26
Yoba
1-2 Ngoo yhang: te" asho" ajhen: yoem: neing: su: ri
nang wigi yo" pang" yu wa ein: rhe".
Nang gi ngoo yhang: ti" nheig agyeing: su: ri re" lasi lajhang: yo'
houg yhi' ge da" re" phajhi" byid: wa rhe".
Re" dang: khoin" dangain" ri hang" gyoo: byid: wa ein: myid jho: la.
Hid: su" se' ji wa shid re" nang ri hang" wigi jhoin" byid: la.
Bildad
Shid: bang: da" soobyoo joem gi mougmyid khoug: mo gyid moo nain" nyid boem.
Moovo moug: gi Mangso shidkhoin" moo di: di: nyang: myang thu' jo, da:.
Hau: ziri nya: shidkhoin" moo ce: wigi we' ayo" nghoeb go too" nghoid da:.
Mangsoo gi mougzhung: shoid khyo" wigi mougkhung: ri pei: myu" kaid da:.
Houg: lho: mougmyid ri we' joyoo akoem: moo lhang" to" da:.
Jhoemmoug" thei" moo gyid kaid pyeing wigi
hau: joem lid: wigi abug shoin: gyoo" loo sho' toem' too" su: gi Mangsoo nghoid.
Nyang: gi lhammoo" leung" ri jhoemmoug" thei" khoug: moo shoung: to" da:.
10 Nyang: gi moug: coid yo' moug: boo" ri panglai: dang mo zuid zuid leung" da" akyo' yo' kho' to" da:.
11 Mougkhung: ri thug to" da" zeing bung: joem ri nyang: kyug nhain' kaid lang"
hau: joem gi gyoug wigi ko' ko' nain" nyid da:.
12 Panglai: ri oung: pyam zigi nya: da" yoem: nghoid da:.
Nya: da" lasi lajhang: wigi main jung: Rahab ri said toem" pyam da:.
13 Mougkhung: ri gyeing: gyeing: sho' pyam zigi nya: so' moid yoomo nghoid.
Houg: lho: phang: loid byug da" main: jung: ri said pyam zigi nya: lo, nghoid da:.
14 Nghoid loug we' he: gu: gi nya: da" yoem: so' mo dayham" za: danghoid ashi"
Ngoonu" shau" gyo: da" nya: da" dangso' so' zi za: danghoid.
Mangsoo khayhi' gyi: sheung: ziri tab za: hang" yo" si' wa la".