YOHAN
LHID" FOIN: KAID DA" MOUGSOUG" DALOEM:
(1John)
Xang: shed" lheung: Yohan lhid" foin: kaid da" mougsoug" moo myid soin' to" khyoo: eig khaid bo- (1). Mougsoug" nghab' bang: ri Mangsoo yo' we' nya: zoo: Yesu Khristu yo' we' zoem" khau: kangso dei wa da" khyoo: moo yoem: byid: wa shid re" nghoid. (2). Hougsu" zoem" khau: lo" jang" moo lhu: phyo' lhu: shoin pyam byid: da" shoid vhang: khyo" jhau" byid: da" jhoug" myeing" jhoug" thui: joem ri alhoem: kham: yu baja"- lhid" zid" nhang: wa shid re" nghoid nyid.
Hau: shoid da" jhoug" myeing" jhoug" thui: joem gi akhyeing" ashoeb da" khyoo: dangain"- myojid" yo" myang da" mougmyid yo' tei" xo' jangmo bue" thu' lo da" khyoo: joem nghoid yoomo Mangso nya: zoo: Yesu Khristu gi gyeing" nyang: Xangsu: byu gung ayo" re" void yu wa ga: loem" jeing" khyoo: moo ayang: qei: lho: zheung: jhau" byid: khyoo: ri yo" se' yu.
Hau: khyoo: ri jhau" byid: da" sara yi tid khyoo: gi khyoid yu ein: da" zigi he: da" mougmyid tho' moo zoo: wa shug wa nyid wa khyoo: moo myid yug: myid ci jang" mo- loid byoin, loo" nhang: wa shid re" nghoid ga: wigi we' khyoid khyu: yu ein: da" khyoo: gi aved, asam" da" tarha" khyoo:- jheddab da" tarha" khyoo: yo' ci" we' asen:- ga: wigi we' jhau" byid: nyid boem. Houg: te" bang: da" tid ngeug kyo' pyam khyo" wigi mougsoug" lhid" su: gi Yesu Khristu gi xangsu: byu gyeing" nyang: re" bue" yu" bye:- khyoo: ri bang bang tid kyo" nyid. Hau: tho' moo gootu: Yesu Khristu ri loem" jeing" wigi Mangsoo ri jheddab mo, dangain" bang: gi nyang: cang" nyang: we' jheddab goo" ca" da" khyoo: ri gyi" sho' jhau" byid: nyid.
1
1 Xangshid" mo nyid nyid bye: da" hau" kangso dei da" mungdang: khyoo: ri nanu" jhang khyoo: ngoonu" lhid" kaid boem. Ngoonu" gi hau: ziri shau" gyo: yu" boem bye:- myojid" yo' we' myang yu" boem bye:- nghoid- ngoonu" myang yu" boem bye: yoomo ngoonu" da" lo, wigi we' shau" tain" yu boem bye:.
2 Hau: da" kangso gi thu' myhang, lo da" uri ngoonu" hau: ziri myang yu" boem bye:- houg: yoomo nanu" gi hau: khyoo: ri sagsi kham byid: boem bye:. Nya: phoo' yo' dage" nyid yu" bye:- hau: apyaid ato: da" kangso gi ngoonu" jhang moo thu' lo wigi ngoonu" gi hau" kangso da" khyoo: nanu" ri sho' kyo" boem bye:.
3 Ngoonu" gi nya: phoo' Mangsoo yo' we' nya: zoo: Yesu Khristu yo' we' zoem" khau: nyid boem zi nghoid boem zi nghoid wigi nanu" we' ngoonu" yo' dage" shau" zoem" khau: nyid boem goo" baja" ein: ngoonu" myang yu" gyo: yu" bye: da" khyoo: nanu" ri tid fu" kyo" zi nghoid.
4 Ngoonu" gi nanu" moo gau yi nheigdeig: khyoo: joeb, byeung" lo boem baja" ein: he mougsoug" ri lhid" kaid boem zi nghoid nyid.
5 Mangsoo gi bidbang nghoid ziyo' nyang: moo mougcoid ci" we' aboo. He: mungdang: ri nya: zoo: khyo" wigi ngoonu" shau" gyo: yu boem bye: yoomo nanu" ri tid fu" kyo" zi nghoid.
6 Ngoonu" gi nyang: yo' shau" zoem" khau: nyid bye:- ga: lho: wigi mougcoid khoug: moo kangso dadei so" yen" shi" nghoid boem rigi ngoonu" tid da" dang: moo we' ngoonu" zei nyid da" moozoo" moo we' mhoug mo, ngoonu" danghoid nyid boem shi.
7 Nghoid loug- nyang: gi bidbang moo nyid nyid yhang: ti" ngoonu" we' bidbang moo kangso dei so" yen" boem nghoid rigi ngoonu" dayug yo' dayug nyang: cang" zoem" khau: nyid mo, nghoid boem ziyo' nya: zoo: Yesu da" suid" gi ngoonu" mo yau: noo yooboo dangain" ziri yo" cid" yung" cid" shang: pyam byid: bye:.
8 Ngoonu" moo yooboo ayoo" ein: tid nyid boem nghoid rigi ngoonu" nyang: nya: da" gung ri ngoonu" mhau' pyam mo, nghoid wigi deingmain" khyoo: aboo mo, ngoonu" nghoid nyid boem.
9 Nghoid loug we' ngoonu" da" yooboo joem ri Mangso shid moo toin" shid yhen: yu mho' mho' sang: boem nghoid rigi nyang: gi nya: da" dangsoo" khoin" ri ci: lho: wigi deingmain" da" moo" ri zei: nyid su: nghoid ziyo' dakhyoo" ti" ngoonu" da" yooboo ri khyoid pyam byid: wa ziyo' shoid vhang: peug rhue lo" khyoo: dangain" jangmo cid" khyoid cid" shang: yu byid: wa zi nghoid.
10 Ngoonu" gi yooboo akoid loo: ein: tid boem nghoid rigi ngoonu" gi Mangsoo ri mhoug su: nghoid ein: jho: khyo" nghoid wigi nya: mungdang: we' ngoonu" moo aboo loo.