19
Yoba
1-2 Ciwim yoomo nanu" gi ngoo ri dang: khoin" joem wigi shen" yhen nyid boem lha".
3 Alheing: lheing: nanu" gi ngoo ri aphoug" akhyoid cikoid lho:
nanu" wigi ngoo ri anghoid akhuang coem' koid ziri ase' sho' nghoid ago".
4 Ngoo shoid moo" koid rilang" hau: zigi nanu" ri ci noo nhang: lha".
5 Nanu" gi nga" tho' je ge ga: myid jho: ago".
Houg: lho: ngoo yau: khi" shoug" zigi nga" da" yooboo yoomo nghoid ga: jho: ago".
6 He: ziri koid su: gi Mangsoo nghoid ziri nanu" ashau" myang goo" rhe".
Nyang: wigi she' ngoo ri myhi' wa shid re" lhid thung: to" da:.
7 Nya: da" athoug" akhyoug: moo" ri ngoo ngeug pyam nghoid loug we'
hang" atam" gyoo: byid: nghoid ago".
Tarha" khyoo: yo" yu wa shid re" ngoo nyho: nghoid loug we' hang" ashau" gyoo: nghoid ago".
8 Mangso wigi khyoo: jhid to" wigi ngoo ayo" lid thu loo".
Nyang: gi nga" khyoo: moug: coid teing: no, nhang:.
9 Nyang: gi nga" jonu" dangain" ri yu pyam byid: abye:.
Houg: lho: nga" myeing gyi: khyoo: ri phyo' shoin' pyam byid: bye:.
10 Nyang: gi ngoo ri shoid khang" moo" khyo" baid da:.
Nyang: gi nga" myid byu khyoo: ri noid pyam byid: lho:
ngoo ri yhau" shid: loo" nhang: da:.
11 Mangsoo gi nheigloem: yoin wigi ngoo ri thougtheung nheig yo: da:.
Nyang: gi ngoo ri nya: da" age thang da" gyivoo yhang: ti" koid da:.
12 Nyang: gi ngoo ri khaid zain: wa shid re" gyidab dadab nhang: kaid.
Nyangnu" gi kadug khyoo" du: wigi nga" zoem" ri du: lheing to" ago".
13 Mangsoo gi nga" mang: nhung" yi wigi ngoo ri she: pyam too" goo" wa khyo" koid da:.
Ngoo gi ngoo ri si' bang: shid re" tungbau lami: bue" byug bye:.
14 Nga" bidnoem yi yo' byencang" yi byug byug bye:.
15 Nga" yhoem: moo being" voo khyo" nyid lid loo bang: gi ngoo ri to" myhid pyam abye:.
Nga" dei zoo: myiyi: nu" yigi ngoo ri being" voo yhang: ti"- tungbau yhang: ti" jho: ago".
16 Nga" dei zoo: ri ngoo yoid kaid ri nyang" atu" byid: nghoid da:.
Ngoo ri pang" yu wa shid re" mho' yoid rilang" atu" byid: nghoid da:.
17 Nga" yhoem: seing: myhi' gi nga" so' shoem: ri atho' kham: nghoid da:.
Houg: lho: nga" mang: nhung" seing: yigi nga" nam khyoo: atab' ri" nghoid da:.
18 Zooshang: yigi ngoo ri aphoug" akhyoid koid lho: nyangnu" gi ngoo ri myang lang" yi ago".
19 Ngoo yo' zoem" thang byencang" yigi ngoo ri yu" co' tung" yu" da:.
Ngoo jheddab thang da" bang: gi ngoo ri thougtheung pyam ago".
20 Nga" shooyid joem gi nga" shooyoug: joem moo tei" lhang" jo, da:.
Ngoo gi nga" kangso' yo' gung cen: loid loo bye:.
21 Nanu" gi nga" byencang" yi nghoid. Ngoo ri nheig khyeug yu ge'.
Mangso da" lo, wigi ngoo ri baid lheing: kaid bye:.
22 Nanu" gi ciwim ngoo ri Mangso wigi shen" yhen yhang: ti" yhen' go" la".
Nanu" ngoo ri coem' shen" yhen zi agi shi" goo" rhe".
23 Nga" dang: khoin" joem ri dayug yug xoem" ci: lho:
Mougsoug" pug moo lhid" xoem" too" yhoo: ein: lhung shau" myid.
24 Anghoid lang" nga" dang: khoin" joem ri apyaid atoo: duang jo, sho'
lugzeing moo lugzhen: yo' kyung" tab too" byid: yhoo: ein: shau" myid.
25 Nghoid loug we' lo" thang moo ngoo ri goem loem byid: wa su:
Mougkhung: moo nyid ziri ngoo se'
26 Nga" shooyid ri noobau: wigi zo: pyam sho' nghoid loug we'
He: gung du: dei nyid shi" uri Mangsoo ri ngoo shau" myang shi" wa.
27 Ngoo gi nyang: ri nga" myo jid" wigi nyang: shau" myang wa.
Houg: lho: nyang: gi tungbau lami: anghoid wa.
Nanu" hid su" ga: tid yoomo ngoo yoem: shoin: bye:.
28 ?Nyang: ri ngoonu" khasu" yo" shen" yhen wa la" ga: tid wigi
nanu" gi ngoo ri khaid zain: wa akhyoo" sho: nyid ago".
29 Nghoid loug we' akhid" dang: phyed zi dayug nyid ein: ziri nanu" si' wa shid re"
Yooboo adang moo Mangsoo nheig yo: zi bo da" sham: ga: da"
Shamcoin" ri gyoug ge'.