27
Yoba
1-2 Ngoo gi ngoo ri tarha" deingmain" ziri ngeug he: pyam lho: nga" pyaid ri khoo" nhang: da:.
Kangso' dei myhang: thang Mangsoo moo jham' tang:.
3 Mangso wigi ngoo ri so' dashe: nhang: myhang moo
4 Nga" nhoid khyo" akhyeing" zi khanham we' atid wa.
Nga" yhoo: ri khanham we' amhoug tid wa.
5 Nanu" ri jo ein: khanham we' ngoo atid wa.
Ngoo gi ngoo shid: lo" nyid da" bidnyid ju" sho' ngoo yooboo ayo" khyoo: ri xo' tid nyid shi" wa.
6 Ngoo jo ein: ziri atid loo: khanham we' to" pyam wa zi anghoid.
Nga" nheigloem: yung" yung" danghoid.
7 Ngoo ri ngeug thug bang: yo' thougtheung gyi koid bang: dangain" mo, gi
akhyeing" bang: yo' adeingmain" bang: ri yhang: ti" yooboo dam byid: zi shau" boem goo" baja".
8 Mangsoo abo da" bang: ri Mangso wigi nyangnu" kangso' mho' da" ayo, akhyeing" moo
nyangnu" myid byu khyoo: ci jo, la".
9 Yau: khi" ju" re" uri nyangnu" mho' yoid thui: ri Mangsoo tam" gyoo: byid: loo: wa la"
10 Nyangnu" gi nyang: wigi byid: to" da" ngei pyo: khyoo: ri nheugshid: ca" zi nghoid.
Nyangnu" gi nyang: ri byeing abyid loo: za: akyu" mho' ca" zi nghoid.
11 Mangso da" yoem: so' khayhi' gyi: sheung: khyoo: ri nanu" ri ngoo jhau" byid: da:.
Myhang: thang Mangsoo gi ce: noem myidyung to" khyoo: ri tid sho' kyoo" wa.
12 Nghoid loug we' hougsu" anghoid- lo" thang moo nanu" nyang: shau" myang abye:.
Houg: ri nang ciwim dang: kang: abo zi tid la"
[Zopha]
13 He: zigi myhang: thang Mangso wigi akhyeing" bang:- pyi: joem: shoo: bang: ri khasu" yooboo dam byid: ein: zi nghoid.
14 Nyangnu" gi yuggi zoo: yi myoo" sho' yoo" loug we'
meing: zain: pa: moo dangain" said pyam zi shoug" wa.
Nyangnu" da" zooshang: yigi khanham we' gyi sho' ashau" zoo: goo" wa.
15 Ashid: loo nyid deung bang: we' noo aja: ja: wigi shid: lo" boem goo" wa.
Houg: lho: nyangnu" da" cougmoo" yi lang" nyangnu" shid: uri akoug ngoug goo" wa.
16 Akhyeing" bang: gi atho' nghab loo sho' ngei yoo" nghoid loug we'
Ca" tho' moo jain" sho' byimi yoo" nghoid loug we'
17 Byu gi dayham" wigi hau: byimi joem ri void pyam byid: wa.
Houg: lho: deingmain" su: wigi hau: ngei ri yo" seing: pyam wa.
18 Akhyeing" su: yhoem: zhug nghoid loug we' phyoogang: yhoem: yhang: ti" anghoid lang"
Yoothung" zung" da" join vhoo" kung: da" zoem" khyam" yo' dakhyo" nghoid da:.
19 Lo" thang dalheing: za: nyangnu" yoo" zoo: yoo" shoug: jang" moo jhang" jo, wigi
nyangnu" boin: so" re" ri nyangnu" jonu" bei: byug ziri shau" myang goo" wa.
20 Gyoug dain ja: gi nyangnu" ri gyid je: lo ziyo' dayhang: ti" re" zang" wigi myen" ayo, mo lid gi nyangnu" ri moid tang" pyam wa.
21 Bid thu shoid mo lid gi nyangnu" ri nyangnu" yhoem: mo jhoid za: moid shoem" tang" pyam wa.
22 Nyangnu" phang: loid wa shid re" yo" bue" yhi' yoem: kaid nyid uri
hau: lid gi nheig khyeug myid aboo loo: za: nyangnu" dang moo hau' loo wa.
23 Nyangnu" tang" phang: lo" da" uri lid gi nyangnu" thang: cang wigi
phyo' shoin' da" yoem: so' gi nyangnu" ri cang kyug loo wa.