2
Apyaid Atoo: Ngei Pyo: Yug Yo Khyoo:
(Mik 4:1-3)
He: zigi Yuda mung" yo' Yerusalem yo' sen: wigi Amoz da" yuggi zoo: Esaia ri Mangso wigi byid: da" mungdang: nghoid da:. Ju" loo wa da" ayo, moo:
Noku yhoem: moo" jo, da" boem gi
dangain" jang" mo myhang: thang nghoid wigi
bouggung dangain" da" adang moo myhang: thang bue" nyid wa.
Mungdain: myoo: sho' gi houg khyoo: jhen: re" wigi
nyangnu" da" mung" byu yigi
?Ngoonu" gi Aseing da" bouggung khyoo: do, lo" lho:
Israela Mangso da" Noku Yhoem: Moo" khyoo: do loo" shang
Nyang: ngoonu" ri jhau" shed loo wa.
Nyang: khyen: to" da" khyoo: moo ngoonu" so" loo wa.
Ciwim gari Aseing da" jhau" shid khyoo: gi Yerusalem moo ju" re" lho:
Nyang: gi nya: byumyu" yiri Ziun mo dang: tid nyid. Nyang: gi gyi: sheung: da" byumyu" yi agyoo: moo tid ngeug ziri tid veing" byid: wa. Nyangnu" shamcoin" joem ri khoin? baid lho:
Nyangnu" lham: toid joem ri sham: thoo" baid yu goo" wa.
Byumyu" yigi khanham we meing: adoem zain: loo: wa.
Meing: zain: pa: shid re" khanham we? adoem soin' loo: wa.
Akhid"- Yaku da" amyed ashen yi we"- Aseing wigi ngoonu" ri byid: to" da" bidbang moo so" nyid shang.
O" Mangsoo we"- Re" byumyu" yi nghoid da" Yaku da" amyed ashen yiri nang she: pyam pyam abye:. Mungdain: gi bidthu shoid mo yo' Philisti mung" mo fa" da" moo" byeung" jo, da:. Byumyu" yigi tungbau byu yi da" thung" ri: joem ri cang boem abye: go". Nyangnu" mungdain: gi ngei yo' sheing: byeung" jo, lho: nyangnu" jonu" atho' thang nghoid da:. Nyangnu" mungdain: gi myang: joem byeung" nyid lho: nyangnu" myang: rheing" joem athang nghoid ago". Nyangnu" mungdain: gi yu phara" soolhoo: byeung" sho' jo, da:. Houg: lho: nyangnu" lo, wigi koid to" da" zi joem ri nyangnu" noku coung" ago".
Yugkhang" moo" gi nyhoem: khyo' pyam ziyo' sho' phu" zi shoug" loo goo" wa. Aseing we" nyangnu" ri yooboo akhyoid byid: o".
10 Nyangnu" gi Aseing da" nheig joem: yo: jang" mo nya: da" yoem: so' mo yo' nya: da" phung" yoeb mo phang: loid wa shid re" bouggung lugpyo' yoin" mo lug khyung: cang anghoid lang" myidgung moo duang: du: lho: gau" nyid boem wa nghoid. 11 Xangsu: byu yi nghoid boin: zigi thang lo" lho: xangsu: byu yi nheigloem: myhang: zi byo, yoin" loo" wa ayo, ju" loo wa. Houg: lang" Aseing dayug za: ngi: shab byid: zi shoug" wa. 12 Hau: bidnyid moo myhang: thang da" Aseing gi yoem: so' boo mo, nghoid boin: lho: phau: mo, yugkhang" moo" ri nyhoem: khyo' pyam wa. 13 Nyang: gi Lebanon mo myhang: da" shamu gam joem ri yo' Bashan mung" mo shookhi" gam dangain" ri thug khyo' pyam wa. 14 Nyang: gi myhang: da" boem joem bouggung joem 15 myhang: da" gyi pyuzung joem yo' gyidab vang joem ri tam' pyam wa.
16 Gyi: thang ziyo' yung" thang da" gyid sangphoo joem rilang" noeb loo" nhang: wa. 17-18 Xangsu: byu yi nghoid boin: zigi thang lo" byug wa. Xangsu: byu yi nheigloem: myhang: zigi phyo' shoin' pyam zi shoug" wa. Soolhoo: joem gi bain sho' byug byug wa. Hau: bidnyid moo Aseing dayug za: ngi: shab byid: zi shoug" wa.
19 Myid gung ri lhu nhoin' wa nyang: ju" ri" lang" nyangnu" gi Aseing da" nheig joem: yo: jang" mo nya: da" yoem: so' mo yo' nyang: da" phung" yoeb mo phang: loid wa shid re" bouggung lug pyo' yoin" mo lug khyung: cang anghoid lang" myidgung moo duang: du: lho gau" nyid boem wa zi nghoid. 20 Hau: bidnyid ju" loo lang" nyangnu" koid ci: da" ngei yo' sheing: yu phara" soolhoo: joem ri nyangnu" she: pyam pyam wa. Hau: joem ri gyu, shoug" yo' pho shid joem jang" khyo: she: pyam pyam wa. 21 Mougmyid ri re" nhoin' wa shid re" Aseing ju" re" uri nya: nheig joem yo: jang mo yo' nya: yoem: so' yo' phung" yoeb joem mo phang: gau" loid byoin: wa shid re" bouggung lug pyo' yoin" mo lug ug yo' lug khyung: cang gau" nyid boem wa.
22 Shid: se' da" byu yiri amyed loem loo: goo"- nyangnu" ci phoug" dab ago" la".