24
1 Mangsoo gi ciwim yoomo nyang: ri dei byid: bang: shid re" dang: phyed wa ayo,
Tarha" nyeung veung" da" bidnyid ri ciwim atoo" byid: lug la.
2 Byu yigi mougmyid ri je yo" yu sho' ga: mougkyoo" ri ce" da:.
Nyangnu" gi yang joem ri khau" wigi nyangnu" yang kyung khoug: moo bo kaid to" da:.
3 Nyangnu" gi coug" zoo: nu" yi seing: da" loo zei: ri lhoid yu pyam byid: wigi
Cougmoo" myhi' da" nu: ri nyang: jhen: bain xab sho' zoem: ci: da:.
4 Nyangnu" gi myung bang: yo" yu eung: da" akho: akhang" ri ayo" yu sho' jhid pyam: da:.
Houg: lho: jonu" ayoo" bang: ri tang" phang: gau" yen" wa shid re" jhoin" da:.
5 Houg: lho: myung bang: gi nyangnu" da" zooshang: yi shid re" zooshug ri gootu: moo ase' shoo: yoomo
Loo zei: lam" joem yhang: ti"
Kyug hei' da" dain" pyoid yoo moo zoo: noem sho: yen" ago".
6 Nyangnu" gi nyangnu" khyam: anghoid jang" mo shivoo: ri yhoem" yu ca" ago".
Houg: lho: akhyeing" bang: da" zabyid khyam: joem mo zabyid shi" joem ri phyo' zheing" ca" ago".
7 Myen" ayo, moo nyangnu" gi nyangnu" ngam" loug void mi ayo" zi yhoeb ago".
8 Nyangnu" gi boem joem atho' moo vo khyo' kaid da" moug: gyid wigi boeb boeb jhu' byug boem.
Houg: lho: nyangnu" gi lug pyung: gyoo: cang moug: khoug: wigi ngam" kyi" boem.
9 Akhyeing" bang: gi nya: phoo ayo" da" zooshang: yiri join koid pyam lho:
myung bang: da" zooshang: yiri ngei jhen: khyo" shoem" yu pyam da:.
10 Nghoid loug we' myung bang: gi nyangnu" gung moo loem nhang: da" byimi avoid loo: thu loo" ca" ago".
Nyangnu" sungsoo: yham" uri zoo: yoid phu" ca" da:.
11 Nyangnu" gi zhainloin: xu: pyeig lho: zabyid yhid: yoo" wa shid re" zabyid nang: nghoid loug we'
Nyangnu" nyang: gi gyid shid boem ago".
12 Voomoo" khoug: moo dam dab bang: yo' shid: lo" nyid bang: nyho: yoid nyid ago".
Nghoid loug we' Mangsoo gi nyangnu" da" akyu" mho' dang: ri gyo: lhid: pyam da:.
13 Bid bang: ri ngeug pyam bang: nyid boem.
Nyangnu" gi hau: ziri ase gyoo: wigi hau: zigi khakhyoo: shu" lo" ziri asi' nghoid ago".
14 byu said su: gi nab soin: moug: boo" zoo" moo to' lho:
Myung bang: ri said pyam wa ga: yhe: lo" da:.
Houg: lho: myen" ayo, ri nyang: khau" zo: da:.
15 Myi: shoid lang shoid su: gi moug: shoem shoem coid loo wa ziri lang" nyid da:.
Nyang: gi hang" wigi we' ashau" myang sho' nya: myonhoo: ri nghoeb ci: da:.
16 Khoug" hoeb yigi myen" ayo, moo yhoem: joem khoug: khyoo: phyo' vang yhe: ago".
Nghoid loug we' nyid" gung moo gi nyangnu" gau" nyid wigi bidbang ri jang" pyam ago".
17 Nyangnu" gi nyid" gung bidbang ri gyoug boem.
Nghoid loug we' moug: coid gi nyangnu" ri gyoug dain ja: abui" nhang: nghoid da:.
[Zopha]
18 Akhyeing" su: gi gyid ji: zoo" wigi shoem" lo" zi shoug" wa.
Houg: lho: nyang: seing: da" mougmyid joem gi Mangso da" nheing" khoin" zang" da:.
Nyang: gi nya: da" zabyid khyam: joem moo moo" ayhe: zei: loo: nghoid da:.
19 Gyu: gi bid lung yo' kyug hei' jang" moo bei: byug yhang: ti"
Yooboo yoo" bang: gi dei nyid bang: da" mougmyid dang mo bei: byug wa.
20 Akhid" nya: myhi' wigi lang" nyang: ri amyed boin loo nghoid da:.
Nyang: ri lug dung: joem wigi coem' zo: pyam lho: leung gyo" jo, da" seiggam ri yhang: ti" phyo' shoin' pyam zi shau" da:.
21 Hougsu" bue" zigi cougmoo" joem ri nyang: wigi akhyeing" ashoeb khyo" fain" zo: lho:
boug dung yiri nheig khyeug myid aci: shug byid: yoomo nghoid da:.
22 Mangsoo gi nya: yoem: so' wigi yoem: moo" boo bang: ri phyo' shoin' pyam da:.
Mangsoo dang: phyed wigi akhyeing" bang: shid: lo" da:.
23 Mangsoo gi nyang: ri goem loem tung" nyid nhang: nghoid loug we'
Nyang: ri ayo, byeung" sho' zung" yu" nyid da:.
24 Akhyeing" su: gi daso' zoo: yoo" zoo: yoo" shug da:.
Nghoid loug we' nyang: gi hau: thang: ri myo, gam yhang: ti"
Yham" phyid pyam da" shivoo: nham: yhang: ti" yhau" shoem: lo" da:.
25 Hidsu" bue" ziri hang" yo" ngeug wa la".
Nga" dang: khoin" ri ajo, ein: hang" sagse: ci: shug byid: wa la".