21
Yoba
1-2 Ngoo tid ziri tam" gyoo: ge'
He: zigi nanu" mo ngoo mho' nau ja: dangain" nghoid.
Ngoo ri dang: tid wa akhang" shi" byid: we'.
Houg: lho: ngoo bain tid lang" nanu" nau khyo" juang" we'.
Ngoo myeing" myo: zigi se' shid: da" byu yi yo' anghoid.
Ngoo nheigloem: atho' sheing: wa khyoo: nyang: jo, da:.
Ngoo ri yu" yu" ge'
Nanu" yu" gyoug wigi zhug yu" tam" byug sho' bui" zigi agi" shi" rhe".
Ngoo moo bue" jo, ziri myid kaid lang" ngoo dain mo, byug wigi ko' ko' nain" nyid.
Mangsoo gi ciwim yoomo akhyeing" bang: ri dei nyid nhang: lho:
mang: sho' nyid wigi yoo" zoo: yoo" shug nhang: loug lha".
Nyangnu" moo nya: zoo: yi yo' nya: myid: yi yo" ago".
Houg: lho: nyangnu" dangain" nyid gyi: sho' myang kho' ago".
Mangsoo gi nyangnu" da" yhoem: moo kyi" khyeug ashau" nhang: nghoid da:.
Nyangnu" gi gyoug dain tung" khanham we' anyid noo" nghoid da:.
10 Nghoid- nyangnu" da" nu: joem dangain" nu: nu" xang" wigi
ayau: akhi" aboo loo za: khu: thu ago".
11 Nyangnu" da" zooshang: yigi yang nu" joem yhang: ti" tang" yen" wigi lhu: yen" ago".
12 Houg: lho: teing yo' khoolhang thui: khyo" cang wigi go" boem.
13 Nyangnu" gi yug yoo myen jham' tung" kangso' dei nyid wigi
ce: yau: khi" ashau" loo: myen myen za: shid: loo" ago".
14 Akhyeing" bang: gi Mangsoo ri nyang: kyeing" nyid wa shid re" tid boem.
Nyangnu" gi nyangnu" da" apyaid shid re" nyang: khasu" bui" nhang: nau ga: ziri asi' nau nghoid da:.
15 Nyangnu" gi Mangsoo ri dei byid: aca" ga: myid ago".
Nyang: ri akyu" mho' wigi ce: akyu" ayoo" ga: we' myid ago".
16 Nyangnu" gi nyangnu" da" yoem: so' wigi oung: doid zi nghoid ga: fu" boem.
Nghoid loug we' nyangnu" myid da" khyoo: ri ngoo ayo" khab yu.
17 Akhyeing" su: da" myi: bung: lhung shid: lo" lha".
Nyangnu" mo dayug yug gi yau: khi" lhung shoug" yu" la"
Mangsoo gi akhyeing" bang: ri yooboo dam lhung byid: yu" lha".
18 Houg: lho: nyangnu" ri lid wigi khoofoo: ri moid tang" pyam yhang: ti" moid tang" pyam lha".
Anghoid lang" uglid moo pheilhoug: bo lo" yhang: ti" bue" yu" lha".
19 Mangsoo gi nya: pho da" yooboo shid re" nya: zoo: ri yooboo dam byid: ga: nanu" tid boem.
Hougsu" anghoid- Yooboo thung: yi nyangnu" nyang: ri Mangsoo yooboo dam byid: baja".
Nyangnu" da" yooboo gang mo nyang: hougsu" koid ziri ci shug byid: baja".
20 Yooboo thung: yi gi nyangnu" nya: yooboo dam ri voin boem baja".
Myhang: thang Mangsoo nheig yo: ziri nyangnu" loem zoo: goo" baja".
21 Ngoonu" kangso' thang byug lang"
Nya: zoo: yi gau yi nyid boem go" la' ein: ziri nyang: myidgung yau wa la.
22 Myhang: da" joyoo moo nyid da" bang: rilang" dang: phyed su:
Mangsoo ri byu wigi yo" jhau" shid wa la".
23-24 Byu dayham" gi nyangnu" shid: da" bidnyid ju" sho' yang" zain: tung" yo" nyid da:.
Nyangnu" gi pyoo: pyoo: yo' myen myen shoug" shid: ago".
Nyangnu" da" manggung joem ri goo" lhoo' za: nyheing coung: pyam zi shau" da:.
25 Dayham" gi ngei pyo: zi dajhi' we' ashau" yu nghoid ago".
Nyangnu" gi nheigloem: kyid: kyid: kho" ziyo' kangso' dei wigi hougsu" shid: lo" ago".
26 Nghoid loug we' dangain" gi shid: lo" wigi myhoeb pyam zi shau" da:.
Nyangnu" dangain" bang: ri lugdung: joem wigi boem" pyam da:.
27 Nanu" moo khate" athoug" akhyoug: nheigloem: bo ziri ngoo se'
28 Nanu" gi ?Akhyeing" moo" ri lhung koid su: gyi: sheung: su: da" yhoem: akhid" khayoo: la"? ga: myid: ago".
29 Nanu" gi gyung: soo" bang: yo' ayhe: doem go" yu" goo" rhe"
Nyangnu" yu lo da" lu dang: joem ri nanu" asi' goo" rhe".
30 Mangsoo nheig yo: wigi yooboo dam byid: da" bidnyid moo
Khanham we' nheig se' khyeug su: gi akhyeing" ashoeb su: bue" lo da:.
31 Akhyeing" ashoeb su: ri yooboo zhug wa hang" anyid.
Nyang: koid lid lo da" moo" yoomo nyang: ri latoo: phug wa byu hang" anyid.
32 Loeb boug moo goo" lhoo' za: lhoug zung" to" da" nya: loeb khyoo: nyang: ri dang yhe: lo" uri
33 Mang dang yhe: jang" moo byu khyeing" su: bo yhe: da:.
Myid zhoo" lang" gi nya: manggung tho' moo yoo yoo za: jo, jo, da:.
34 Houg: lho: nanu" we"- nanu" gi ngoo ri ce: dang: kang: abo da" dang: khyo" wigi nheig teing byid: wa soin' ago".
Nanu" byid: da" dang: phuid: khang" moo" gi mhoug da" dang: za: nghoid da:.