14
Ngoonu" dangain" gi yoem: neing: ziyo' khu: re" lho: nghe: khoug: jang: ayoo".
Nyangnu" gi kangso' leung" lho: yau: khi" shau" da:.
Ngoonu" gi bain: joem yhang: ti" myab myab yug wigi bo" shoem: lo" byug boem.
Ngoonu" gi bid shoem: yhang: ti" lid lo" da:.
Mangsoo we"- nang ngoo ri yu" khyalang" yu" wigi
Anghoid lang" tarha" yung" moo dang: phyed wa rhe".
Byu yhang: ti" ayung" gyeing" su: mo
yung" gyeing" zi daja: we' alhung yo" thu loo nghoid da:.
Nya: da" Kangso' khasheing nghoid wa ziri no' mo ke' phyed too" byid: gu nghoid bye:.
Nyang: lhammoo" khanhoo' khyab nyid wa ziri tu' too" gu nghoid bye:.
Nang gi hau: gu moo nyid wigi age thid pyam loo nghoid da:.
Nyang: mo zi goo" khyoo: yu" kaid lho: nyang: ri kyeing" nyhid: too" we'.
Ge bue" ri nya: yau: khi" apyaid moo pyoo: pyoo: nyid nhang: we'.
Thug lheing: kaid da" seiggam shid re" myid byu jang: jo, ashi".
Hau: zigi doem joem: re" wigi anyug doem ge toid re" da:.
Hau: seig gyi: mang: yoem: byug lho:
seig nghoid gi myidgung moo shid: jo, loug we'
Hau: zigi gyid shoin" kaid lang" seig zoo: yhang: ti" anyug doem yo" toid loo nhang: da:.
10 Nghoid loug we' byu dayug shid: lo" ri hau: zigi nya: shid re" thang: thang nghoid bye:.
Nyang: shid: lo" wigi khamoo: lo" nyid la".
11 Yau theing: pyam da" gyid lang yhang: ti"- kain" byug da" gyid thoem" yhang: ti"
12 Byu shid: lo" wigi khanham we' adoem to' loo nghoid da:.
Mougkhung: dageing: teing jo, jo, gi nyangnu" adoem to' loo loo wa.
nyangnu" yhoeb jo, jang" moo khanham we' lhu: zhuang" zi ashau" loo wa.
13 Nang wigi ngoo ri moovo moug: moo yo" shoung: too" yhoo: ein: ngoo myid.
Re" nheig yoo gyoo" sho' ngoo ri shoung: too" la.
Hau: thang: ngoo ri doem myid boin: wa ayo, ri yo" so' too" byid: la.
14 Byu dayug shid: lo" ri nyang: yo' doem dei loo wa la".
Nghoid loug we' ngoo gi je ge da" ayo, ri lang" nyid wa.
He: yau: khi" ayo, lid loo" sho' lang" nyid wa.
15 Houg: lang" nang ngoo ri yoid wigi ngoo phug tid wa.
Houg: lho: nang gi nang wigi phain" so: to" da" ngoo ri nheugdeug nheugshid: loo wa.
16 Houg: lang" nang gi nga" khyid: byi khang" moo" ri zung" yu" nghoid loug we'
Nga" yooboo joem ri nang acang yu" yen" loo wa.
17 Nang gi hau: joem ri khyoid pyam byid: lho: she: lhei" pyam byid: wa.
Nang gi ngoo koid shoid lo khyoo: dangain" ziri jhoid za: shoem" pyam byid: loo wa.
18 Boem joem byo, gyoo" lo" da" ayo, ju" loo lang"
geing: teing da" lug moo" boem joem yu: lo" byug da:.
19 Lug boem ri gyid wigi doin: phoid she: loo" wa.
Houg: lho: moug: moo" vo zigi myid xu: ri pyoung" khyoid loo" wa.
Houg: yo' dayhang: ti" nang gi byu da" kangso' dei nyid wa myid byu khyoo: ri phyo' shoin' pyam da:.
20 Nang gi byu tho' yoem: je gyi: lho: nyang: ri apyaid atoo: moo khaid pyam da:.
Nya: da" myonhoo: gi shid: jang" moo nyhung: shoem: lo" da:.
21 Nya: yug gi zoo: yigi ngi: shab shoug" nghoid loug we' nyang: gi hau: ziri khanham we' asi'.
Nyangnu" khanham ngi: yoem" ein: ziri nyang: ri hang" atid kyoo".
22 Nyang: gi nya: da" gung moo no ziri za: se' wigi
Nya: nheigloem: moo koug ziri za: kham zo: da:.