10
1 Ngoo gi nyid ngheing" bye:
Nga" nheig khoo" yo: mho' yoid thui: ri tam" gyoo: byid: la.
2 Mangsoo we"- ngoo ri dang: aphyed byid:.
Ngoo ri tid kyoo" la. Ngoo ri yooboo zhug zi ce: sei: yoomo nghoid lha".
3 Nang hid yhi' amyen akhyoid yen' zigi jo, rhe".
Nanyang: phain" so: to" zi ge ngheing" rhe".
Houg: lho: akhyeing" bang: soin' moo" ri yi noug soem" si' yo" yi ri ge la".
4 Ngoonu" myang ziri nang myang rhe".
5 Re" apyaid gi ngoonu" apyaid yhi leung" rhe".
6 Houg ri ciwim nang gi nga" yooboo joem ri cang yu" wigi
ngoo shoid da" yooboo ja: khang" moo" ri cang sho: yen" la".
7 Ngoo yooboo ayo" ziyo'
ngoo ri hang" wigi we' re" lo, mo ayo" khyoid yu ziri nang se' da:.
8 Re" lo, wigi ngoo ri azuang koid lho: gung koid to" da:.
Houg: lho: hau: lo, wigi nyang: ngoo ri phyo' shoin' pyam da:.
9 Nang ngoo ri myidzhoo" mo koid to" ziri myid boin: we'.
Nang gi ngoo ri pheilhoug: boem" khyoo: doem baid khyoeb mhoin' pyam wa la".
10 Ngoo ri khu: myu: wa shid re" nga" phoo ri nang yoem: byid: da:.
Ngoo ri nang nga" myhi' voem: doug: khoug: moo gyi: loo nhang: da:.
11 Nang gi shoo" yau: joem yau: khyang: joem yo' nga" gung ri koid da:.
Houg: lho: shoo" yau: joem ri shoo" gyi: yo' shooyid wigi thoeb to" da:.
12 Nang gi ngoo ri kangso' yo' geing: teing da" jheddab myid kaid byid: da:.
Houg: lho: re" goin coung: akhoug: moo ngoo ri dei nyid nhang: da:.
13 Nghoid loug we' hau: ayo, dangain" gu: moo
Nang gi ngoo ri dam tab wa shid re" sam: zoo: khau" soin' to" ziri ngoo si' bye:.
14 Nang gi ngoo ri yooboo koid nghoid rigi
ngoo ri yooboo akhyoid byid: wa ga: zung" yu" lid loo bye:.
15 Ngoo yooboo shoid yo' dage" ngoo yo' re" agyoo: moo yau: bye:.
Nghoid loug we' ngoo jo zi koid ri ciwim ge zi ashau" yu la".
Ngoo gi myid myo: wigi sho' phu" bye:.
16 Ngoo oung: doid zi dayo" yu nghoid rigi
Nang gi ngoo ri khangkhyi yo' dayhang: ti" kuang pyam da:.
Ngoo ri dam yo" tab wa shid re" nang gi mau" pho" moo" koid da:.
17 Nang gi ngoo ri thougtheung wa shid re" sagse: daja: ja: khanham we' ci: da:.
Nang ngoo ri nheig yo: zigi je je gyi: lo da:.
Nang gi khaid zain: wa aseig daja: ja: ri khanham we' soin' ci: da:.
18 Mangsoo we"- nang ngoo ri ciwim khu: ri" nhang: la".
Ngoo ri hang" wigi ashau" myang shi" ri shid: eung: bye: zi nghoid.
19 Oungkhoug: mo zi loeb khyoo: dain: za: loo" wa ein: zigi
Khanham we' ajha" nyid ri gi wa zi nghoid.
20 Nga" apyaid gi alug thang lo" nyid bye: anghoid rhe". Ngoo ri kyeing" nyhid: too" we'.
Ngoo thu lo" da" ayo, akhyeing: moo ngei pyoo: tung" kham zoo: nhang: la.
21 Ngoo gi amyang" ri lo" byug wigi khanham we' adoem tau" loo loo: wa.
Teing: no, wigi moug: doeb da" moug: khyoo: loo" loo: wa.
22 Bid bang nyang: we' moug: coid bue" da" joyoo
moug: coid meing:- bid yoeb yoeb da" meing:- anhung akhoid da" meing: khyoo: loo" loo: wa.