51
Aseing tid zigi
?Khyoid yu shoug" noug bang:
Pang" thug zi mho' wa ju" ri" bang: nanu" we" nga" dang: tam" gyoo: ge'.
Nanu" re" lo da" lug pyo'
Nanu" du: yu da" lug khyung: ri myid boin: ge'.
Nanu" phoug" Phyid" Abraham yo'
nanu" ri khu: myhu: kaid da" Sara ri myid boin: ge'.
Abraham ri ngoo khe: uri nyang: gi zooshang: ayoo" shi" nghoid da:.
Nghoid loug we' ngoo gi nyang: ri mainkaid byid: lho: nyang: ri zoo yi du yi byid: bye:.
Ngoo gi nya: amyed ashen yiri gye" myoo: nhang: bye:.
 
?Ngoo gi Yerusalem yo'
nya: da" byo, yoin" jo, jang" moo nyid boem da" bang: dangain" ri nheig khyeug myid ci: shug byid: wa.
Nya: mungdain: gi dain" pyoid yoo nghoid loug we'
ngoo gi hau: ziri ngoo koid to" da Eden khyam: yhang: ti" da" khyam: ri koid pyam wa.
Gau yi ngei pyo: zigi houg moo jo, loo wa.
Jeju" coung" jikhoin" joem khoin" lho: ngoo ri jeju" boin: loo goo" wa.
 
Nga" byu yi we"- nga" dang: ri tam" gyoo: ge'.
Ngoo tid ziri tam" gyoo: we'.
Ngoo gi byumyu" yiri nga" jhau" shid khyoo: byid: bye:.
Nga" tarha" joem gi nyangnu" ri bidbang byid: loo wa.
Ngoo gi myab ju" re" wigi nyangnu" ri khyoid yu wa.
Nga" oung: doid zigi jhang re" abye:.
Byumyu" yi adang moo ngoo wigi vhoeb wa.
Ve: da" mungdain: joem gi ngoo ju" loo wa ziri lang" nyid ago".
Nyangnu" gi nyangnu" khyoid yu wa myid byu ziyo' ngoo ri lang" nyid boem.
Mougkhung: khyoo: nghang yu" kaid ge'. Mougmyid khyoo: goeb yu" kaid ge'.
Mougkhung: gi myikhoug" yhang: ti" bei: byug wa.
Mougmyid gi byimi xoug" yhang: ti" yoem: lo" byug wa.
Nya: byu dangain" gi yangkhung" joem yo' dakhyoo" ti" shid: lo" byug wa.
Nghoid loug we' ngoo ci: lo da" khyoid yu zigi apyaid atoo: moo deing jo, wa.
Nga" oungdoid zigi lo" thang moo nghoid wa.
 
Jo ziri se' da" bang:
nga" jhau" shid khyoo: ri nanu" nheigloem: khoug: moo kaid too" bye: bang: nanu" we"- nga" dang: ri tam" gyoo: ge'.
Byu yi nanu" ri juang" lho: rue" boem uri agyug goo".
Nyangnu" gi nhoug: wigi zo: pyam da" byimi yhang: ti" moin" byug loo" goo" wa.
Nghoid loug we' ngoo ci: re" da" khyoid yu zigi apyaid atoo: moo deing jo, wa.
Nga" oung: doid zigi apyaid atoo: geing: teing jo, loo wa? ga: zi nghoid.
 
Aseing we"- too' we' ngoonu" ri pang" thoug byid: we'.
Re" yoem: so' ri ci: wigi ngoonu" ri khyoid yu la.
Hau: ziri goonham' ci: lo yhang: ti" ci: we'.
Panglai: main jung: Rahab ri adu du koid pyam su: gi nang nghoid da:.
10 Panglai: ri kain" hei' loo" nhang: su: we' nang nghoid da:.
Khyoid yu shoug" bang: yo" lid: phyid loo" goo" wa shid re"
gyid khyo" khyoo: phang byid: su we' nang nghoid.
11 Nang wigi khyoid yu too" bang: gi
Yerusalem khyoo: ngei: pyo: ziyo' jikhoin" khoin" ziyo' gau wigi nyho: zoo" ri ju" loo" goo" wa.
Nyangnu" gi apyaid atoo: moo ngei pyo: loo goo" wa.
Apyaid atoo: moo nheig koug ziyo' koug ngau zi loid byoin loo goo" wa.
 
12 Aseing tid zigi
?Nang ri yoem: boo nhang: su: gi ngoo nghoid.
Myo, gam tho' mo jain" sho' ayo" zeing: kham da"
Shid: se' da" byu ri ciwim gyoug la".
13 Nang ri phain" so: too" su:
mougkhung: ri pyo: nghoeb too" su:
mougmyid da" apoem: ayang: ri zhug too" su: Aseing ri nang to" myhid pyam bye: la".
Nang ri zeig zoo: bang: da" nheig joem: yo: zi
nang ri phyo' shoin' pyam wa jen" jen" nghoid
mo, ri byeing abyid nang ciwim gyoug nyid la".
Nyangnu" da" nheig joem: yo: zigi nang ri ayo" tain" goo" wa.
14 Thung: byu yigi amyang" ri nhang: kaid zi shau" boem wa.
Nyangnu" kang: sheing: sho' dei nyid boem goo" wa.
Houg: lho: nyangnu" moo ca" da" zoo: noem dangain" yo" loo goo" wa.
 
15 Ngoo gi nanu" Aseing Mangsoo nghoid.
Panglai: ri ngoo lhu: zhang" kaid wigi
hau: da" being: lhoung" ri myeing nhang: da:.
Nga" myeing gi myhang: thang Aseing ga: zi nghoid.
16 Mougkhung: ri ngoo pyo: nghoeb wigi
mougmyid da" apoem: ayang: ri zhug to" da:.
Ngoo gi Yerusalem ri ?Nang gi nga" byumyu" nghoid.
Nga" jhau" shid khyoo: ngoo nang ri byid: too" bye:.
Houg: lho: nga" lo, wigi ngoo nang ri goem loem byid: bye:? ein: zi nghoid.
17 Yerusalem we"- boin: to' loo we'.
Nanya: gung ri nhoug" lho: too' we'.
Nang ri shug wa byid: da"
Aseing nya: nheig yo: da"
Yooboo dam byid: khu ri nang shug abye:.
Nang hau ziri shug khyo' kaid lho:
apyi: akam" so" leung yen" nhang: bye:.
18 Nang ri shu" wa hang" anyid
Re" byumyu" yi phung: moo
nang ri lo wigi shu" shi: wa hang" anyid.
 
19 Kyi" khyeug yau: khi" eig zhang re" adang moo gyo" zang" abye:.
Re" mungdain: gi meing: zain: pui" wigi jham" coug: youg bui" byug bye:.
Re" byumyu" yigi zooyoid abye:.
Nang ri nheig khyeug myid ci: shug byid: wa hang" anyid.
20 Khyoo: khaid khang" moo" da"
khyoo: jhoin: moo re" byu yi gi yoem: neing: wigi yhau" leung lo" ago".
Nyangnu" gi shoo" sho: su: da" goin moo myi" da" shoocid: yhang: ti" nghoid ago".
Nyangnu" gi Mangso nheig yo da" yoem: so' ri kham: zo: boem abye:.
 
21 Yhid: yed bang: yo' dakhyoo" ti"- apyi: akam" so" baid leung yen" bang:
Yau: khi" kyi" khyeug kham zo: nyid boem da" Yerusalem byu yi nanu" we"
22 Nanu" Aseing Mangsoo gi nanu" ri goem loem byid: wigi
?Ngoo nheig yo: wigi nanu" ri byid: to" da" khu ri ngoo yu pyam nyid bye:.
Nanu" ri apyi: akam" bui" nhang: da" zabyid yhid: ri nanu" ashug ca" loo: wa.
23 Ngoo gi hau: ziri nanu" ri doin: zeig zoo: bang:
Fu" moo" khyoo: moo nanu" ri leung gyoo" loo" nhang: bang:
nanu" ri pheilhoug: yhang: ti" nang: nhe" pyam bang: ri byid: wa? ga: zi nghoid.