13
1-2 Nang tid zi ja: khang" moo" ri shid phyang" ngoo gyo: yu" bye:.
Hau: dangain" ri ngoo se' gyoo: bye:. Nang se' gu gi ngoo we' se'.
Ngoo gi re" tho' anyhoem:.
3 Nghoid loug we ngoo gi Mangsoo yo' ngeig nyid zi nghoid- nang yo' anghoid.
Ngoo gi nga" moo" ri nyang: yo' she' da ngeug nau.
4 Nang gi nang ase' ziri mhau' da" dang: yo' shoem" boem" pyam da:.
Nang gi hang" ri we' ayo" byang" ge da" macid" sara: yo' du da:.
5 Ci: atid loo: nyid we' houg: lang" dayug yug wigi nang ri phajhi" boo nhung: ga: jhoo: goo" wa.
6 Nga" moo" ri tid nyid uri tam" gyo: yu" shi" we'.
7 Nang ciwim mhau' nyid la".
Nang mhau' tid da" dang: joem gi Mangsoo ri akyu" byid: wa ein: jho: rhe".
8 Nang gi nyang: ri khoem' wa ein: soin' nyid rhe".
Nang gi nya: moo" ri tarha" yung" moo tid ngeug wa rhe".
9 Mangso wigi nang ri tab tab mo zhug yu" nghoid rigi nyang: gi ge zi daja: ja: shau" myang wa la".
Nang gi byu yiri yo" mhau' fain" loug we' Mangsoo ri yo" mhau' fain" wa ti" myid jho: rhe".
10 Re" ung: khoug: moo yooboo xoem" shoung: ci: nghoid loug we'
Nyang: gi nang ri nheig yo: jhau" loo wa.
11 Houg: lho: nya: da" yoem: so' gi nang ri gyoug dain zi byeung" nhang: loo wa.
12 Re" dang: zhoem' joem gi myimoeb yhang: ti" ce: akyu" aboo nghoid da:.
Nang tid ngeug zigi myidzhoo" yhang: ti" nham' loo" wa.
13 Sam: zoo: tam" to" wigi ngoo ri dang: tid wa akhang" byid: we'.
Houg: lho: nyangnu" bue" ziri bui" nhang: we'.
14 Ngoo gi nga" kangso' ri ab pyam wa jen" nyid bye:.
15 Ngoo gi nga" myid byu khyoo: dangain" ri ci: phyug pyam bye:. Hougsu" yoomo Mangso wigi ngoo ri said pyam nghoid rigi ciwim wa la".
Ngoo gi nga" moo" ri nyang: jhang yhe: tid kyoo" wa.
16 Nga" voem" da" myid wigi lang" ngoo ri yo" khyoid yu abe.
Ciwim gari akhyeing" da" byu hang" we' Mangso jhang avoem" yhe: shoug" nghoid da:.
17 Akhid" ngoo phuid: kyo" da" dang: ri tam" gyoo: we'.
18 Ngoo gi nga" moo" zoo" ri tid kyoo" wa jen" jen" nghoid bye:.
19 Mangsoo we"- nang gi ngoo ri yooboo zhug wa la".
Nang yooboo zhug nghoid ri ngoo gi sam: zoo: tam" to" lho: shid: loo" wa jen" jen" nghoid bye:.
20 Ngoo eig ja: mho' wa. Hau: gu: ri myid veing" byid: la.
Houg: lang" ngoo gi nang mo aphang: gau" yen" wa.
21 Ngoo ri yooboo dam byid: zi theing: pyam lho: ngoo ri gyoug dain ziyo' akhyoeb mhoin pyam.
22 O" Mangsoo we"- nang shi" dang: ji yu" we' ngoo phug tid wa.
Anghoid lang" ngoo shi" dang: ji wa nang phug tid we'.
23 Nga" yooboo joem gi ci: nghoid la". Ngoo ci shoid lid loo bye: la"
Ngoo ri ce: yau moo" moo yooboo zhug la".
24 Nang ciwim ngoo ri jang" pyam la".
Nang gi ciwim ngoo ri gyivoo dayug yhang: ti" koid la".
25 Nang gi ngoo ri kyug nhain' wa soin' nyid la". Ngoo gi ci anghoid- seig fu' dafu' za: danghoid.
Nang gi khoofoo: dakhaid ri kyeing" khaid zain: nyid da:.
26 Nang gi ngoo ngi shi" uri koid da" moo" shid re"
Ngoo ri kyid: kyid: kho" da" khyo" yooboo zhug da:.
27 Nang gi nga" khyid: moo jangcoo" foid to" da:.
Nang gi ngoo ce" lo da" khyid: byi khang" moo" ri zung" yu" nyid da:.
Houg: lho: nga" khyid: khoo" joem ri joeb ca: yu" da:.
28 Hau: bue" da" gang mo ngoo gi seig yoem: yhang: ti" boeb lo" wigi
nhoug: wigi zo: mhoin' pyam da" adang byi: yhang: ti" moin" loo" wa.