1 Aseing gi ?Gyi tid poin" thui: ri myheing kaid we'. Gyivoo yigi zoin bung yo' dakhyo" da" mougmyid moo dang: gyoo" re" nyid ago". Nga" byumyu" yigi ngo wigi nyangnu" yo' koid to" da" dang: theing ri phyo' shoin' pyam lho: ngoo jhau" shed ziri thougtheung gyi koid pyam ago". 2 Nyangnu" gi ngoo ri nyangnu" da" Mangsoo ga: myheing lho: nyangnu" nyang: gi nga" byumyu" yi nghoid- nyangnu" ngoo ri se' ga: tid nghoid loug we' 3 nyangnu" gi ge ziri ngeug pyam abye:. Houg: yoomo nyangnu" da" gyivoo yigi nyangnu" ri cang khaid loo goo" wa.

4 Nga" byumyu" yigi khokham yi khyen: nghoid loug we' nyangnu" nya: myid khyo" khyen: ago". Nyangnu" gi vhujhung: yi khyo" moo" foin: too" loug we' nga" myid veing" khyoo: aboo nghoid da:. Nyangnu" gi nyangnu" da" ngei yo' sheing: ri yu lho: soolhoo: joem koid ago". Hau: zigi nyangnu" da" byo, yoin" khyoo: nghoid da:. 5 Samari voomoo" mo byumyu" yi no' da" sheing: nujung loo: ri ngoo ngheing" da:. Ngoo gi nyangnu" ri nheig joem yo: da:. Khamyhang myang" ri she' nyangnu" gi soolhoo: ri no khyoo: ri to" pyam goo" wa lug la". 6 Israela lo, moo" zei: su: dayug gi soolhoo: ri koid to" da:. Houg: lho: hau: zigi yu phara" nyang: anghoid nghoid da:. Samari moo no' da" nujung loo: gi ajab, amoin' baid khyoeb pyam zi shoug" wa. 7 Nyangnu" gi lid ri sho" kaid ri lid zoo" ri shau" yham" yu wa. Ayang" da" shivoo: yoo gi khanham we' zooyho' dakhyab yo" bui" nhang: wa zi anghoid. Hau: ziri zooyho' yo" koid nghoid loug we' hau: zigi tungbau: byu yi ge' zo: pyam byid: loo wa. 8 Israela byumyu" yigi gootu: byumyu" yi yhang: ti" bue" byug wigi go, byug da" oug" yhang: ti" ci: akyu" aboo nghoid da:. 9 Israela byumyu" yigi loo zei: lam" yhang: ti" nheigloem: thain: wigi nyangnu" vho: da" jang khyoo: yhe: lo" ago". Nyangnu" gi Asuri mo pang" thoug yu zi shoug" wa shid re" jhen" yhe: lo" ago". Houg: lho: nyangnu" ri goem loem byid: wa shid re" gootu: byumyu" yiri aphoug" byid: ago". 10 Nghoid loug we' akhid" gi ngoo gi nyangnu" dangain" ri shoem" zheing" to" wigi yooboo dam byid: wa bye:. Khamyhang amyang" ri nyangnu" gi Asuri khosen ge' nyangnu" ri doem zeig zoo: lang" dam no wigi lang: thain: nyid goo" wa.

11 Israela byumyu" yigi yooboo joem ri yu pyam wa shid re" phoin: myoo: sho' je zhug lang" yooboo koid wa jo yoo je myoo: sho' yo" ago". 12 Ngoo gi hau: byumyu" yi shid re" atho' nghab loo: sho' nghoid da" jhau" shed dang: joem ri lhid" byid: nghoid loug we' nyangnu" gi hau: ziri amyang yu" da" byumyu"- tungbau yo' dakhyoo" ti" ngeug pyam ago". 13 Nyangnu" gi ngoo ri xoin" ngei" byid: lho: hau: xoin" joem mo shoo" ri zo: ago". Nghoid loug we' ngoo Aseing gi hau: ziri angei byid: wigi akhid" ngoo gi nyangnu" da" yooboo ri xoem" ci: ziyo' hau: gang mo nyangnu" ri yooboo dam byid: wa. Ngoo gi nyangnu" ri Egutu khyoo: doem tau" nhang: kaid wa.

14 Israela byumyu" yigi khokham kho" ri zhug to" ago". Nghoid loug we' nyangnu" gi nyangnu" ri phain" so: too" su: ri to" myhed pyam abye: go". Yuda byumyu" yigi gye" geing: da" voomoo" joem ri de: to" ago". Nghoid loug we' ngoo gi nyangnu" khokham kho" joem yo' voomoo" joem ri nghe' pyam wa myi: ri nhang: khyo' kaid wa.