63
1 Edom mung" moo jo, da" Bozra voomoo" mo re" nyid su: gi hang" nghoid la". Pain" ni yo' gye" reung: sho' shoung: void ci: lho: nya: yoem: so' yo' yoem: moo" yo' re" nyid su: gi hang" nghoid lha".
Khyoid yu wa yoem: so' bo ziyo' nya: oung: doid khyoo: tid fu" wa re" nyid su: gi Aseing nghoid.
2 Zabyid yhid: koid wa shid re" zabyid shi" ri nang: su: yhang: ti" nya: byimi ciwim houg: yhi' ne lha".
3 Aseing phug tid zigi ?Ngoo gi byumyu" yiri zabyid shi" ri yhang: ti" nang: uri hang" we' ngoo ri are" pang" nghoid ago". Ngoo gi nyangnu" ri nga" nheig joem: yo: jang" moo nang: joeb pyam' wigi nyangnu" da" suid" gi nga" byimi moo zain gyoin: da:.
4 Nga" byumyu" yiri khyoid yu wa ngoo myid phyed to" da" ayo, ju" loo bye:. Hau: zigi nyangnu" gyivoo yiri yooboo dam byid: da" ayo, nghoid da:.
5 Ngoo yu" kaid ri ngoo ri bo pang" thoug byid: wa hang" anyid ziri myang lang" ngoo moug" byug da:. Nghoid loug we' nga" nheig yo: zigi ngoo ri yoem: boo nhang: wigi ngoo oung: doid zi yo" yu bye:.
6 Ngoo nheig yo: yoomo byumyu" yi dangain" ri nang: joeb pyam' wigi nyangnu" ri nang: pye" pyam' da:. Ngoo gi nyangnu" da" kangso' suid" ri myidgung khyoo: foid khyo' pyam' byid: bye:? ga: tu" da:.
7 Ngoo gi Aseing da" abei: abyo, da" jheddab myid khyoo: ri tid kyoo" wa.
Nyang: ngoonu" ri koid byid: bye: da" lo, moo" dangain" gang mo nyang: ri coung" wa.
Nya: nheig khyeug myid yo' geing: teing da" Jheddab myid yoomo
Nyang: gi Israela byumyu" yiri myoo" sho' mainkaid byid: da:.
8 Aseing gi ?Nyangnu" gi nga" byumyu" yi nghoid- nyangnu" ngoo ri amhoug boem goo" wa? ga: tid. Houg: lho: nyang: gi nyangnu" ri
9 Nyangnu" da" kyi" khyeug yau: khi" dangain" mo khyoid yu bye:. Hau: zigi moug: lagyoo: dayug anghoid. Nghoid loug we' nyangnu" ri khyoid yu su: gi Aseing nyang: nyang: nghoid da:. Nya: jheddab myid yo' nheig khyeug myid mo nyang: nyangnu" ri khyoid yu bye:. Nyang: gi lid: lo da" ayo, moo khanham we' nyangnu" ri goin coung: byid: lo da:.
10 Nghoid loug we' nyangnu" gi thougtheung gyi koid boem wigi nya: gyeung" shang: da" Venyi: ri nheig koug nhang: ago". Houg: yoomo Aseing nyangnu" da" gyivoo bue" re" wigi nyangnu" ri gyi koid da:.
11 Nghoid loug we' nyangnu" gi Aseing da" dei zoo: Moshe da" pyaid- lid: lo da" ayo, ri doem myid boin: wigi ?Nya: byumyu" yi da" vhujhung: yiri panglai: mo khyoid yu da" su: Aseing gi akhid" khayoo: nghoid lha". Moshe ri nya: Venyi: byid: su: nghoid da" Aseing gi akhid" khayoo: nghoid lha".
12-13 Nya: shid re" apyaid atoo: moo myeing gyi: wa shid re" pang: lai gyid ri kho' pyam' wigi nya: byumyu" yiri noug" da" gyid khyo" shu" lo wigi nya: yoem: so' ri ci: lho: Moshe khyo" gyi: sheung: da" moo" joem ri koid su: Aseing gi khayoo: nghoid lha"? ga: myid: ago".
Aseing wigi shu" yoomo nyangnu" ri myang: lam" joem khyid: yhang: ti" geing: teing wigi khanham we' athung" leung nghoid ago".
14 Nu: joem gi myid xu: ge da" lang: khung" khyoo: shu" yhe: loo" shau" boem ziyo' dayhang: ti" Aseing gi nya: byu yiri dougnoo: nhang: da:. Nya: byumyu" yiri nyang: shu" vhu" she: wigi nya: myeing ri ngi: shab byid: da:.
15 Aseing we"- re" gyeung" shang: ziyo' phung" yoeb moo nang nyid nyid da" joyoo mougkhung: mo wigi ngoonu" ri yu" byid: la. Ngoonu" shid re" re" da" gyi: sheung: myid gi khayoo: nghoid la". Re" yoem: so' gi khayoo: nghoid la". Re" da" jheddab myid yo' nheig khyeug myid gi khayoo: nghoid la". Ngoonu" ri cishu: anhang: akoid.
16 Nang gi ngoonu" da" nya: phoo nghoid. Ngoonu" da" phoug" phyid" Abraham yo' Yaku gi khanham we' khyoid yu su: ngoonu" nya: phoo nghoid da:.
17 Re" khyoo: mo ngoonu" ri ciwim vhang: nhang: lha". Ngoonu" nang mo phug loo" sho' ciwim yoomo ngoonu" ri gye" nheigloem: thain: nhang: lha". Nang ri dei byid: boem da" bang: yoomo we' khanham we' re" byumyu" nghoid lo boem da" bang: yoomo we' lheing: tau" loo we'.
18 Re" da" gyeung" shang: byu nghoid da" ngoonu" gi ngoonu" da" gyivoo yi wigi daso' zoo: khaid thu pyam' zi shau" lo" boem bye:. Nyangnu" gi re" da" gyeung" shang: joyoo ri nang: nhe" pyam' ago".
19 Nang gi ngoonu" da" vhu" shi: su: khanham we' anghoid yu" su: yhang: ti" ngoonu" gi re" byumyu" yi khanham we' abue" yu" bang: yhang: ti" ngoonu" ri koid da:.