5
Khainjung nanu" we" tam" gyoo: ge'. Israela byumyu" yi we" tam" gyoo: ge'. Khokham ikoin deungkhu: moo bo da" nanu" we"- tam" gyoo: we'. Nanu" gi tarha" deing byeung" zi ge' dang: phyed pyam ca" eung: da:. Nanu" gi Mizpa mo lhid' bue" lo abye: da:. Tabora boem moo kham: to" da" goin bue" byug bye:. Shug voomoo" mo no, da" duang: khuang" bue" lo abye: go". Houg: lho: ngoo gi nanu" dangain" ri yooboo dam byid: wa. Israela byumyu" yi ciyo' du ziri ngoo se'. Nyang: gi ngoo ri ayo" phang: goug" nghoid da:. Nyang: gi jhug azug loo: yoomo nya: byumyu" yigi ngoo ri noku wa shid re" amoin: yi" boem da:.
Hau: byumyu" yi koid da" akhyeing" ashoeb da" moo" gi nyangnu" ri Mangso jhang khyoo: ayo" lheing: loo wa khyo" toem' pyam byid: ago". Soolhoo: no' da" thung" gi nyangnu" ri yoem: so' yo' teing zei: ci: da:. Houg: yoomo nyangnu" gi Aseing ri ayhen: yu nghoid ago". Israela byumyu" yi da" khuang khyoo: gi nyangnu" ri thougtheung nyho: yoid ago". Nyangnu" da" yooboo joem gi nyangnu" ri khyid: vhu" thung" lho: leung loo" nhang: da:. Houg: lho: Yuda byumyu" yi we' nyangnu" yo' dage" leung lo" ago". Nyangnu" gi Aseing ri xoin" ngei" byid: wa shid re" nyangnu" da" yang joem yo' nu joem ri she: yhe: ago". Nghoid loug we' houg joem gi nyangnu" ri ce: akyu" abyid: nghoid da:. Nyangnu" gi nyang: ri ashau" sho: myang loo: nghoid ago". Ciwim gari nyang: gi nyangnu" ri too" kho' abye:. Nyangnu" gi Aseing ri jhug azug goo" nghoid da:. Nyangnu" da" nya: zoo: yiri nyang: wigi ayo" seing: nghoid da:. Houg: yoomo akhid" amyang" ri nyangnu" yo' nyangnu" da" mougmyid ri phyo' shoin shau" wa nghoid.
Gibea moo: gyi khaid yhi: wa shid re" laboo" mhoid kaid we'. Rama moo: gyi ri tid poin" da" thui: ri khyo' kaid ge'. Bethaven moo meing: zain: wa yoem: kaid thui: ri myhang: kaid ge'. Benyamin kung: mo yuggi yi we"- gyi khaid yhi: we'. Yooboo dam byid: wa bidnyid gi ju" lo nyid abye:. Houg: lho: Israela gi byo, yoin" loo" wa. Israela byumyu" yi we"- he: zigi gyeing" gyeing" nyang: bue" wa.
10 Aseing tid zigi ?Yuda vhujhung: yigi Israela ri moug: jhen" jhen" vang yhe: lho: nyang: mo mougmyid ri khau" yu pyam byid: bye: yoomo ngoo nheig yo: nyid. Houg: yoomo ngoo gi nyangnu" adang moo gyid je: re" ziyo' dakhyo" yooboo dam ri foid goin: byid: wa. 11 Israela gi doin zeig khyoo: ri kham zo: nyid. Nyang: seing da" mougmyid ri ci: phyug pyam bye:. Ciwim gari nyang: gi nyang: ri byid: wa ci: ayo" bang: jang" mo pang" thoug zi yo" yu wa shid re" agyoo: atho' jhen" yhe: da:. 12 Ngoo gi Israela byumyu" yiri joem: loo" nhang: wigi Yuda byumyu" yi adang moo byo, yoin" loo" nhang: wa.
13 Israela gi nyang: khayhi' no nyid ziri shau" myang lho: Yuda gi nyang: nya: dam khoo: ri shau" myang lang" Israela gi Asuri khyoo: yhe: lho: khokham moo" ri pang" thoug wa shid re" yhe: mho' da:. Nghoid loug we' nyang: gi nyangnu" ri noo ayu" byang" gi byid:- nyangnu" da" dam khoo: ri ayo" gi nhang: nghoid da:. 14 Ngoo gi Israela yo' Yuda byu yiri khangkhyi dadu: yo' dakhyo" khaid zain: wa. Nyangnu" ri ngoo nyang: nyang: wigi adu du lang: ceig pyam lho: nyangnu" ri too" khoo' wa. Nyangnu" ri ngo wigi she: khyoid lo" ri hang" wigi we' ayo" khoid yu wa.
15 Ngoo gi nga" byumyu" ri nyangnu" nya: yooboo yoomo gi" sho' yooboo dam kham zo: lho: ngoo ri sho: boem da" ayo, ju" sho' she: pyam too" wa. Nyangnu" da" kyi" khyeug khoug: mo nyangnu" ngoo ri sho: loo goo" abe? ga: tid.