15
He: zigi Moba shid re" mungdang: nghoid. Ara yo' Kira voomoo" joem gi damyen ri za: phyo' shoin' pyam zi shoug" ago". Houg: lho: Moba mung" gi jham" coug: youg bue" byug da:. Phoin: yhoem: ri shoem" wa shid re" Dibon byu yigi bouggung khyoo: do, yhe: ago". Moba byu yigi Nebo yo' Medeba voomoo" joem shid re koug ngau nyid ago". Nyangnu" vhuloem yo' nhoid mei: joem ri koug wigi yug pyam ago". Fu" moo" khyoo: moo nyid bang: gi jid moo" byimi joem void ago". Voomoo" khoug: byu phung: jang: moo yo' yhoemkhung: tho' mo byu yigi koug ngau ago". Heshbon yo' Eleale byu yi nyho: ngau nyid wigi nyangnu" da" ngau thui: gi Yahaza fi' mo shau" gyo: da:. Gyizoo: yi lang" ko' ko' nain" ago". Nyangnu" da" yoem gyau: byug abye:. Nga" nheigloem: gi Moba shid re" nyho: ngau da:. Byu yigi Zora yo' Eglad Shelishiya voogung khyoo: phang: byug ago". Ngau zoo" re byu dayham" gi Luhit khyoo: yhe: da" khyoo: khyoo: do, yhe: ago". Thui: zeing yo' koug ngau lho: byu dayham" Horonaim khyoo: phang: loid yhe: ago". Nimrim lang gi kain" byug lho: gyid yam mo mhain" joem gi kyug shid: lo" ago". Mhain" nyoug: ci we' ajo, loo:. Meing: byu yigi lung: zoin bain: lang: khung" khyo" lid phyed yhe: ago". Nyangnu" da" jonu" joem dangain" yo' phang: loid wa soin' nyid ago". Moba mougkyoo" khyi' khang" moo" moo nyho: ngau nyid thui: ri shau" gyo: da:. Hau: zigi Eglaim yo' Berilim voogung mo shau" gyo: da:. Dibon voogung mo gyid gyung: gi suid" wigi ne jo, da:. Mangsoo gi houg moo nyid boem da" bang: shid re" je xo: zi daja: lang" yo" ashi". Nghoid- Moba moo: nyid deing da" bang: yugkhang" moo" ri houg moo suid" ni gi phyi said pyam goo" wa.