20
Zopha
1-2 Yoba we"- nang gi ngoo ri myid myoo: nhang: da:. Akhid" ngoo phug tid wa ziri atho' zeing: ci: loo.
Nang tid lid lo zigi rue" zi nyang: nghoid da:.
Nghoid loug we' nang ri ngoo khasu" phug tid wa ziri se'.
Gyeing" nyang: goonham' gooco' mougmyid tho' moo
byu ri nyhid: shid" to" uri
Akhyeing" da" byu yi myang" sho' ayo" pyo: ziri nang se' da:.
Nyangnu" gi nyangnu" da" vhuloem jhoemmoug" moo zang" sho'
mougkhung: tho' khyoo: gyi: sheung: loo" nghoid loug we'
Nyangnu" ri pheilhoug: yhang: ti" moid tang" pyam zi shau" boem wa.
Nyangnu" ri lhung si' bang: gi nyangnu" khayoo: lo" byug la' ga: mau" boem wa.
Nyangnu" gi yhoebmo, yhang: ti" myen" mo yoeb myang yhang: ti" bei: lo" byug wigi khanham we' ashau" myang loo wa.
Akhyeing" bang: gi nyangnu" lhung nyid da" jo yoo mo byug lo" boem wa.
10 Houg: lho: nyangnu" wigi myung shoo" bang: jang" mo khau" yu to" da" ziri
nyangnu" da" yuggi zoo: yi wigi ge khyoo: doem koid loo goo" wa.
11 Nyangnu" gung du: joem gi coem" coem" lhung nu" lho: yoem: moo" bo da:.
Nghoid loug we' amyang" ri nyangnu" gi pheilhoug: bue" loo" wa.
12-13 Nyangnu" shid re" akhyeing" ziri ngham" thui: gyo: da:.
Houg: lho: nyangnu" gi zo: ei" wa shid re" nyangnu" da" nhoid khoug: moo kaid ci: da:.
14 Nghoid loug we' hau: zoo: noem gi nyangnu" voem: doug: khoug: moo kho" byug da:.
myoono, yhang: ti" kho" byug da:.
15 Akhyeing" su: gi nyang: khau" yu to" da" jonu" joem ri dug pyam da:.
Hau: ziri nyangnu" da" voem doug: khoug: mo lang" Mangsoo doem yu thu pyam da:.
16 Akhyeing" su: myau: pyam zigi myoono, yhang: ti" nghoid da:.
Hau: zigi dug thain: da" lhangmyu dadu: yhang: ti" nyang: ri thei" said pyam da:.
17 Nyangnu" gi zhainloin: xu: gyid lang joem ri shau" myang sho' dei nyid wa zi anghoid.
Nu: noug" yo' byoo yhid: yau da" gyid lang zoo: joem ri we' myang khoo' wa anghoid.
18 Nyangnu" gi nyangnu" moo" zei: wigi yo" yu to" da" zi dangain" ri too" khoo' ca" wa.
Nyangnu" gi nyangnu" da" jonu" myen myen zhung: zoo: wa akhang" yo" yu wa anghoid.
19 Ciwim gari nyangnu" gi zeig zo: wigi myung shoo" bang: ri cishu: anhang: koid lho:
Gootu: dayug zhug to" da" yhoem: joem ri lhoid seing: pyam byid: da:.
20 Nyangnu" mhain: zigi khanham we' nheig atho' deug nghoid da:.
21 Nyangnu" zo: uri ci: we' azo: teing too" nghoid da:.
Nghoid loug we' akhid" nya: jonu" thang byug abye:.
22 Nyangnu" oung: doid thang uri
Koug shu: da" yoovoin lid: gi nyangnu" ri khyoeb koid pyam wa.
23 Nyangnu" vho: gu: dangain" zo boem goo" baja".
Mangsoo gi nheig joem yo: nheigloem: yoin ziyo' nyangnu" ri yooboo dam byid: wa.
24 Nyangnu" joto' shamcoin" mo phang: loid wa soin' uri
gyid: mid" lid: wigi nyangnu" ri beig lheing: kaid wa.
25 Myoo: joem gi nyangnu" da" gung joem moo zang" lang"
hau: yi yi bang da" myoo: coin" gi nyangnu" da" suid" moo lhu" wigi
nyangnu" nheigloem: moo gyoug dain loo goo" wa.
26 Nyangnu" yung: to" da" zi ja: khang" moo" gi phyo' shoin' pyam zi shoug" lho:
Xangsu: byu lo, wigi tab kaid zi anghoid da" myi: gi
nyangnu" yo' nyangnu" yhoem: byu yiri nge" pyam wa.
27 Mougkhung: gi nyangnu" da" yooboo ri phuid: kyo" wigi
Mougmyid gi nyangnu" ri thougtheung da" sagse: byid: da:.
28 Nyangnu" da" jonu" dangain" gi Mangso da" nheig yo: dagyid thoem" moo phyo' shoin' pyam zi shoug" wa.
29 He: zigi akhyeing" bang: da" vhu" pi: lo, kyo' nghoid da:.
Mangso wigi nyangnu" ri kho' byid: to" da" vhu" pi: lo, kyo' nghoid da:.