43
1 Israela we' nang ri phain" so: to" da" Aseing tid zigi
?Agyug- ngoo nang ri khyoid yu wa.
Ngoo gi nang ri myeing lang: wigi khe: too" bye:- nang gi ngoo seing: zi nghoid.
2 Nang gyid thoem" no, khyo" so" lid: lo" uri ngoo nang yo' dage" nghoid wa.
re" da" yau: khi" gi nang ri aoung: pyam wa.
Nang myi: khyo" so" lid: lo" uri nang angi" wa.
Yau da" jham" yu" khyoo: ju" lo ri nang ri dam atab wa.
3 Ciwim ga ri ngoo gi re" Aseing Mangsoo
nang ri khyoid yu su: Israela da" gyeung" shang: Mangsoo nghoid.
Nang ri loid byoin nhang: wa shid re" ngoo gi Egutu ri ab pyam wa.
ngoo gi Etiopi yo' Seba ri ab pyam wa.
4 Re" kangso' ri khyoid yu wa shid re" ngoo gi byumyu" yi dangain" ri ab pyam wa.
Ciwim gari nang gi nga" shid re" phoug" dab da:.
Ciwim gari ngoo nang ri jheddab lho: nang ri ngi: shab byid: wa.
5 Agyug- ngoo nang yo' dage" nghoid.
Ve: da" bidthu shoid mo yo' ve: thang da" bidbang shoid mo
ngoo gi re" byu yiri yhoem: khyoo: shu" loo wa.
6 Ngoo gi mougzhung: we"- houg: bang: ri nhang: kaid byid: we'.
Mougpyi: we"- houg: bang: ri atoem' too" ein: tid wa.
Nga" byu yiri ve: da" mungdain joem mo
mougmyid khyi khang" moo" mo thu loo nhang: wa.
7 Nyangnu" gi nga" byu yi nghoid.
Nga" phung" yoeb ri bang nhang: wa shid re" ngoo nyangnu" ri phain" to" zi nghoid? ga: tid.
8 Mangsoo tid zigi
?Nga" byumyu" yiri tarha" yung" khyoo: zheing" yu bye:.
Nyangnu" gi myojid" dab nghoid loug we' yang nu" myo, jid, nghoid ago".
nyangnu" gi nukhyab dab nghoid loug we' nyangnu" nujid, nghoid ago".
9 Tarha" joeb yu" wa shid re" byumyu" yiri zheing" yu we'.
Nyangnu" yu phara" joem mo kha: yug gi ju" loo wa ayo, khyoo: ri Lapi: pe: la".
Houg: bang: mo khayug gi akhid" bue" nyid ziri lapi: yo" pe: la"
Nyangnu" jo ziri sagse: ci: shug wa shid re" nyangnu" dang: khoin" deungmain" ziri sagse: yo" ci shug byid: wa shid re"
he: phara" joem ri nyangnu" da" sagse: joem ri shu" ri" nhang: wa.
10 Israela byumyu" yi we"- nanu" gi nga" sagse: nghoid ago".
Ngoo gi nang ri nga" dei zoo: khyo" khyen: yu bye:.
Houg: lang" nang ngoo ri se wigi loem" jeing" wa ziyo'
ngoo dayug kyeing" Mangsoo nghoid ziri se' gyoo: wa shid re" nghoid.
Ngoo mo lid wigi yu phara" gootu: anyid.
Khanham we anyid yu" khanham we' nyid zi anghoid.
11 ?Ngoo dayug za: Aseing nghoid.
Nang ri yo" khyoid yu su: ngoo dayug za: nghoid.
12 Cibui" wa ziri ngoo lapi: pi: byid: wigi
nang ri ngoo pang" thoug wa shid re" re" loo bye:.
Tungbau yu phara" khasu: we' he: ziri khanham we' akoid yu" nghoid ago".
Nang gi nga" sagse: nghoid da:.
13 Ngoo gi Mangsoo nghoid wigi khanham we' nghoid nyid wa.
Nga" yoem so' mo hang" dayug we' ayo" phang: loid nghoid da:.
Ngoo koid ziri hang" we' ayo" thid pyam nghoid da? ga: tid da:.
14 Israela da" gyeung" shang: da" Mangsoo- nang ri khyoid yu da" su: Aseing tid zigi
?Nang ri khyoid yu wa shid re" Babelon ri gyi koid wa gyidab da loem: ngoo nhang: kaid wa.
Ngoo gi voomoo" khoem" moo" duang: joem ri phyo' khyo' pyam wa.
Hougmoo nyid da" byu yi nyhoo: thui: ri kyi: ngoug thui: bue" loo nhang: wa.
15 Ngoo gi re" Aseing gyeung" shang: da" Mangsoo nghoid.
Israela we"- ngoo gi nang ri phain" so: too" su: nghoid wigi ngoo gi re" khokham nghoid? ga: tid.
16 Goonham' Aseing gi panglai: khyo" lid: phyid lo" da" khyoodeing koid da:.
Gyid lheing joem khyo" kho' lid: lo" da" khyoodeing koid da:.
17 Nyang: gi phyo' shoin' pyam' wa shid re" gyid dab moo"
gyi myang: rheing" dab yo' myang: joem ri shu" vhu" she: da:.
Nyangnu" gi leung gyoo" khare" wigi khanham we atoo' nghoid da:.
Myikug myiyham: ri yo' dakhyoo" ti" moid said pyam da:.
18 Nghoid loug we' Aseing tid zigi
?Lai lo da" ayo, moo bue" da" khyoo: joem moo nheig atei" goo".
Goonham' bue" lid: loo bye: akhyoo" dang moo nghe: wigi anyid goo".
19 Ngoo koid wa nghoid da" moo" aseig ri zung" yu" we'.
Hau: zigi bue" re" nyid abye:- nanu" hau: ziri akhid" yo" myang abye: go".
Ngoo gi dain" pyoid yoo khyo" kho' lid: lo" da" khyoodeing ri koid wa.
Hougmoo ngoo nanu" ri gyid zoo: gyung: joem yau byid: nhang: wa.
20 Ngoo khyen: yu to" da" byumyu" yi gyid byid: wa shid re"
dain" pyoid yo moo ngo wigi gyid gyung: joem ri yau nhang: lang"
Siyoo gougnyhoug lam" joem lang" gi ngoo ri ngi: shab loo goo" wa.
Khuidkoo" joem yo' ngho' Gola-ug joem gi ngoo ri coung" nghei re" boem wa.
21 Nyang: gi ngoonya: shid re" phain" so: to" da" nga" byu yi nghoid ago".
Nyangnu" gi ngoo ri coung" nghei jikhoin" khoin" lo goo" wa? ga: tid.
22 Aseing tid zigi
?Nghoid loug we' Israela we"- nang gi ngoo ri he: pyam wigi
nang ngoo ri anoku nghoid da:.
23 Nang gi ngoo ri re" da" yang nghe' ngei" xoin" aci: ri" nghoid da:.
re" da" xoin" joem yo' ngoo ri ngi: ashab byid: nghoid da:.
Ngoo gi nang ri xoin" joem byid: wa mho' wigi yoovoin lid: avoin nhang:-
shoem: nam pyo: ja: mho' wigi nang ri ngoo amyung: nhang:.
24 Nga" shid re" nang shoem: nam pyo: ja: aqei byid:.
Anghoid lang" re" da" gougnyhoug joem da" xu: wigi we' ngoo ri nheig adeig nhang:
Houg gungthid re" yooboo joem wigi ngoo ri yoovoin lid: nhang: da:.
Nang shoid da" moo" joem wigi ngoo ri myung doug nhang: lo da:.
25 Nghoid loug we' ngoo gi re" yooboo joem ri khyoid byid: da" su: Mangsoo: nghoid.
Ngoo ga: su: nghoid yoomo he: ziri ngoo koid da:.
Ngoo gi re" yooboo joem ri thougtheung zei: ci: wa zi anghoid.
26 Ngoonu" tarha" yung" khyoo: yhi: shang- nanu" da" yooboo zhug da" khyoo: ri ci: ri" we'.
Nanu" jo da" shoid moo nghoid ziri sagse: ci: shug byid wa shid re" nanu" da" moo" ri tid shid yu" ge'.
27 Shid phyang" xang: shi" mo nanu" da" phoug" phyid" yi yooboo shoid lo ago".
Nanu" da" vhujhung: yigi ngoo ri thougtheung yooboo shoid lo ago".
28 Nanu" da" vhujhung: yigi nga" gyeung" shang: joyoo ri ayung" alho' koid pyam ago".
Hougsu" yoomo ngoo gi: Israela adang moo byo, yoin' zi bui" nhang: wigi
Ngoo gi: ngoonya: byumyu" ri aphoug" akhyoid rue" zi shoug" nhang: wa? ga: tid.