30
Aseing tid to" da:. ?Yuda ri vhoeb da" bang: gi joem: abye: go". Ciwim gari nyangnu" ngoo ri gyi koid thougtheung ago". Ngo wigi asoin' to" da" moo" ri nyangnu" cang koid ago". Ngoo myid vho: ziri ngeug wigi myid veing" mougsoug" joem ri lo, xoem" lhid" ago". Yooboo daja: bain daja: daboem dazang koid to" ago". Nga" phajhi" byid: dang: ri amho' loo: pang" thoug byid: wa shid re" Egutu khyoo: nyangnu" yhe: ago". Nyangnu" gi Egutu byu yi wigi nyangnu" ri goem loem byid: wa zi vho: ago". Houg: yoomo nyangnu" gi Egutu khokham ri khau: nghe: ago". Nghoid loug we' khokham gi nyangnu" ri pang" thoug wa yoem: aboo wa. Egutu da" goem loem byid: zigi yau: khe" kyi" khyeug jang" mo thang loo wa. Nyangnu" da" lagyoo zeing joem gi Egutu voomoo" mo Zoan yo' Hane moo ju" jo, sho' nghoid loug we' Yuda byu yigi nyangnu" ri pang" thoug wa myid byu nyid uri du" pyam byid: da" byumyu"- loem age" da" byumyu" yiri nyangnu" khau: nghe: lo ziri nheig koug loo goo" wa? ga: Aseing tid.
He: zigi mougpyi: shoid dain" pyoid yoo mo gougnyhoug joem yo' sen: da" Mangso da" mungdang: nghoid da:. Hau: zigi ?Lagyoo: zeing yigi gyoug ci' ca" da" mungdain: ri jang: sho' so" yen" ago". Houg moo khang khyi joem dug thain: da" lhangmyu joem dang: yen" da" mainjung: joem nyid ago". Nyangnu" gi pang" thoug khyoo: ce: daja: we ayo" byid: da" byumyu" shid re" phoug" dab da" jhungshug joem ri loo zei: yo' gola-ug doo: moo nyangnu" soin' voin ago". Egutu byid: da" pang" thoug khyoo: gi ce: akyu" aboo nghoid da:. Houg: yoomo ngoo gi Egutu ri ?Ce: dam adab da" mainjung:? ein: myeing zoo: myheing byid: bye: ga: zi nghoid.
Nyangnu" gi khayhi' akhyeing" da" bang: nghoid boem khyoo: ri khanham we' lhid" xoem" bue" jo, wa shid re" nyangnu" cite" da" byumyu" yi nghoid boem da" khyoo: ri mougsoug" pug dapug moo lhid" too" wa shid re" Mangsoo gi ngoo ri tid da:. Nyangnu" gi khanham we' Mangsoo ri gyi koid thougtheung ago". Khanham we' mhau' ago". Khanham we' Aseing da" jhau" shed khyoo: ri tam" gyoo: wa he: ngeug pyam ago". 10 Nyangnu" gi Lapi: yiri sam: zoo: nyid wa tid ago". Nyangnu" gi ?Jo da" khyoo: ri ngoonu" ri atid goo". Ngoonu" gyoo: nau ja: ri tid kyoo" ge'. Ngoonu" myid jho: da" khyoo: joem moo xo' nyid nhang: we'. 11 Ngoonu" da" khyoo: ri shu' ge'. Ngoonu" da" khyoo: ri axau' too". Nanu" da" Israela da" gyeung" shang: Mangso da" khyoo: ri ngoonu" anau gyoo ga: tid ago".
12 Nghoid loug we' he: zigi Israela da" gyeung" shang: Mangso tid da" dang: nghoid da:. Hau: zigi ?Nanu" gi ngoo tid da" dang: ri ce: shu: anhang: lho: pyijoem: sho: wigi mhau fain" ziri khau: nghe: ago". 13 Nanu" gi yooboo yo" ago". Nanu" gi myhang: lho: gyam: khoo: duang da" vang khyam: yo' du ago". Nanu" gi nyeigdain tung" gyau: lheung gyoeb loo goo? wa. 14 Nanu" gi myigyu: jen" koid: yu wa yhi' da" oug" cu' aboo loo: sho' gyid thung" mo gyid yo" khu" pyam wa yhi' da" oug" cu' aboo loo: sho' dam xoo: sho' go, mhoin' byug da" zhoonhau: oug" yhang: ti" nghoid wa? ga: zi nghoid.
15 Israela da" gyi: sheung: gyeung" shang: da" Aseing Mangsoo gi nya: byumyu" yiri ?Tau" lo wigi sam: za: ngoo ri khau: nghe: goola. Houg: lang" nanu" gi yoem: bo wigi goem loem khyoo: yo" yu goo" wa? ga: tid da:. Nghoid loug we' hau: ziri koid wa nanu" ngeug he: pyam ago". 16 Hau: gungthid myab da" myang: joem ri zhung: wigi nyangnu" da" gyivoo yi lo, mo phang: loid wa nanu" soin' boem ago". Nanu" jo ago". Phang: loid khyoo: gi nanu" koid ca" da" moo" nghoid boem wa. Nanu" da" myang: gi gye" myab ga: jho: ago". Nghoid loug we' nanu" ri cang khaid bang: gi je myab loo wa. 17 Gyivo gyizoo: dayug ri nanu" shau" myang boem lang" nanu" dakhyeing" yug gi tang" phang: loo" goo? wa. Gyizoo wim: yug gi nanu" dangain" ri tang" phang: loo" sho' yo" koid boem wa. Boug gung tho' mo dungkhoin: zeing mo lid wigi nanu" gyidab moo ci adeing wa. 18 Nghoid loug we' Aseing gi nanu" ri nheig khyeug yu wa shid re" lang" nyid wa. Nyang: gi khanham we' jo zi koid yoomo nanu" ri nheig khyeug yu wa jen" jen" nghoid da:. Aseing ri khau: nghe: bang: gi ngei pyo: ago".
19 Yerusalem moo nyid boem da" byumyu" yi nanu" gi khanham we' akug ngau loo goo? wa. Aseing gi nheig khyeug myid boo su: nghoid yoomo pang" thoug yu wa nanu" mho' yoid lo uri nyang: nanu" ri tu" byid: wa. 20 Aseing gi nanu" ri yau: khi" da" ayo, joem khyo" so" lid: nhang: wa. Nghoid loug we' nyang: nyang: gi nanu" ri jhau" shid wa shid re" houg moo nyid nyid wa. Nanu" nyang: ri shoo: aca" loo wa. 21 Nanu" lo, yoo lo, kung" shoid khyoo: khyoo: vhang: vhang: lo" boem ri nanu" nungthang mo ?Khyoo: moo" hid khyoo: nghoid. He: khyoo: khyo" cang ge'? ga: tid da" nya: thui: ri nanu" shau" gyo: loo goo? wa. 22 Ngei yo' sheing: wigi thoeb to" da" nanu" da" yu phara" soolhoo: joem ri nanu" yu wigi ?Tho"- ngoo amyang jang khyoo:? ga: nyho: wigi anyhoin: athung" ziri yhang: ti" she: lhei" pyam goo" wa. 23 Nanu" da" myoug: shi" joem ri sain" kaid khang" mo"- hau: joem ri yug nhang: wa shid re" Aseing gi moug: voo nhang: wigi myoo" sho' yhoem" yu nhang: wa. Nanu" da" gougnyhoug joem gi coung" yoo agoin agoo" yoo" wa. 24 Nanu" yoothung" ri phug da" nujung loo: yo' loo zei: joem gi ge thang da" mhain" shoug" zoo: wa. 25 Nanu" da" gyivoo yi da" gyidab joem seing: yu shau" wigi nyangnu" byu yiri said pyam shau" da" bidnyid moo boem khang" moo"- bouggung khang" moo" mo gyid gyung: zoo: joem yau: thu loo wa. 26 Lhammoo" gi bid yhi' bang loo wa. Bid gi nyhed nyid zho: zi danyid" za: zho: yhang: ti" goonham' zho: da" tho' nyhed zhang je zho: loo wa. Nya: byumyu" ri nyang: tab to" da" dam khoo: joem ri Aseing bacu' thoeb byid: wigi byang" byid: uri he: gu: dangain" bue" loo wa nghoid da:.
27 Aseing da" yoem: so' yo' phung" yoeb gi vi: mo yo" shau" myang da:. Myi: yo' myikhoug" gi nyang: nheig yo: ziri ci: shug byid: da:. Nyang: dang: tid wigi nyang: dang: khoin" gi myi: yhang: ti" nge" da:. 28 Ja: khang" moo" ri pyoung" she: lo" byug da" gyid khyoid yhang: ti" nyang: gi nya: shidkhoin" moo lid ri nhang: kaid da:. Hau: zigi byumyu" yiri byo, yoin" loo" nhang: lho: nyangnu" da" akhyeing" da" myid soin' khyoo: joem ri thang loo" nhang: da:. 29 Nghoid loug we' Mangso byu nanu" gi gyeung" shang: da" pui" myen" ri nanu" koid boem ziyo' dayhang: ti" ngei pyo: wigi jihkoin" khoin" loo wa. Nyangnu" gi Israela da" gyi zung" su: nghoid da" Aseing da" Noku Yhoem: Moo" khyoo: khoolhang thui: ri cang wigi so" yhe: loo" bang: yhi' pyo: da:.
30 Aseing gi yugkhang" moo" ri nya: phung" bo dang: ri shau" gyo: nhang: lho: nyang: nheig joem: yo: da" yoem: ri kham zoo: nhang: loo wa. Hau: zigi myiyham:- dalheing: dam vo da" moug:- leig voo khyo'- moug: moo" vo loo wa. 31 Asuri byu yigi Aseing da" thui: ri shoug" gyo: wigi nyangnu" da" yooboo dam yoem: ri shoug" kham zo: boem lang" gyoug dain boem goo' wa. 32 Aseing wigi nyangnu" ri alheing: lheing: doem baid baid koid zigi nya: byumyu" yi zeing joem yo' teing joem ri baid myheing yhang: ti" nghoid loo goo" wa. Mangsoo nyang: wigi nyang: Asuri ri meing: zain: loo wa. 33 Goonham mo Asuri khosen ri nghi wa da" khyoem' moo" myi: dajo, yoo ri soin' to" da:. Hau: zigi no, wigi gyi: da:. Houg: lho: thang" myhang: sho' zuang to" da:. Hau: ziri nghe' pyam wa shid re" Aseing gi myiyham: ri moid thu kaid loo wa.