14
1 Aseing gi nya: byumyu" Israela ri dalheing: doem nheig khyeug byid: lho: nya: byumyu" khyo" nyangnu" ri doem khyen: yu loo wa. Nyangnu" nya: mung" moo nyangnu" ri doem nyid nhang: wa. Tungbau byu yigi ju" re" lho: houg moo nyangnu" yo' dage" re" nyid boem wa.
2 Aseing wigi Israela byumyu" yiri byid: to" da" mung" khyoo: nyangnu" doem tau" lo" ri byumyu" myoo" sho' bang: gi pang" thoug loo goo" wa. Hau: mung" mo byumyu" yigi join khyo" Israela ri dei byid: loo wa. Goonham' Israela byumyu" yiri myheig yu mo, gi akhid" Israela byu yi wigi myheig yu zi shoug" lo boem wa. Goonham' nyangnu" ri doin: zeig zoo: bang: ri Israela byu yi wigi vhoeb zo: loo goo" wa.
3 Aseing gi Israela byumyu" yiri nyangnu" da" khe" no jang" mo we' kyi" khyeug khyoo: yo' nyangnu" ri doin: zeig lho: moo" zei nhang: jang" mo yo loo" nhang: wa.
4 Nyang: hid: su" koid lang" nyangnu" gi Babelon khokham ri juang" lho: tid zigi
?Anoug akhyoid koid da" khokham gi leung lo" abye:. Nyang: gi hang" ri we' khanham we' adoin zeig zoo: loo wa.
5-6 Aseing gi meing byu yiri nheig yoo: nheig jhug zeig zo: wigi nyangnu" oung: pyam da" byumyu" yiri khanham we' atheing: loo: shen" yhen nyid da" akhyeing" da" khokham yoem: so' ri thang loo" nhang: da:.
7 Akhid" lo" thang mo mougmyid gyab goin" gi doug no ziyo' ngei pyo: yug yo ziri yo" kham yu ago". Yugkhang" moo" ngei pyo: wigi jikhoin" khoin" ago".
8 Lebanon mo gyoin: gam joem yo' shamu gam joem gi leung lo" byug da" khokham shid re" gau ago". Ciwim gari nyangnu" ri thoug lheing: wa byu anyid loo- akhid" nyang: gi lo" byug bye:.
9 ?Moovo moug: gi Babelon khokham ri lhoem: tau yu wa jen" jen" nghoid abye:. Mougmyid dang mo yoem: so' bo da" soobyoo joem gi loeb re" ago". Soobyoo khokham joem gi nyangnu" zhungtang mo to re" nyid ago".
10 Houg: bang: gi nyang: ri ?Akhid" nang gi ngoonu" yhang: ti" yoem: neing: su nghoid abye:. Nang gi ngoonu" mo dayug nghoid abye:.
11 Nang gi music thui: joem wigi ngi: shab khyoo: ri lhung shoug" loo bye: da:. Nghoid loug we' akhid" nang gi he: moovo moug: moo ju" jo, abye:. Nang gi lug doung: yhoeb yoo dang moo jhang" jo lho: tung: di: mi wigi phoem" too" wa zi nghoid.
12 Ref 14:12: Psh 8:10; 9:1. O" nab soin: boo" myhu"- Nab soin: moug: bo" nya: zoo: we"- nang gi mougkhung: mo gyo" byug bye: nhung: la". Lai lo da" ayo, moo nang gi byumyu" yiri oung: lo da:. Nghoid loug we' akhid" nang gi myidgung khyoo: du" khyo' pyam zi shau" abye:.
13 Ref 14:13-15: Mat 11:23; Luk 10:15. Nang gi mougkhung: khyoo: do, loo" wa myid phyed lho: re" zhungtang ri myhang: thang da" kyi: joem atho moo too" wa myid phyed lo da:. Yu phara" joem phung: foem: nyid da" mougzhung: shoid mo boem dang mo khokham dayug yhang: ti" nang yo" zhung: wa ga: nang myid jho: da:.
14 Nang gi jhoemmoug" tho' khyoo: do, lo" lho: myhang: thang yug su" bui" wa ga: nang tid da:.
15 Nghoid loug we' hau: gungthid nang gi moovo moug: mo no, thang da" joyoo khyoo: khyo' pyam zi shau" abye:.
16 Shid: mang gi nang ri yu" zhug to" lho: nhoid lhoem: fo shug wa. Nyangnu" gi ?Myidjang ri nhoin' su: yo' mungdain: joem ri nain" nhang: su: gi he: yug bye: rhe".
17 Voomoo" joem ri phyo' pyam lho: mougmyid ri dain" pyoid yoo koid pyam yug he: yug anghoid rhe". Khanham we nya: thung: byu yiri anhang: kaid yug- houg bang: ri yhoem: aphang: nhang: yug gi he: yug anghoid rhe"? ga: myid: loo goo" wa.
18 Mougmyid mo khokham dangain" gi nyangnu" da" reung: da" loeb joem moo jhang" jo boem ago".
19 Nghoid loug we' nang gi loeb boug ayoo" nghoid da:. Re" manggung ri she: pyam poeb to" ago". Gyipui" moo said pyam shau" boem da" gyizoo: yi da" manggung joem wigi hau: ziri boem" to" lho: lug khyung: khyoo: hau: joem yo dage" du" zei pyam lho: nang: nhe" pyam zi shau" ago".
20 Ciwim gari nang gi re" mungdain: ri phyo' shoin' pyam lho: nanya: byumyu" yiri said pyam da:. Nang gi gootu: khokham yi yhang: ti" myhoeb shoung: zi shau" wa zi anghoid. Re" da" akhyeing" yhoem: byu dayug we' adei nyid deing loo: wa zi anghoid.
21 Said pyam nhang: loo we'. Nya: da" yuggi zoo: yi shid: wa zi nghoid. Ciwim gari nyangnu" da" phoug" phyid" yooboo yoomo nghoid. Nyangnu" mo dayug we' mougmyid ri yo" vhoeb goo" wa zi anghoid. Voomoo" joem ri yo" de: goo" wa zi anghoid.
22 Myhang: thang da" Aseing gi ?Ngoo gi Babelon ri khaid zain: lho: byo, yoin" loo" nhang: wa. Ciri: we' ngoo teing too" wa zi anghoid. Zooshang: yi kangso' dei nyid deing gyoo" bang: dayug ri we' teing too" wa zi anghoid. Ngoo Aseing tid bye:.
23 Ngoo gi Babelon ri thoem" nhoin: bui" nhang: lho: khung" boeb joem houg mo nyid loo wa. Ja: khang" moo" ri yo" shoem" pyam da" shoem" bain wigi Babelon ri ngoo shoem" pyam wa. Ngoo myhang: thang Aseing tid too" bye:? ga: tid da:.
24 Ref 14:24-27: Esa 10:5-34; Zep 2:13-15. Myhang: thang Aseing gi jham' tang: to" abye:. Hau zigi ?Ngoo soin too" bye: zigi bue" ri" wa. Ngoo koid wa ein: myid phyed too" bye: zigi bue" loo wa.
25 Asuri byu yiri ngoo Israela mung" moo phyo' pyam wa. Nyangnu" ri nga" boem joem dang moo nang: nhe" pyam wa. Ngoo gi nga" byumyu" ri Asuri yi da" kyoug: mo loid byoin nhang: wigi nyangnu" voin ci: da" yoovoin lid: mo loid byoin nhang: wa.
26 He: zigi mougmyid shid re" ngoo soin' to" da" khyoo: nghoid. Byumyu" yiri yooboo dam byid: wa shid re" nga" lo, tu: yeing bye: ga: zi nghoid da:.?
27 Myhang: thang Aseing gi he: ziri koid wa myid phyed to" abye:. Yooboo dam byid: wa nya: lo, ri tu: yeing kaid bye:. Hang" we nyang: ri ayo" toem pyam nghoid da:.
28 Ref 14:28: 2Kh 16:20; 2 km 28:27. He: mungdang: gi khokham Ahaza shid: da" zain moo tid fu" da" mungdang: nghoid da:.
29 Ref 14:29-31: Yer 47:1-7; Eze 25:15-17; Yoe 3:4-8; Amo 1:6-8; Zep 2:4-7; Zep 9:5-7. Philisti byumyu" yi we"- nanu" ri baid da" tei" gi byed loo nghoid loug nanu" moo gau yi wa khyoo" ajo, nghoid da:. Lhangmyu dadu: shid: lang" hau: joyoo moo je thain: da" lhangmyu dadu: doem loo wa. lhangmyu u daloem: gi dang yen" da" mainjung: phug re" da:.
30 Aseing gi nya: byumyu" yi myung shoo" bang: shid re" yang zung" yug re" wigi nyangnu" ri gau gau nyid nhang: wa. Nghoid loug we' Philisti we"- nyang: gi re" adang moo gyoug pho" phang" khoug nhang: kaid byid: loo wa. Houg: lho: hau zigi nanu" mo dayug ri we' adei teing too" wa zi anghoid.
31 Philisti voomoo" joem we"- nanu" dangain" gi pang" thoug wa shid re" kyi: ngoug nyid ge'. Nanu" dangain" bang: gyoug nyid ge'. Mougzhung: shoid mo jhoemmoug" zoo" dazoo" ju" re" nyid da:. Houg gi gyoug da" gyizoo: dayug nghoid wa zi anghoid.
32 Philisti mo zi ngoonu" jhang ju" re" da" lagyoo: yiri ngoonu" khasu" dang: byid: wa la". Aseing gi Ziun Voomoo" ri zhug to" lho: kyi" khyeug shau" da" nya: byumyu" yigi houg moo nyeing" za: gau: nyu: nyid wa ein: ziri nyangnu" ri ngoonu" tid kyoo" wa.