoo akhid" dei nyid shi"? ga: tid.
29 Mangsoo gi he: zi dangain" ri pug gi gi doem koid da:.
30 Nyang: gi byu dayug da" kangso' ri khyoid yu wigi
Nyang: ri dei nyid da" ngei bu: khyoo: ri byid: da:.
31 Akhid"- Yoba we"- ngoo tid nyid ziri tam" gyoo: we'
Sam zoo: tam" we' ngoo dang: tid ba.
32 Nghoid loug we' nang daja: ja: tid wa yo, ri, ngoo ri gyoo: nhang: la.
Nang jo ga: tid ziri ngoo ngei bu: tung" kham: yu wa.
33 Hougsu" anghoid lang" sam: zoo: tam" to" wigi nga" dang: ri tam" gyoo: we'.
Ngoo gi nang ri khasu" phajhi" boo wa shid re" jhau" shid byid: wa.