10
1 Nanu" gi joem: lo" abye: go". Nga" byumyu" ri zeig zo: atarha" da" tarha" joem ri nanu" ci: ago".
2 Myung shoo" bang: nyangnu" yo" yu eung: da" akho akhang" ri ayo" yu sho' toem' pyam lho: tarha" deing byeung" da" zi ayo" yu sho' nanu" toem pyam ago". Cougmoo" yi yo' coug" zoo: yi seing: da" jonu" ri hougsu" nanu" yu pyam byid: ago".
3 Mangsoo nanu" ri yooboo dam byid: uri nanu" khasu" koid goo" wa la". Ve: da" mung" mo kyi" khyeug zi nanu" adang moo nyang: ci: loo byid: lang" nanu" khasu" koid goo" wa la". Pang" thug khyoo: ri nanu" khamo yhe: tang" sho: yu wa la". Nanu" da" jonu" ri khamoo: yhe: shoung: too" goo" wa la".
4 Nanu" gi gyi khaid pui" moo said pyam shoug" loo goo" wa. Anghoid lang" thung byu yiri yhang: ti" she: khyoid lo" zi shoug" loo goo" wa. Hougsu" nghoid rilang" Aseing nheig yo: zigi atheing: wa. Nya: lo, gi yooboo dam byid: wa shid re" dayhoin" too" shi" wa.
5 Ref 10:5-34: Esa 14:24-27; Zep 2:13-15. Aseing gi ?Asuri we"- ngoo nheig joem yo: da" bang: ri yooboo dam byid: baid wa voosi" khyo" ngoo Asuri ri ci: wa.
6 Ngoo gi Asuri ri ngoo ri nheig yoo: nhang: boem da" byumyu" nghoid da" Mangso abo da" byumyu" yiri gyi: zain: wa shid re" ngoo nhang: kaid da:. Lanyhoeb lhoid wa khoug" wa byumyu" yiri fu" moo" khyoo: moo jo da" phei" lhoug: ri yo' dakhyoo" ti" nang: nhe" pyam wa shid re" nyangnu" ri ngoo nhang: kaid? ga: tid.
7 Nghoid loug we Asuri khokham gi nyang: nya: myid moo thain: da" moo" joem soin' ci: da:. Nyang: gi byumyu" myoo: sho' ri phyo' shoin' pyam wa myid phyed ci: da:.
8 Nyang: gi ?Nga" gyizoug: moo" yi yugkhang" moo" gi khokham nghoid ga: phau: da:.
9 Ngoo gi Khalna yo Kharakheme voomoo" joem Hamad yo' Arpad voomoo" joem ri ngoo oung: pyam bye:. Ngoo gi Samari yo' Damasku ri oung: pyam bye:.
10 Yerusalem yo Samari moo jo, da" yu phara" soolhoo: joem tho' je: myo: jo, wigi soolhoo: joem ri no' da" mungdain: joem ri yooboo dam byid: wa nga" lo, ri yhoin" kaid bye:.
11 Ngoo gi Samari ri phyo' pyam lho: nya: yu phara" soolhoo: joem dangain" ri phyo' shoin' pyam bye:. Ngoo gi Yerusalem ri yo' houg moo no' boem da" soolhoo: joem ri houg yo' dakhyoo" za: koid wa? ga: tid da:.
12 Nghoid loug we' Aseing gi ?Ziun boem dang moo yo' Yerusalem moo ngoo koid ziri bain koid lang" Asuri khosen ri nyang: phau: da" khyoo: dangain" yo' nyang: nghoid boin: zi dangain" shid re" ngoo yooboo dam byid: wa? ga: tid da:.
13 Asuri khosen gi ?Houg gu: dangain" ri ngoo nyang: koid bye:. Ngoo gi yoem: bo- phajhi" bo- yeug su: nghoid. Mungdain: joem agyoo: moo koid to" da" mougkyoo" joem ri shu" pyam lho: nyangnu" yung: to" da" zookhoo: joem ri yu pyam byid: bye:. Houg moo nyid bang: ri nuloo: yo' dakhyoo" ngoo nang: nhe" pyam bye:.
14 Mougmyid tho' mo mungdain: joem gi ngho' soid yo' dayhang: ti" nghoid wigi ngho' u joem ri shoem" yu yhi' lei sho' nyangnu" jonu" ri ngoo yo" shoem" yu bye:. Ngoo ri kyug wa shid re" dung dalheing: we' yo" phab shug wa zi anghoid- ce: nhoid we' yo" hoo wa zi anghoid? ga: tid phau: da:.
15 Nghoid loug we' Aseing gi ?Voozung: gi nyang: ri ci: da" yug tho' yoem: je bo ein: yo" tid la". Seig sheig gi nyang: ri ci: wigi sheig su: tho' ci je yhouggyen: rhe". Voosi" gi byu ri atu:- byu gi voosi" ri tu: yug nghoid da:.
16 Akhid" xu: xu: toin' toin' bang: ri yooboo dam byid: wa shid re" myhang: thang da" Aseing gi noo phyoo" ri nhang: kaid wa nghoid da:. Nyangnu" gung moo nge" lung da" myi: dab loo wa.
17 Israela da" bidbang Mangsoo gi myi bue" loo wa. Israela da" gyeung" shang: da" Mangsoo gi danyid" moo za: ja: khang" moo" ri nge" pyam da" myiyham: bue" lo wa. Zu: kyen: yo' zu: gam joem rilang" nge" pyam loo wa.
18 Shid: ja: noo phyoo" wigi byu ri said toem" pyam yhang: ti" thu: da" seig moo" yoo yo' yoo jhoem gi bain sho' phyo' shoin' pyam zi shoug" wa.
19 Zooshang: wigi lang" yo" nghab da" seiggam dajhi za: yug deing jo, wa.
20 Kangso' dei nyid deing da" Israela byu yigi alug said toem" pyam da" byumyu" yiri akhau: nghe: nyid wa da" ayo, ju" loo wa. Houg: lang" nyangnu" gi Israela da" gyeung" shang: da" Aseing Mangsoo ri goolhoo: za: khau: nghe: loo goo" wa.
21 Israela byu yi dajhi kyeing" nyangnu" da" myhang: thang Mangso jhang doem tau" loo goo" wa.
22 Ref 10:22,23: Rom 9:27.Akhid" Israela byu yigi panglai: gyid yam mo midcoo: nhoo' myoo: nghoid loug we' dajhi' kyeing" doem tau" loo wa. Phyo' shoin pyam zigi byumyu" yi shid re" zoem: to" lho: hau: zigi bain sho' moin: yi" da:.
23 Nghoid bye:- Nyang: koid wa ga: tid to" ziyo' dayhang: ti" yoem: moo" bo myhang: thang Aseing gi mungdain: goin" jang: sho' moo phyo' pyam zi ju" loo nhang: wa.
24 Yoem: moo" bo myhang: thang Aseing gi Ziun boem moo nyid boem da" nya: byumyu" yiri ?Egutu byu yi lhoung koid ziyo' dayhang: ti" nyangnu" nanu" ri zeig zoo: nghoid loug we' Asuri ri agyug goo".
25 Dayo, zoo: agyoo: moo nanu" ri yooboo dam byid: ziri ngoo theing: pyam lho: nyangnu" ri ngoo phyo' shoin' pyam wa.
26 Myhang: thang Aseing ngoo gi Oreb lugpyung: nam moo Midian byu yiri baid ziyo' dakhyoo" ti" nga" voosi" yo' nyangnu" ri baid wa. Egutu byu yiri ngoo yooboo dam byid: ziyo' dakhyoo" ti" Asuri ri ngoo yooboo dam byid: wa.
27 Hau: ayo, ju" loo lang" ngoo gi nanu" ri Asuri lo, mo khyoid yu wigi nyangnu" da" kyoug: gi nanu" lo, sain: mo yoovoin lid: abue" jo, loo wa? ga: zi nghoid.
28 Gyi voo gyidab gi Ai voomoo" ri khaid oung: seing: yu pyam ago". Nyangnu" gi Migron khyo" lid phyed yhe: ago". Nyangnu" da" zookhoo: ri Mikmasha moo too" kho' boem.
29 Nyangnu" gi koo lhang ri lid phyed yhe: lho: myen" ri Geba voo moo yhe: theing: nyid ago". Rama voogung moo nyid boem da" byu yigi gyoug pyam ago". Khokham Sholu da" voogung Gibea voobyu yigi tang" phang: byug ago".
30 Galim byu yi we"- yoid nyhoo: ge'. Laisha byu yi we"- tam" gyoo: ge'. Anathod byu yigi dang: phyed byid: ge'.
31 Madmena byu yi yo' Gebim byu yigi nyangnu" kang: loid sho' tang" phang: ago".
32 Akhid nyid" gyivoo yigi Noba voogung moo nyid wigi Yerusalem voomoo" Ziun boem moo nyangnu" lo, zhoeb tu: yeing shug nyid ago".
33 Myhang: thang Aseing gi nyangnu" ri seiggam mo kyid khyo' pyam da" seig koung: joem yo' dayhang: ti" gyu" gyo" loo" nhang: wa. Nyangnu" mo nghoid boin: thang bang: yo' myhang: thang da" bang: ri kyid khyo pyam lho: ngi: yoem" shang pyang: nhang: wa.
34 Lebanon mo ge thang da" seiggam joem ri thug lheing: pyam ziyo' dayhang: ti"- seig moo" yoo agung mo seiggam joem ri voozung: wigi thug lheing: pyam yhang: ti" Aseing gi nyangnu" ri thug lheing: pyam loo wa.