2
1 Ngoo gi nga" da" myo, pyuzung tho' moo do, yab lho: Aseing gi ngoo ri khasu" ga: tid wigi nga" nu dang: tid khyoo: ri khasu" ga: phug tid ziri si' sho' ngoo lang" nyid wa zi nghoid.
2 Aseing gi ngoo ri hidsu" ga: phoug tid ?Ngoo pang shug da" mungdang: ri yu" kaid yo' myab yo" nghab wa khyo" hau: ziri lug pyi" yho' joem tho' moo bang bang lhid" too' we'.
3 Hau: zigi bue" loo wa ayo, aju" shi" yoomo lhid" cab yo' nyang: lhid" too" we'. Nghoid loug we' hau: ayo, gi myab myab ju" lo nyid lho: ngoo nang ri toin" shed khyoo: gi gyeing" nyang: bue" loo wa. Bue" loo wa khyoo: ne" nyid yhang: ti" nghoid loug we' dalang" nyid we'. Hau: zigi deing" deing ju" loo wa zi nghoid wigi ne" thang: gyo" nyid wa zi anghoid.
4 Hau: mungdang: gi he: zi nghoid ?Akhyeing" ashoeb mo, gi nyid deing loo wa zi anghoid. Nghoid loug we' deing byeung" mo, gi Mangsoo moo loem khau: nheigloem: zung" nyid boem yoomo kangso' dei nyid boem wa zi nghoid??.
5 Jonu" ziyoo gi mhau' fain" lo" khyoo: nghoid. So' kho' myo, no, bang: gi phau: khuang lho: phibu phaxeig nghoid nyid ago". Shid: gyoin noogyoin yhang: ti" nyangnu" gi khanham we' nheugshid: nheugdeug khyoo: ga: zi ajo, nghoid ago". Houg: yoomo nyangnu" mungdain: yi damung" thang: moo damung" ri nyangnu" shid re" zain: ung: yu khyoo: nghoid ago".
6 Nyangnu" zain: ung: yu shau" da" byumyu" yigi zain: ung: bang: ri juang" yi yooboo foin: lho: nyangnu" ri aphoug" akhyoid koid wa zi nghoid. Nyangnu" gi ?Nanu" da" jonu" ziyoo anghoid ziri yo" lhoid yu nghoid loug we' nanu" gi byuxuid" vooyoem: zi shoug" goo" wa zi nghoid. Nanu" da" jhen: dab mo, ri agyoo" gyoo: jhen: xab nhang: khyo" khamyhang myang" sho' nyid gi nyid de nyid goo" wa lha"? ga: tid goo" wa.
7 Nghoid loug we' nanu" aboin: shi" ri gootu: byumyu" yiri zain: ung: mo, nanu" nyang: jhen: voin lho: atu" amyaid yo' agyoo: gyoo: jhen: ri xab nhang: zi shoug" goo" wa nghoid. Gyivoo joem gi ju" re" lho: nang ri gyoug nain" nyid nhang: wa zi nghoid. Nyangnu" gi nanu" ri lhoid zo: pyam' loo goo" wa zi nghoid.
8 Nanu" gi mungdain: myoo" sho' mo da" mung" byu yiri phyo' zo: phyo' shug lo yu" bye:. Nghoid loug we' akhid" nanu" gi nanu" shoid vhang: da" byu said moo" zoo" yoomo we' moug: gyab goin" jang mo mung" byu yi yo' nyangnu" da" voomoo" joem ri athoug" akhyoug: koid yoomo we' hau: deung nyid shi" da" byumyu" yigi nanu" ri lhoid zoo: lhoid shug loo goo" wa zi nghoid.
9 Nanu" gi joem: lo" zi shoug" goo" wa. Nanu" gi athoug" akhyoug: moo" zoo" khyo" yo" yu da" ziyoo jonu" joem yo' nanu" da" yhoem: ikoin deungkhu: yiri nyid di nyid lhoo' nhang: lho: nanu" da" yhoem: ri shid: gyoin yo' gyoug ci' pho" jang" mo gau: nyu: khyoo: ri yo" koid yu abye: go".
10 Nghoid loug we' nang gi byumyu" myoo" sho' ri phyo' sain" pyam' yoomo nanya: gung ri nanyang: phyo' sain" pyam' abye:. Nang myid phyed to" khyoo: gi re" yhoem: bang: ri sho' thu nhang: abye:.
11 Xiyam mo lugzeing joem lang" nang ri thougtheung nyho: thu lo wigi yhoem: mo khung: doem: joem moo we' nyhoo: thui: lang: thang: jha" tu" jo, wa nghoid.
12 Nanu" gi joem: lo" zi shoug" goo" wa. Nanu" byu said khyo" voogung ri tam' wigi leung byid suid" shoin: lho: voomoo" ri zhug lid loo bye:.
13 Nang khyo" ung: pyam' da" byumyu" yigi akoem: moo zei: myung: pyam' lho: nyangnu" zhug to" zi dangain" myi: nge" pyam' bye:. Yoem: moo" bo da" Aseing gi he: moo" ri koid bye:.
14 Nghoid loug we' panglai moo gyid yo' byeung" jo, ziyo' dakhyoo" ti" myid jang gi Aseing da" myonhoo: phung" yoeb ri se' da" lasi laleug yo' byeung" shoin: loo" wa nghoid.
15 Nang gi joem: lo" zi shoug" wa. Nang gi nheig joem: yo: ziyo' re" yhoem: kyoo" cang" yiri asho' ashid: shoug" nhang: ziyo' myonhoo: shoem: nhang: loo bye:. Nang gi nyangnu" ri yhid: yed mo, ri yhang: ti" apyi: akam" so" leung baid yen" nhang: bye:.
16 Nang we' myonhoo: ngilang: da" gungthid asho' ashid: zi doem shoug" wa nghoid. Nang nyang: we' shug lho: apyi: akam" bue" loo" wa. Aseing gi nang ri nanya: yooboo khu ri shug nhang: lho: re" da" myonhoo: ngilang: we' sho' phu" khyoo: thid loo" nhang: wa.
17 Nang gi Lebanon yooyang" seig yoo ri thug hain" pyam' yoomo akhid" nanyang: ri thug pyam' zi shoug" wam bye:. Nang gi gougnyhoug goug: du: ri said pyam' loo bye: yoomo akhid" hau: gougnyhoug goug: du: wigi nang ri kyug nhain' loo wa nghoid. Nanu" shoid vhang: da" byu said moo" yoomo we' moug: gyab goin" jang" mo mung" byu yi yo' nyangnu" da" voomoo" joem ri athoug" akhyoug: koid yoomo we' he: zigi bue" loo wa zi nghoid.
18 Phara" soolhoo: gi ce" noem akyu" bo lha". Hau: zigi byu wigi koid to" da" lo, moo" te: nghoid lho: ce" dang: we' ase' tid. Mhau' to" da" khyoo: za: danghoid. Dang: lang" ase' tid da" yu phara" ri loem khoug: wa ga: koid too" su: shid re" ce" noem akyu" yo" byid: wa lha".
19 Nang gi joem: lo" zi shoug" wa. Nang gi seig thung" ri ?Too' we'?- anghoid lang" gi lugzeing ri ?To' yab we'? ga: tid da:. Phara" soolhoo: gi nang ri daja: ja: yo" ci: shug la". Hau: ziri ngei yo' sheing: yo' shoin" nghoeb too" nghoid loug we' hau: moo kangso' aboo nghoid da:.
20 Aseing gi nya: da" gyeung" shang: Noku Yhoem: Moo" moo danyid nyid. Mougmyid tho' mo yugkhang" moo" gi nya: shidkhoin" moo sam" zoo: tam" too" we'.