23
Yoba
1-2 Ngoo gi Mangsoo ri goemlu to' thougtheung myeing" myo: nyid ashi".
Ngoo noo kyeing" kyeing" ziri ayo" zeing: kham.
Nyang: ri khamoo: shoug" sho: myang wa ziri si' nau.
Nyang: nyid joyoo moo khakhyo" yhe: ziri si' nau.
Ngoo gi nga" moo" ri nya: shidkhoin" moo phuid: sho' kyo" wigi
Nga" shoid khyo" tid kyoo" nau gu: dangain" ri yo" tid kyoo" wa.
Nyang: khasu" tid wigi
ngoo ri khasu" phug tid byid: wa ga ziri ngoo si' nau da:.
Mangsoo gi nya: yoem: so' dangain" yo' ngoo ri thougtheung nyid la".
Anghoid nyang: gi ngoo tid dang: ri tam" gyoo: byid: loo wa.
Ngoo gi deungmain" da:. Ngoo gi Mangsoo yo' yo" doem goo' wa nghoid.
Nyang: gi ngoo ri yooboo ayoo" ga: da lheing: dam bain sho' tid byid: wa.
Ngoo gi bidthu shoid khyoo: sho: yu" bye:. Nghoid loug we' Mangsoo gi hougmoo anyid.
Ngoo bidvang shoid khyoo: sho: lo" uri nyang: ri ngoo amyang.
Mangsoo gi mougzhung: shoid yo' mougpyi: shoid moo moo" zei: lid loo bye:.
Nghoid loug nyang: ri ngoo ashau" myang shi".
10 Nghoid loug we' Mangsoo gi ngoo so" yhe: da" khyid: byi khang" moo" ri se' da:.
Nyang: ngoo ri joeb ca: yu" nghoid rigi ngoo gyeung" shang: ziri shau" myang wa.
11 Ngoo gi nyang: khyen: da" khyoo: moo jhug zug tung" cang yhe: da:.
Houg: lho: kha: shoid khyoo: we' aso" lam" loo.
12 Ngoo gi Mangso amyeing" dang: ri khanham we' cang pyeing nyid.
Ngoo gi nya: myid vho: khyoo: ri cang wigi ngoonya: myid vho: khyoo: ri acang.
13 Nyang: gi khanham we' myid athid. Nyang: ri hang" wigi we' ayo" ngeug thug.
Nyang: koid nau khyoo: ri koid nyid ziri hang" ayo" toem.
14 Nyang: gi nya" shid re" ga: soin' to" ziri koid pyeing" loo wa.
Hau: myid soin' to" da" zigi nya: jhang myoo" sho' jo, jang" mo daja: ja: nghoid da:.
15 Ngoo gi nya: shidkhoin" moo gyoug wigi nain" nyid.
16-17 Myhang: thang Aseing gi nga" voem" myid ri phyo' shoin' pyam bye:.
Moug coid wigi ngoo ri myo, jid nhang: rilang".
Ngoo ri gyoug nhang: zigi moug coid wigi anghoid. Hau: zigi Mangsoo nghoid da:.