2
Houg su" nghoid yoomo ngoonu" gi khyoo: avhang: loo" baja"- ngoonu" nyang: shoug" gyoo: bye: da" hau deingmain" da" khyoo: moo je" wigi pu" lhang" too' shang. Moug: lagyoo: yi da" nhoid mo ngoonu" da" phoug" phyid" yi ri mungdang: tid to" zigi deingmain" da" mungdang: nghoid wigi hau" mungdang: ri atam" gyoo: loo za: do, rhue' mo, gi nyang: tu: nyang: yo' moin: yi" da" yooboo dam, ri shau" kham: zo: boem wa zi nghoid. Houg: khyo" dadeung nghoid rigi Hid: yhi' gyi sheung: da" jeju" mungdang: ri- ngoonu" gi ci: asoin: loo: koid pyam boem nghoid rigi ngoonu" gi khakhyo" wigi yooboo dang: phyed jangmo khasu" koid se' loid byoin, loo" wa lha". Hau: khyoid yu khyoo: ri xangshid" moo Aseing: da" nhoid mo nyang: tid kyo" lho: shoug" gyoo: bang: gi hau" mungdang: gi deingmain" nyid ziri sagsi toin" shid nyid boem bye:. Houg: mo xo' lho: Mangsoo gi nyang: nya: alhoo: again joem mau" pho" moozoo" aja: ja: toin" shid khyo" we' gyeungshang: da" Venyi: yo' sen: da" jeju" jhungshug joem ri nyang: vho: ngei ziyo' dakhyoo" ti" gam byid: khyo" we' nyangnu" da" sagsi joem moo pug lung: byid: khyo" we' toin" shid nyid.
Mangsoo gi akhid" nyhang" tid nyid da" ju" loo wa da" mougmyid seig ti: we' moug: lagyoo: yi vhoeb khang" da" akhoug: moo too" byid: wa zi anghoid. Jhoem: mougsoug" moo gi
?Phoo' Mangsoo we"- byu xangsu: ga: zigi khayhang: te" su: nghoid wigi
nang nyang: ri myid boin: nyid la". Byu gi khayhang: te" su: nghoid.
Nang nyang: ri pang" thoug goin coung: koem" yu" nyid la".
Nang gi nyang: ri moug: lagyoo: yi tho' moo dajhi' khyo lho: phain" too" bye:.
Nghoid sho loug we' myonhoo: phung" yoeb, bug thu sheing" jhu" zigi
nya: tho' moo bidmug, zhung" byid: bye:.
Jo, moojo, nyid moonyid ri vhoeb khang" da" akhang" we'
Nang nyang: ri byid: too" bye? ga: wigi da tid nyid.
 
Jhoem: mungdang: moo ?Mangsoo gi byu Xangsu: yi ri phain" so: to" lho: wigi dangain" tho' moo vhoeb wa akhang" byid: too" bye:.? ga: da" dang: gi jo, moojo, dangain" ri vhoeb khang" nhang: ga: tid nau, zi nghoid. Nghoid loug we' zi yoo jo, moojo, ri nya: da" vhoo: moo to" pyam ga: zi gi ngoonu" akhid" amyang boem shi". Nghoid loug we' ngoonu" shau" myang su: gi Mangsoo jeju" yoomo dangain" bang: shid re" yo" kham" shid: sho' ayo, aboin: daso' za: uri moug: lagyoo: yi vhoo: moo khyo' nyhoem: pyam shau" da" Yesu Khristu nyang: nghoid nyid. Hau Aseing koem gi shid: loo" no lo" da" kyikhyeug, khyoo: ri kham: yu bye yoomo Akhid" gi myonhoo: phung" yoeb da" bidmug, zhung" byid: too" bye: ziri ngoonu" shau" myang boem bye:. 10 Nya: zoo: yi myoo" sho' we' myonhoo: phung" yoeb, ri shau" kham: yu wa shid re" Jo, moojo, ri phain" to" lho: yu" goin yu" coung: zung" lhoug nyid da" Mangsoo gi Yesu Khristu ri yaukhi" kyikhyeig shau" nhang: khyo" wigi joeb, byeung" su: bue" loo nhang: da" khyoo: gi yu" du, jo eung: da" khyoo: nghoid. Khasu" wim gari Yesu gi nyangnu" ri khyoid yu da" khyoo: khyo" shu" yhe: loo" su: nghoid nyid. 11 Yesu gi byu xangsu: yi nyangnu" da" yau: noo yooboo mo cid" kyeung' cid" shang: yu bye:. Nyang: yo' dage" cid" shang: yu bye: bang: gi nya: phoo' dayug za: yoo" yoomo nyangnu" ri mangnhung" yi ga: wa ziri nyang: sho' wa zi anghoid. 12 Yesu gi
?Nang zei: da" moo" zo" khyoo: nga" mangnhung" yiri
ngoo tid kyoo" wa nyangnu" da" mo, phung: gung moo
nang ri ngoo jikhoin" yo' coung" nghei byid: wa?
ga: wigi Mangsoo ri tid bye:.
 
13 Hau: lho: Yesu doem tid zigi ?Ngoo gi Mangsoo ri loem" jeing" khau: nghe: nyid wa nghoid? ga: wigi we' Mangsoo ngoo ri byid: too" bye: da" nya: myid: nya: zoo: yi yo' dage" ?He: joyoo moo nyid nyid? ga: wigi we' tid nyid. 14 Nya: zoo: yi ga: nyang: nyangnu" ri myheung byid: ziyo' dakhyoo" ti" suid" shoo" kham: voin da" byu yi nghoid ago". Yesu nyang: we' suid" shoo" kham: voin da" Xangsu: byugung re" kham: yu bye:. Hougsu" kham: yu khyoo: gi shid: loo" no lo" da" khyoo: ri vhoeb khang" nyid da- yu join: da" yoem: vho" ri lhu: phyo' lhu: shoin pyam byid: wa shid re" nghoid nyid. 15 Hid: khyo" wigi shid: loo" no lo" khyoo: ri gyoug wigi pyaid goin" join koid nyid bang: ri lhoid pyoin kaid bye:. 16 Khasu" wim gari nyang: gi moug: lagyoo: yiri pang" thoug wa shid mo re" zi anghoid- Jhoem: mougsoug" moo tid nyid ziyo' dakhyoo" ti" Abraham da" amyed, ashen yi ri pang" thoug wa shid re" ju" re" khyoo: ri thoin" pang byid: nyid. 17 Hougsu" nghoid yoomo nyang: gi byu yi da" yooboo ri yo" khyoid pyam byid: wa shid re" nheig se' khyeug deingbyeing" da" khainjung moo" bue" lo khyo" Mangsoo moozoo" ri yo" voin vu, baja"- khyoo: khaid zoo: khang" moo" moo Nya: mang: nya: nhung" yi thoung" shau" zo: nyid da" khyoo: ri nyangnu" yo' dage" bo shau" kham zoo: bye:. 18 Akhid" nyang: gi jhuphyo' thoung" shau" zoore nya: gung nyang: kyikhyeug, khyoo: shau" kham: yu bye: yoomo jhuphyo' thoung" shau" mo, yo' kyikhyeug, zi shau" nyid mo, ri yo" pang" thoug nyid. .