16
Yoba
1-2 Houg: yhang: ti" da" dang: khoin" joem ri shid phyang" ngoo shau" gyo: yu" bye:.
Nanu" ngoo ri nheig teing byid: zigi ngoo ri shen" yhen zi za: danghoid da:.
Nanu" gi apyaid atoo: moo xo' ji nyid shi" wa la"
Nanu" gi khanham nghoid loug dang: thang: yo" said wa la".
Nang nga" joyoo moo nyid wigi ngoo re" joyoo moo nyid nghoid rigi
Nang tid nyid dang: ngoo dangain" yo" tid wa.
Ngoo gi phajhi" boo boo za: nga" vhu" pyi: pyi: lho: nang ri dang: khoin" joem wigi yo" tid zeig pyam wa.
Ngoo gi nang ri phajhi" byid: dang: wigi nang ri yoem: boo nhang: wa.
Houg: lho: nang ri yoem: byid: dang: yo" tid wa.
Nghoid loug we' ngoo ci: ayo" pang" tid
Houg: lho: sam: zoo: tam" jo, ri we' nga" dam khe" no zi yo loo" wa zi anghoid.
Mangsoo we"- nang gi ngoo ri jhoid za: shang: pyam byid: bye:.
Nang gi nga" yhoem: byu yiri said pyam nhang: bye:.
Nang gi ngoo ri myheig yu bye:. Nang gi nga" gyivoo nghoid da:.
Ngoo gi shooyoug: moo shooyid za: dalhoem" lo.
Houg: lho: byu yigi nga" yooboo wigi hougsu" bue" ga: jho: ago".
Mangsoo nheig yo: wigi ngoo ri agang gang lang: khyam" pyam bye:.
Nyang: gi ngoo ri ngheing" ziyo' zhug yu" nyid da:.
10 Byu yigi ngoo ri yu" juang" ago".
Nyangnu" gi ngoo ri lheing khoem to" wigi nga" myonhoo: ri pyug ago".
11 Mangsoo gi ngoo ri akhyeing" bang: da" lo, khyoo: kaid pyam bye:.
12 Ngoo gi yug yo myenjham" tung" nyid lid loo nghoid loug we'
Mangsoo gi ngoo ri khyung" kang: moo myheig wigi
Baid lho: mhoin' pyam bye:.
Mangsoo gi ngoo ri thang" thi: tu wa shid re" ci: da:.
13 Myoo: joem wigi ngoo ri shoid khang" moo" khyo" beig da:.
Hau: myoo: joem ngoo ri zang" wigi dam dab nghoid loug we'
Nyang: gi nheig khyeug myid lang" aci: shug byid: nghoid da:.
14 Nyang: gi ngoo ri dam doem tab tab koid nyid da:.
Nyang: gi ngheing" da" nheigloem: byeung" jo, da" gyizoo: dayug yhang: ti" khaid zain: da:.
15 Ngoo gi koug ngau wigi jid: moo" byimi coeb ci: wigi
he: pheilhoug: boem" moo asoem" byid: zhung: jo, bye:.
16 Ngoo gi nga" myonhoo: byang: byang: ni sho' ngoug bye:.
Nga" myojid" gi yam: wigi myo, koem' youg: me: byug bye:.
17 Nghoid loug we' ngoo gi athoug" akhyoug: yooboo moo" ci: akoid.
Houg: lho: Mangsoo ri ngoo akyu" mho' da" dang: gi gyeung" shang: da:.
18  O" mougmyid we"- ngoo ri koid da" shoid moo" ri ashung: too".
tarha" deungmain" zi yo" yu wa shid re" ngoo mho' yoid thui: ri atam" loo" nhang:?
19 Nga" thang: dab wigi nga" shoid yab byid: wa mougkhung: moo dayug nyid da:.
20 Nga" byencang" yigi ngoo ri juang" ago".
Nga" myojid" mo ngoug byid joem gi Mangso jhang khyoo: foid shoin" kaid bye:.
21 Byu dayug gi bidnoem dayug shid re" bo pang" mho' yoid byid: yhang: ti"
Nga" shid re" Mangso jhang bo pang" mho' yoid byid: wa byu dayug vho: nyid.
22 Akhid" nga" zain nyid joem lid lo" nyid bye:.
Houg: lho: ngoo gi adoem yo" tau" lo da" khyoo: moo so" nyid.