45
1 Aseing gi Kuru ri khokham koid wa shid re" khyen: to" abye:.
Byumyu" yiri oung: pyam wa shid re" nyang: ri khyen: too" bye:.
Khokham yiri nyangnu" da" yoem: so' ri yu pyam byid: wa shid re" nyang: ri nhang: kaid da:.
Aseing gi nya: shid re" voomoo" joem da" khoem" moo" duang: joem ri phang byid: wa. Kuru ri Aseing tid zigi
2 ?Re" khyoo: ri ngoo nyang: nyheing byid: wa.
Boem yo' bouggung joem ri tam: byid: wa.
Gyid: mid" khoem" moo" joem ri ngoo baid khyau" pyam wigi
hau: joem mo joto' khoem" kyang joem ri baid khyau" mhoin' pyam wa.
3 Ceug no, da" nyhoem" shoung: joyoo mo jonu" joem ngoo nang ri byid: wa.
Houg: lang" ngoo gi Aseing nghoid wigi
Israela da" Mangsoo gi myeing lang: wigi nang ri khe: to' ziri nang se' loo wa.
4 Ngoo wigi khyen: sain' to" da" byumyu"
nga" dei zoo: Israela ri pang" thoug byid: wa shid re" ngoo nang ri sain' to" zi nghoid.
Nang ngoo ri asi' nghoid loug we'
ngoo gi nang ri gyi" sho' ngi: shab byid: bye:.
5 ?Ngoo gi Aseing nghoid- yu phara" gootu: anyid loo
nang ngoo ri asi' nghoid loug we'
nang ca" da" yoem: nang ri byid: wa.
6 Mougmyid thang sho' mo yugkhang" moo" gi
ngoo Aseing nghoid ziri si' wa shid re" yo'
yu phara" gootu: anyid ziri si' wa shid re"
he: ziri ngoo koid zi nghoid.
7 Ngoo gi bidbang yo' moug: coid eig ja: goin" ziri phain" so: to".
Ngoo gi mainkaid jeju" yo' kyi" khyeug eig ja: goin" ziri byid: su: nghoid.
ngoo Aseing gi he: gu: dangain" ri koid su: nghoid.
8 Moug: vo yhang: ti" oung: doid ziri mougkhung: mo ngoo nhang: kaid byid: wa.
Mougmyid gi hau: ziri kham yu wa shid re" phang byid: loo wa.
Houg: lho: loid byoin ziyo' tarha" deing byeung" zigi bue" thu loo wa.
Ngoo Aseing gi he: ziri bui" nhang: wa.
9 Zhoonhau: oug" gi oug" koid su: ri ngeug wigi oug" gootu: dangain" yo' dakhyoo" ti" za: nghoid ein: voem" ngeug wa la".
Zhoonhau: gi oug" koid su: ri nang cikoid nyid la" ein: yo myid: la".
Oug gi oug" koid su: ri nang asi' ajhang: nghoid da ein: yo" myeing" myo: la".
10 ?Re" tang: ciwim yoomo ngoo ri hid su" khu: to" boem la"?
ein: nya: myhi' phoo ri hang" dayug yo" tid boem la".
11 Israela da" Aseing gyeung" shang: da" Mangsoo
ju" loo wa da" ayo, ri alhoo: sue" too" su: tid zigi
?Nang gi nga" zooshang: yi khyoo: yo' sen: wigi ngoo ri dang: myid: myid: wa akhang" ayoo".
Ngoo khasu" koid ca" ein: ngoo ri tid wa akhang" ayoo".
12 Ngoo gi mougmyid ri phain" so: to" lho:
houg moo nyid wa xangsu: byu yiri phain" too" su: nghoid.
Nga" yoem: so' khyo" wigi mougkhung: ri nghoeb to" wigi
bid- lhammoo"- kyi: joem ri ngoo khang" nyid.
13 Nga" myid too" jang: ri zei: pyeing wa yo' jo da" moo" ri bui" nhang: wa shid re"
Kuru ri moo" zei wa lhu: zhang" su: gi ngoo nyang: nghoid.
Ngoo gi nyang: so" lo" khyoo: khaid khang" moo" ri khyoo: dangain" koid pyam byid: wa.
Nyang: gi nga" voomoo" Yerusalem ri doem tam: wigi
thung: lhung to" da" nga" byu yiri lhoidpyoin' kaid byid: loo wa.
He: ziri koid wa shid re" nyang: ri hang" we alhung:- khougvhoid we' hang" abyid:?
myhang: thang Aseing tid to" da:.
14 Aseing gi Israela ri
?Egutu yo' Etiopi da" jonu" gi re" da" zi nghoid loo wa.
Seba da" byusheing: yigi re" join yi nghoid loo goo" wa.
Houg: bang: gi jangcoo" void wigi re" thang: cang loo wa.
Nyangnu" nang ri goeb pid wigi
?Mangsoo gi nang yo' dage" nyid da:. Nyang: dayug za: Mangsoo nghoid o"? ga: yhen: yu loo goo" wa.
15 Nya: byumyu" ri khyoid yu da" Israela da" Mangsoo gi
nyang: nya: gung ri zau" too" su: nghoid da:.
16 Phara" soolhoo: joem ri koid bang: dangain" gi sho' phu" loo goo" wa.
Nyangnu" dangain" bang: gi ngi: yoem" loo goo" wa.
17 Nghoid loug we' Israela ri Aseing wigi khyoid yu zi shau" da:.
Israela da" oung: doid zigi apyaid atoo: moo deing jo, wa.
Israela byumyu" yigi khanham we' ngi: yoem' zi ashoug" wa.
18 Aseing gi mougkhung: ri phain" so: to" da:.
Nyang: gi Mangsoo nghoid da:.
Nyang: gi mougmyid ri azuang koid lho: phain" so: to" da:.
Nyang: gi hau: zi teing sho' koid lho: jo, jo, nhang: da:.
Nyang: gi hau ziri jham" coug: youg akoid pyam nghoid da:.
Nghoid loug we' byu yi shid re" nyid wa joyoo koid byid: da:.
Nyang: tid zigi ?Ngoo gi Aseing nghoid. Gootu: Mangsoo anyid.
19 Ngoo gi dang: zoug" tid su: anghoid.
Ngoo myid too" jang: ri we' anyhoem" too.
Jham" coug: youg da" joyoo moo ngoo ri shoo: wa shid re"
Israela byu yiri ngoo amho'.
Ngoo gi Aseing nghoid wigi deingmain" da" dang: ri tid
jo, ziri ngoo tid fu" da ga: tid su: nghoid? ga: tid.
20 Aseing tid zigi
?Khosen mungdain: gyoo" lo" byug uri nyid deing bang: dangain" nghoid da"
byumyu" yi we"- zeing: lo boem ge'.
Tarha" joeb yu" khyo" nanu" nya: gung ri yhe: ci: shug byid: we'.
Byu yigi seig wigi koid da" nyangnu" yu phara" soolhoo: joem yo' jen shug yen" lho:
nyangnu" ri ayo" khyoid yu da" yu phara" joem ri akyu" mho' ago".
Hau: byu yigi ci: we' asi' goo" nghoid da:.
21 Nanu" da" moo" ri tarha" yung" moo re" tid we'.
Yooboo voin shau" bang: gi nyang: cang" nyang: sham: goo" baja".
Bue" ri" wa ga: shid phyang" lapi: pe: su: hang" nghoid la".
Nya: byu yiri khyoid yu su: gi ngoo Aseing Mangsoo anghoid rhe".
Mangsoo gootu: anyid.
22 ?Mougmyid tho' mo byu yi we"- akhid" nga" jhang" lheing: lo wigi khyoid yu khyoo: ri kham: yu ge'.
Ngoo dayug za: Mangsoo nghoid.
23 Nga" dang: soo" gi deingmain" da:.
Hau: zigi thid loo" shoug" wa zi anghoid.
Dangain" ri ngo wigi geing: teing dangsoo" koid to" zi nghoid.
Yugkhang" moo" gi nga" shidkhoin" moo re" lho: poid thug re" thug wigi
ngoo ri jhug zug wa jham' re" tang: goo" wa.
24 ?Ngoo dayug khyo" wigi za: oung: doid ziyo' yoem so' ri yo" shau" myang ziri
nyangnu" tid lo goo" wa.
Nghoid loug we' ngoo ri ngheing" bang: dangain" gi xoo: sho' ngi: yoem' zi shau" boem goo" wa.
25 Ngoo Aseing ri Yaku da" amyed ashen yi dangain" ri khyoid yu wa wigi
nyangnu" ngoo ri coung" nghei byid: loo goo" wa.