1 Mangsoo khyen: khe: yu zi shau" da" nga" Khristain mangnhung" yi we"- ngoonu" yhen: kham: yu bye: da" noku thung" laloem lakhau: da" khainjung moo" zeung bue" loo wa shid re" Mangsoo nhang: kaid da" Yesu ri myid yu" ge. 2 Moshe gi Mangso da" yhoem: mo nya: moozoo" moo jhug' zug yhangti"- he: moo" ri zei: wa shid re" khyen: yu shau" su: we' Mangsoo moo jhug zug, nyid. 3 Yhoem: daloem: ri zheung" zhoug too" su: gi hau: yhoem: tho' moo je" gyi: da" myonhoo: yo" nyid yhangti"- Yesu we' Moshe da" tho' moo je gyi: da" myonhoo: phung" yhoeb' yo' coung" byid: nghei byid: ziri kham: yu wa zi: moin: yi" nyid bye:. 4 Yhoem: ga: zigi byu dayug yug wigi koid to" zi nghoid- jo, moo jo' ri koid too" su: koem gi Mangsoo nghoid nyid. 5 Moshe koem gi ju" loo wa ayo' Mangsoo tid kyoo" wa da" khyoo: joem ri sagsi kham byid: wa shid re" Mangso da" yhoem: goin" jangmo deizoo: yhangti" jhug zug su: nghoid nyid. 6 Khristu gi Mangso yhoem: ri zung" da" nya: zoo: deingbyeing" su: yo' ung: gyeung: su: nghoid nyid. Ngoonu" gi yoem: boo so' bo ziyo' nyhang" nya: da" gau yi nheig byu joyoo ri lo" thang moo ju" sho' nheig shid: nheigdeig ziyo' geing: geing: teing teing nghe: khau: nyid boem nghoid rigi Mangso yhoem: byu yi nghoid boem wa.

7 Hougsu" nghoid yoomo hau: gyeungshang: da" Venyi: tid ziyo' dakhyoo" ti" Akhid" nyid" nanu" Mangso dang: shau" gyo: nghoid rigi 8 Mangsoo ri gyi koid lho: dain" pyoid yoo moo nyid yen" ayo, mo nyang: ri jham" yu" da" nanu" nya: phoug" nya: pho yhangti"- vhuloem: athain: nyid loo: goo". 9 Mangsoo gi nanu" nya: phoug" nya: pho- zain nyid myid: xi: zain goin"- dain" pyoid yoo moo ngoo koid shug da" moozoo" ri myang boem nghoid loug we' ngoo ri thug theung jham" ca: yu" nyid ago". 10 Hougsu" nghoid yoomo ngoo nanu" ri nheig yoo: nau wigi- nyang: gi khanham we ase lhid zid" o"- nga" tarha" ri we' azheung: cang boem nghoid da: ein: ngoo nheung" too" bye:. 11 Ngoo nheig yoo: nau ziyo' nyangnu" gi ngoo nyangnu" ri byid: wa ein: da" doug, noo: joyoo khyoo:- khanham we' ayo' vang lo" boem loo: wa ein: ngoo nheung" too" bye:. 12 Loem" jeing" nyid da" mangnhung" yi we"- dei nyid da" Mangsoo jhang mo vhang: lam" loo" sho' akhyeing" ashoeb da" loem shoid nheigloem: boo da" byu- nanu" moo dayug we' aboo loo: sho' zid" nyid ge. 13 Nanu" mo dayug we' yau: noo yooboo wigi jhuphyo' zi shau" lho: vhuloem: thain: nyid da" byu yi abui" goo" baja"- Jhoem: mungdang: moo tid to" ziyo' dakhyoo" ti" Akhid" nyid" ein: ngoonu" shid re" yo" tid nyid shi" da" ayo, bidnyid moo nyid" khang" moo" nyang: cang" nyang: pang" thoug go" nyid ge. 14 Khasu" wim gari Khristain xangshid" bue" lo da" uri yhang: te"- nheig shid: nheigdeig, da" loemkhau: khyoo: moo lo" thang bidnyid ju" sho' geing: geing: loemkhau: nyid nghoid rigi nyhang" dangain" mo, gi Khristu yo' dage" dadeing: daloem: za: moo" voin mo, nghoid nyid boem. 15 Jhoem: mungdang: moo tid to" khyoo: gi Akhid" nyid" nanu" Mangso da" thui: shau" gyo: boem nghoid rigi Mangsoo ri nanu" da" nya: phoo' nya: phoug"- gyi koid lo boem yhang: ti" vhuloem: thain: nyid agoo" ga: tid nyid. 16 Mangso da" thui: ri gi shau" gyo: nyid lho: nyang: ri gyi koid nyid bang: gi hang" nghoid nyid boem lha". Nyangnu" gi Egutu moug: mo Moshe shu" thu' loo mo, dangain" bang: nghoid nyid ago". 17 Zain' nyid myid: xi: zain' goin"- Mangsoo nheig yo: zi thoung" shau" zo: nyid mo, gi hang" nghoid nyid boem lha". Houg: bang: gi yooboo koid lho:- dain" pyoid yoo moo leung, shid: lo" byug mo, nghoid boem ago". 18 Nyangnu" gi ngoo byid: wa ein: da" ngei pyo doug, no: mung" moo khanham we' yo" vang: goo" wa zi anghoid, ga: wigi hang" ri yeung, lho: Mangsoo nheung" to" lha". Nya: dang: ri atam" gyoo: lho: gyi koid nyid mo, ri tid nyid zi anghoid goo" la". 19 Nyangnu" gi aloem" jeing" boem yoomo hau: mung" khyoo: ayo" vang lo" boem ziri ngoonu" myang se' boem bye:. .