25
1 Aseing we" nang gi nga" Mangsoo nghoid.
Ngoo gi nang ri ngi: shab byid: wigi re" myeing ri coung" byid: wa.
Nang gi mau" pho" moo" joem ri koid abye:.
Goonham' mo nang soin' to" ziri
jhug zug tung" nang koid abye:.
2 Nang gi voomoo" joem ri byo, yoin" loo" nhang: lho:
Gyidab voomoo" joem ri phyo' shoin' pyam abye:.
Ngoonu" gyivoo ri koid da" khokham kho" joem gi
apyaid atoo: moo bei: byug abye:.
3 Yoem: so' bo da" byumyu" yigi nang ri coung" nghei loo wa.
Anau akhyoid koid da" byumyu" yi da" voomoo" joem moo nang gyoug phoug" byid: zi shau" loo wa.
4 Myung bang: yo' asho" ajhen: bang: gi re" jhang phang: re" abye:.
Yau: khi" shau" da" ayo, moo goem loem zi shau" abye: go".
Uglid ri phang: khoug: wa shid re" joyoo nyangnu" ri nang byid: abye:.
Nge" lung jang" mo khoug: wa shid re" bid shoem: byid: bye:.
Anau akhyoid koid da" byu yigi ngam" yo, mo uglid yo' dayhang: ti'
5 moug: kyug mo kyug hei' ziyo' dayhang: ti" khaid zain: da:.
Nghoid loug we' nang Aseing gi ngoonu" da" gyivoo yiri tam" loo" nhang: da:.
Bid lung nyid" mo ngam" da" jhoemmoug" thei" yo' dayhang: ti"
anoug akhyoid koid bang: da" nyho: phoug: thui: ri nang tam" loo" nhang: da:.
6 Myhang: thang Aseing gi mougmyid dang mo byumyu" dangain" shid re" zoo: noem gi zabyid yhid: gi yo' he: Ziun boem tho' moo zooshug pui" zeing daloem: soin' too" wa.
7 Hid: moo nyang: gi byumyu" dangain" adang mo nghoeb to" da" nheig koug da" jhoemmoug" pung ri yu pyam byid: wa.
8 Gyi sheing: da" Aseing gi shid: ziri apyaid atoo: mo phyo' shoin' pyam wa. Nyang: gi yugkhang" mo" da" ngoug byid joem ri soid pyam byid: lho: mougmyid goin" mo nya: byumyu" yi kham zo: lo da" ngi: yoem" ziri yu pyam byid: wa. Aseing nyang: tid bye:.
9 Hougsu" bui" lang" yugkhang" moo" gi ?Nyang: gi ngoonu" Mangsoo nghoid. Ngoonu" nyang: ri loem khau: nyid lho: nyang: ngoonu" ri khyoid yu abye:. Nyang: gi Aseing nghoid. Nyang: ri ngoonu" loem khau: nyid wigi akhid" ngoonu" ngei pyo: nyid gau yi nyid. Ciwim gari nyang: ngoonu" ri khyoid yu abye:? ga: tid loo goo" wa.
10 Aseing gi Ziun boem ri goem loem byid: loo wa. Nghoid loug we' Moba byu yigi nu: khyid" moo khoofoo: ri nang nhe" pyam ziyo' dayhang: ti" nang: nhe" pyam zi shau" boem wa.
11 Nyangnu" gi gyid shab shab soin yhang: ti" nyangnu" lo, ri yhoin" kaid loo wa. Nghoid loug we' Mangsoo gi nyangnu" ri doin: nhoeb pyam wigi nyangnu" lo, joem gi asho" ajhen: noeb loo" goo" wa.
12 Nyang: gi Moba da" gyidab voomoo" joem ri houg joem da" myhang: da" vang joem yo' dage" phyo' shoin' pyam wigi hau: joem ri pheilhoug: boem" khyoo: leung gyoo" loo" nhang: wa.