4
Aseing gi he: mougmyid moo nyid da" byumyu" yiri thougtheung yooboo zhug abye:. Israela byumyu" yi we" tam" gyoo: we'. Nyang: tid zigi ?He: mougmyid moo jhug zug ziyo' jheddab myid ga: zi ajo,. Houg: lho: byumyu" yigi ngoo ri Mangsoo khyo" alheing: yu goo" nghoid da:. Nyangnu" gi dangsoo" to" to" lho: hau: ziri doem phyo' pyam ago". Nyangnu" gi mhau' tid- byu said- khau" ziyo' myi: shoid lang shoid ago". Yooboo koid moo" je myoo: nhang: wigi byu said moo" ri daloem: bain thang: daloem: koid thu ago". Houg: yoomo mougmyid gi kyug lo" byug wigi hau: mougmyid dang moo nyid ja: dangain" zi shid: byug goo" wa. Gougnyhoug dangain"- ngho' dangain" yo' wimdo, joem lang" shid: thang byug loo goo" wa.
Aseing gi ?Hau: byumyu" yiri hang" ge' we' yooboo ayo" zhug goo" wa tid phue: khyoo: we' hang" ayo" koid wa. Ngoo myeing" myo: zigi nanu" khainjung yiri thougtheung zi nghoid. Nanu" gi myen" ri nyid" ri mhoug fain" nyid ago". Lapi: yi we' nanu" tho' aje gi nghoid ago". Ngoo gi nanu" nya: myhi' Israela ri phyo' shoin' pyam loo: wa. Nga" byumyu" yigi joem: lo" boem bye:. Ciwim gari nyangnu" gi ngoo ri ayhen: yu nghoid ago". Khainjung yi nanu" gi ngoo ri yhen: yu wa he: pyam lho: nga" jhoug" shed khyoo: ri ngeug pyam abye: go". Houg: yoomo ngoo gi nanu" ri ngeug pyam lho: nanu" da" yuggi zoo: yiri we' nga" da" khainjung yi khyo" ayhen: yu wa.
Nanu" khainjung je myo: ri je nanu" gi ngoo ri je yooboo shoid ago". Houg: yoomo ngoo gi nanu" da" ngi: shab khyoo: ri phue: loo" nhang: wa. Nanu" gi nga" byumyu" yi da" yooboo mo yoo" zoo: yoo" shug lo ago". Houg: yoomo nanu" gi nyangnu" ri je wigi yooboo xo' koid nhang: nau ago". Hau: byumyu" yi yo' dakhyo" nanu" we' yooboo dam loem zo: loo goo" wa. Ngoo nanu" ri yooboo dam byid: wigi nanu" shoid vhang: da" akhyeing" ashoeb yooboo shid re" aphoug" xab nhang: wa. 10 Nanu" gi nanu" da" xoin" joem mo gamboem joem ri zoo: nghoid loug we' zoo dayoid nyid shi" goo" wa. Nanu" gi myo: je: ri" wa da" yu phara" joem ri no' nghoid loug we' zooshang: ayoo" bue" nyid shi" goo" wa. Ciwim gari nanu" gi ngoo mo gang: lain lo" wigi yu phara" gootu: jang" moo cang lo" ago"? ga: tid da:.
11 Aseing gi ?Zabyid yhid: axoug" yo' aseig gi nga" byumyu" yi da" myid lasi ri lhoid pyam byid: bye:. 12 Nyangnu" gi seig khang" mo pang shug wa shid re" myid: boem ago". Nyangnu" si nau ziri nyangnu" ri seig yau: ge' tid kyo" da:. Nyangnu" gi ngoo ri too" kho' abye: go" da:. Shava myhi' bue" lo da" myiyi: dayug yhang: ti" nyangnu" gi nyangnu" gung ri gootu: yu phara" joem jang" moo byid: pyam abye: go" da:. 13 Nyangnu" gi boem gung joem mo gyeung" shang: joyoo cang xoin" to' byid: ago". Houg: lho: nyangnu" gi bouggung tho' moo yug da" myhang: lho: afu' mung" da" seiggam joem yang: moo nam pyo: ja: nghe' ngei" ago". Ciwim ga ri bid shoem: gye pyoo: yoomo nghoid.
Hau: da" akyu" gi nanu" da" myiyi: nu" yigi shava myhi' khyo" dei byid: ago". Houg: lho: nanu" da" dumoo" yigi myi: shoid lang shoid ago". 14 Nghoid loug we' ngoo gi nyangnu" ri he: moo" yoomo yooboo dam abyid: wa. Ciwim gari nanu" nyang: we' noku yhoem: mo shava myhi' joem yo' zoem" yen" ago". Houg: lho: nanu" gi nyangnu" yo' dage" tungbau yu phara" joem ri xoin" ngei" byid: ago". Dang: zhoem' moo ?Myid lasi abo da" byumyu" damyu" gi byo, yoin" lo" wa? ga: tid to" da:.
15 Israela byumyu" nanu" gi ngoo ri jhug azug goo" nghoid loug we' Yuda gi houg: yo' dakhyo" yooboo ayo" baja". Gilgala moo we' Bethaven moo we' ano' goo". Hau: joyoo mo dei nyid da" Aseing myeing ri dangsoo" atoo" goo". 16 Israela byumyu" yigi Loo kung" joem yo' dakhyo" nheigloem: thain: ago". Ngoo gi nyangnu" ri khasu" koid wigi yang joem ri yo' dakhyo" mhain" yoo moo yo" zhoo" wa lha". 17 Israela byumyu" yigi soolhoo: joem wigi fa" to" zi shoug" ago". Nyangnu" nya: khyoo: khyoo: yhe: loo" goo" baja". 18 Zabyid yhid: myoo" sho' shug thang: ri nyangnu" da" shava myhi' shava phoo moo" moo pyo: nyid ago". Nyangnu" gi ngi: shab wa tho' ngi yoem" shang pyang: wa ziri je vho: ago". 19 Nyangnu" gi lid hau wigi hau tang" kaid yhang: ti" shu" yu pyam zi shoug" loo goo" wa. Houg: lho: nyangnu" gi nyangnu" da" tungbau yu phara" ri no' da" moo" zoo" yoomo sho' phu" loo goo" wa.