56
1 Aseing gi nya: byumyu" yiri ?Deungmain" ziyo' jo ziri koid we'. Ciwim gari amyang" ri ngoo nanu" ri khyoid yu wa.
2 Dougno: Bidnyid ri khanham we' cang nyid bang: yo' hau: ziri anghoid da" khyo" akoid bang: ri ngoo mainkaid byid: wa. Akhyeing" da" moo" ci: we' akoid bang: ri ngoo mainkaid byid: wa? ga: zi nghoid.
3 Aseing da" byumyu" yi yo' xo' tei" bye: da" tungbau byu dayug gi ?Aseing gi nya: byu yi yo' ngoo ri dage" noku wa akhang" abyid: nghoid da? ga: tid wa aeung: nghoid da:.
Unug dayug gi nyang: zooshang: age khu: myhu: loo: yoomo nyang: gi khanham we' Mangso byu yi moo age boo ga: khanham we' age myid nghoid da:.
4 Aseing gi houg yhang: te" da" su: ri ?Dougno: Bidnyid ri cang nyid da" khyo" wigi ngoo ri ngi: shab byid:- ngoo ri vho: ngei nhang: da" moo" ri zei: wigi nga" dang: theing ri jhug zug tung" cang nghoid rigi
5 re" myeing gi nga" Noku Yhoem: Moo" moo xoem" to" zi shau" wigi nang gi yuggi zoo: myiyi: zoo: yi yo" da" tho' nga" byu yi phung: moo je myang" nyid wa. Nang gi to" myhid pyam zi khanham we' ashau" wa? ga: tid da:.
6 Houg: lho: Aseing gi nya: byu yi moo boo bye: da" tungbau byu yi nghoid da" nyang: ri jheddab lho: dei byid: bang:- Dougno: Bidnyid ri cang bang:- nya: dang: theing ri jhug zug cang nyid bang: ri
7 ?Ngoo gi nanu" ri nga" gyeung" shang: bouggung Ziun khyoo: shu" yhe: wigi nga" akyu" mho' yhoem: moo nanu" ri ngei pyo: khyoo: byid: wa. Houg: lho: nga" phoin: adang moo nanu" ngei" byid: da" xoin" joem ri khab yu byid: wa. Nga" Noku Yhoem: Moo" gi byumyu" dangain" da" akyu" mho' yhoem: ga: myheing loo goo" wa? ga: tid da:.
8 Nya: byumyu" yiri pyoung" she: lo" jang" mo yhoem: khyoo: shu" loo su: Myhang: thang Aseing gi houg: bang: yo' xo' tei" wa shid re" nyang: gi byumyu" gootu: ri we' shu" loo wa? ga: da" khyoo: ri dangsoo" byid: to" da:.
9 Aseing gi tungbau byumyu" yiri siyoo gougnyhoug lam" joem yo' dakhyoo" ju" re" wigi nya: byu yiri re" zo: pyam goo" wa shid re" tid too" bye:.
10 Nyang: gi ?Nga" byumyu" yiri tid poin" byid: wa ein: jho: da" vhujhung: yigi myo, jid yi nghoid ago". Nyangnu" ci: we' asi' nghoid ago". Nyangnu" gi agyab lho: zung" yu" nyid da" lakhuid" yo' du. Houg bang: gi yhoeb jo, wigi yhoebmo, za: mo, nyid. Nyangnu" yhoeb so' za: kho' ago".
11 Nyangnu" gi khanham we' atho' tham: da" mhain: da" lakhuid" yo' du da:. He: vhujhung: yigi se' gyo: khyoo: ajo, nghoid da:. Nyangnu" mo yugkhang" moo" gi nyang: vho: ngei ziri koid wigi nyang: nya: akyu" shid re" za: sho: ago".
12 Hau: yhid: ya: yigi zabyid yhid: dajhi shoug" shug lang" ?Ngoonu" gyi: sho' shug shang. Nab yo nyid" gi akhid" tho' lang" je gi wa? ga: tid ago".