60
1 Yerusalem we" too' we' bidbang yhang: ti" bang we'.
Aseing da" phung" yoeb gi re" adang moo bang nyid da:.
2 Gootu: byumyu" yigi moug: coid wigi nghoeb to" zi shau" ago".
Nghoid loug we' re" adang moo gi Aseing da" bidbang bang loo wa.
Nya: shid koin" mo bang zigi nang yo' dage" nghoid wa.
3 Byumyu" yigi re" bidbang shoid khyoo: she: yu zi shau" wa.
Houglho: khokham yigi re" bidnyid seig da" moug: boo" zoo" khyoo: re" loo goo" wa.
4 Re" ayam aqei: khyoo: yu" lho: cibue" nyid ziri yu" we'.
Re" byumyu" yigi yhoem: khyoo: loo wa shid re" zeing: foem: nyid ago".
Re" yuggi zoo: yigi vi: mo ju" loo ri" wa.
Re" myiyi: zoo: yigi zooshang: ri yhang: ti" bau: lo zi shau" goo" wa.
5 Nang gi he: ziri shau" myang lang" gau yi ziyo' byeung" loo wa.
Nang gi gau lho: ko' ko' nain" loo wa.
Byumyu" yi da" jonu" joem gi re" jhang ci: lo zi shau" goo" wa.
Panglai dashoid mo nyangnu" jonu" joem ju" lo boem goo" wa.
6 Midian yo' Epha mo Gola-ug too: tho' da" phung: moo" zeing ju" lo boem goo" wa.
Nyangnu" gi Sheba mo sheing: yo' shoem: nam pyo: xu: voin wigi ju" lo boem wa.
Byumyu" yigi Aseing koid bye: da" khyoo: lu dang: gi ri tid loo goo" wa.
7 Kedara yo' Nebaiod yang joem dangain" gi
Xoin" khyo" re" jhang khyoo: ci: re" boem goo" wa.
Houg lho: Aseing ri vho: ngei nhang: wa shid re" phoin: dang moo ngei" byid: loo wa.
Aseing gi nya: Noku Yhoem: Moo" ri goonham' mo tho' je wigi phung" yoeb bang nhang: loo wa.
8 Pheing" kyoug" joem yhoem: khyoo: lo" nyid yhang: ti"
Hau: gyid sangphoo joem gi jhoemmoug" thei" yhang: ti" cikoid thei" do, lo boem la".
9 Hau: gyid sangphoo joem gi ve: da" mungdain: mo
Aseing byumyu" yiri yhoem: khyoo: shu" lo nyid zi nghoid.
Nya: byumyu" yiri byumyu" mungdain: dangain" ngi: shab byid: nhang: da"
Israela da" gyeung" shang: da" Mangsoo
Aseing myeing ri ngi: shab byid: wa.
Nyangnu" gi ngei sheing: yo' dage" thu lo da:.
10 Aseing gi Yerusalem ri tid
?Tungbau byu yigi re" vang joem ri doem zhug loo goo" wa.
Houg lho: nyangnu" khokham gi nanu" ri dei byid: loo goo" wa.
Ngoo nheig yo: wigi nanu" ri ngoo yooboo dam byid: bye:.
Nghoid loug we' akhid" ngoo gi nang ri myonhoo: byid: ziyo' nheig khyeug nheig myen: zi ci: shug byid: wa.
11 Byumyu" mungdain: joem da" khokham yi
Nyangnu" jonu" ri re" jhang yo" voin loo wa shid re"
re" khoem" joem ri myen" ri nyid" ri phang too" ca" loo wa.
12 Nghoid loug we' nang ri adei byid: da" byumyu" yigi
Bain sho' phyo' shoin' pyam' zi shau" loo goo" wa.
13 ?Yerusalem nang ri doem zhug wa shid re"
Nga" Noku Yhoem: Moo" ri yung" sho' koid wa shid re"
Nga" voomoo" ri phung" boo sho' koid wa shid re"
Shithang: thi"- junipa: thi"- goin: thi"-
Lebanon seig yoo mo ge thang da" seig thi" joem ri tho' lo boem goo" wa.
14 Nanu" ri zeig zoo: boem bang: da" amyed ashen yigi nanu" jhang re" lho:
Nyangnu" da" phau" myang: khyoo: ri ci: shug wa shid re" goeb pid loo goo" wa.
Goonham' nanu" ri aphoug" akhyoid koid bang: dangain" nanu" khyid: yang: moo noku loo goo" wa.
Nyangnu" gi nang ri ?Aseing da" voomoo"? ?Israela da" gyeung" shang: Mangso da" voomoo"- Ziun? ga: myheing loo goo" wa.
15 Nang ri she: pyam' too" kho' ziyo' ngheing" da" voomoo"
phang: cau" to" kho' ziyo' jham" coug: youg bue" jo, da" voomoo" anghoid loo wa.
Ngoo gi nang ri reung: ziyo' yung" sho' koid wa.
Apyaid atoo: moo ngei pyo: da" joyoo koid wa.
16 Nya: myhi' wigi nya: zoo: ri coung: ziyo' dayhang: ti"
Byumyu" yi yo' khokham yigi nang ri goin coung: loo goo" wa.
Ngoo Aseing gi nang ri khyoid yu wigi
Israela da" yoem: bo Mangso wigi nang ri lhoid pyoin kaid ziri nang se' loo wa.
17 ?Ngoo gi nang ri gyid: mid" gungthid sheing:-
Jo, to' yo' seig gungthid ngei yo' gyid: mid"-
Lug boem gungthid joto' ri ci: loo byid: wa.
Nang vhoeb da" bang: gi nang ri azeig zoo: loo wa.
Ngoo gi nyangnu" ri tarha" deungmain" lho: ngei pyo: yug yo ziyo' vhoeb nhang: wa.
18 Pyi: sho: da" thui: joem ri ashoug" gyoo: loo wa zi anghoid.
Phyo' shoin' ziri re" mungdain: ri adoem khyoeb mhoin' pyam' loo wa.
Ngoo gi nang ri vang yhang: ti" goem loem ziyo' gyi goo byid: wa.
Nang ri ngoo khyoid yu bye: yoomo nang ngoo ri coung" nghei loo wa.
19 ?Nyid" mo bid we' re" bidbang anghoid loo: wa.
Houg lho: myen" mo lhammoo" zho: zi we' re" bidbang anghoid loo: wa.
Ngoo Aseing gi apyaid atoo: moo re" bidbang nghoid wa.
Nga" phung" yoeb bidbang gi re" adang moo zhoo: byid: nyid wa.
20 Re" gyoug ngau da" bidnyid joem gi thang lo" byug wa.
Ngoo Aseing gi re" apyaid atoo: bidbang nghoid wigi
Bid yo' lhammoo" tho' je myang jo, jo, wa.
21 Re" byumyu" yigi jo ziri koid loo goo" wa.
Houg lho: mungdain: ri apyaid atoo: moo yo" seing: yu boem wa.
Dangain" bang: ri nga" gyi: sheung: khyoo: ri ci: shug byid: wa shid re"
Ngoo nyangnu" ri sho" too" bye:. Nyangnu" ri phain" too" bye:.
22 Re" nge thang ziyo' nyhoem: thang da" yhoem: ikoin deungkhu: lang"
Yoem: bo da" byumyu" yhi' gyi: sheung: loo goo" wa.
Ge da" ayo, gi ju" loo lang"
Ngoo gi he: ziri myab za: bue" loo nhang: wa.
Ngoo gi Aseing nghoid? ga: tid.