11
Aseing gi
?Israela gi zoonu" nghoid shi" uri ngoo nyang: ri nheig dab bye:.
Houg: lho: nyang: ri nga" zoo: khyo" Egutu mo khe: shu" thu yu bye:.
Nghoid loug we' ngoo nyang: ri je khi:
lang" nyang: gi nga" jang" mo je lheing: phug lo" da:.
Nga" byu yigi Bala ri xoin" ngei" byid: da:.
Nyangnu" gi soolhoo: joem ri nam pyo: ja: nghe' ngei" byid: da:.
Nghoid loug we' Israela ri khyoo: so" jhau" zi ngoo danghoid.
Ngoo gi nga" byumyu" yiri nga" lo, moo gab vu, ci: nghoid loug we'
ngo wigi nyangnu" ri yu" coung: lo: ziri
nyangnu" ce: ayhen: yu byid: goo" nghoid da:.
Ngoo gi nyangnu" ri nga" jhang jheddab seing" no myid yo' lang: she: yu bye:.
Ngoo gi nyangnu" ri koid: vu, yu lho: nga" baloid moo tab ci: loo bye:.
Ngoo gi nyangnu" jhang goeb lho: zho" jhug loo bye:.
Nyangnu" gi nga" jhang doem tau" loo wa ziri ngeug pyam ago". Houg: yoomo nyangnu" gi Egutu khyoo: doem phang: tau" loo" ca" ziyo' Asuri gi nyangnu" ri vhoeb zo: loo wa. Nyangnu" voomoo" joem moo meing: zain: zi dang: gyo" lo wigi voomoo" vang khyam: khoem" moo" duang: ri phyo' khyo' pyam byid: loo wa. Nga" byu yigi nyangnu" myid moo ge thang ga: myid ziri koid da" gang mo hau: ze wigi nyangnu" ri said toem" pyam wa. Nyangnu" gi jhen" gi gi ngoo mo vi: khyoo: da tau" phang: lo" ago". Nyangnu" adang moo kyoug: voin vu, ci yoomo ngoo ri nyho: yoid loo goo" wa. Nghoid loug we' hau: yoovoin joem ri hang" wigi we' atu: pyam byid: wa.
?Israela byumyu" yi we" nanu" ri khasu" tho' se' to" pyam wa la".
Nang ri ngo wigi khasu" tho' she: pyam khoo' wa la".
Adma ri ngo wigi phyo' shoin' pyam ziyo' dakhyo"-
anghoid lang" Zeboim ri ngoo baid yhang: ti"
nang ri ngoo khasu" se' koid wa lug la".
Nga" nheigloem: gi hougsu" koid wa shid re" agyoo: wa.
Nang ri jheddab da" nga" nheigloem: gi gye" gyi: sheung: nyid da:.
Nga" da: nheig yo: zigi nang ri ngoo yooboo dam abyid: wa.
Ngoo gi Israela byumyu" yiri adoem phyo' shoin' pyam loo: wa.
Ciwim gari ngoo gi Mangsoo danghoid byu anghoid.
Gyeung" shang: da" yug- ngoo gi nanu" yo' dage" nyid.
Ngoo gi nanu" jang" moo nheig yo: lho: re" loo wa anghoid.
10 Ngoo gi nyangnu" gyivoo yiri khangkhyi yo' dayhang: ti" myeing lang" nga" byumyu" yigi nga" thang: cang lo loo goo" wa. Nyangnu" gi bidvang shoid khyo" zi nga" jhang" khyoo: hain: hain: phang: re" loo goo" wa. 11 Nyangnu" gi Egutu mung" mo ngho' joem yhang: ti" yo' Asuri mung" mo pheing" kyoug" joem yhang: ti" dang: loo goo" wa. Ngoo gi nyangnu" ri nyangnu" yhoem: khyoo: doem shu" loo" wa. Ngoo Aseing tid too" bye:? ga: tid.
12 Aseing gi Israela byumyu" yigi ngoo ri mhoug tid dang: yo' mhoug fain" ziyo' lheing khoem to" abye: go". Yuda byumyu" yigi jhug zug ziyo' gyeung" shang: da" ngoo Mangsoo ri thougtheung gyi koid nyid boem shi" ago".