13
1 Nanu" gi Khristain mangnhung" nyang: cang" nghoid ziyo' dakhyoo" ti" nyang: cang" nyang: jheddab go" nyid ge.
2 Nanu" da" yhoem: mo being" voo ri lhoem: kham: yu lho: byid: zhoo" byid: jhug wa ziri ato" myid goo". Houg: su" byid: zhoo" byid: jhug mo, gi aboin: aso" zi moug: lagyoo: yi ri shau" doo" zho" kaid boem bye:.
3 Nanu" gi thung: moo loung" jo, mo, ri dage" thung: bo lung" mo, yhang: ti" nyangnu" ri daboin: nyid ge. Nyhang" nyang: kyikhyeug, zi shau" nyid yhang: ti" kyikhyeug shau" nyid mo, ri daboin: so" nyid ge.
4 Lo, xo khyoo: rigi byu dangain" mo, phau" myang: coung" nghei byid: nyid boem yoomo yhoem: seing: phoo' yhoem: seing: myhi' gi dayug yo' dayug- zid" lhid' nyid boem ca"- Mangsoo gi aved asam" byo, lho: myi: lhoid' lang' lhoid bang: ri tarha" dang: phyed loo wa zi nghoid.
5 Nanu" da" kangso gyung: khyoo: moo ngei ri myono, vhoo: bo jang" moo abo cang loo" loo: za: te: yo" gu: yo' nheigdeig, nyid gi bye:- Khasu" wim gari Mangsoo gi Ngoo nang ri khanham we' ato" pyam ashe: pyam wa ga: tid nyid .
6 Houg: su" nghoid nyid yoomo hau" Aseing gi ngoo ri pang" thoug su: nghoid, ngoo ce" ja" ri we' gyug aca"- ngoo ri hang" ciyo" koid wa lha" ein: wigi nheigloem: kyung: kyung: ngoonu" tid nyid boem shang.
7 Nanu" ri Mangso mungdang: tid kyo" lid loo bye: da" shid phyang" mo nanu" da" khyoo: shid' vhu" she: loo bye: mo, ri myid boin: nyid ge. Nyangnu" khasu" kangso' dei nyid boem lho: Khasu" shid: lid no lid lo" boem ziri myid boin: myed so" wigi nyangnu" loem" jeing" lo da" akhyoo" joem ri khoo" shid: yu" yu nyid ge.
8 Yesu Khristu gi anyinab, akhid" nyid"- thang: phyang" apyaid atoo: moo we' dakhyoo" ti" danyid nyid.
9 Shid phyang" alhoung myang yu"- alhoung gyo: yu" da" jhau" byid: da" khyoo: joem ri tungbau byumyu" yi gi nanu" ri hau: deingmain" khyoo: mo ashu" hang: lam" loo" nhang: goo". Zoo: noem yo' sen: da" cang yhe: tarha" ri tam" gyo: cang pyeung khyoo: anghoid loo: za: Mangso jeju" mo yoemso ri yo" kham: yu zigi je ge zi nghoid.
10 Yuda byu yi da" noku joyoo mo xoin" to' byid: da" khainjung yi gi ngoonu" da" phoin: tho' mo ce: ja: ri nghoid loug we' zoo: wa da" akhang" ayo" boem nghoid da.
11 Yuda khainjung agyi moo" gi gougnyhoug da" suid" ri yooboo khyoid da" xoin" khyo" wigi gyeungshang: thang da" joyoo khoug: khyoo: ci: vang loo" nghoid loug we' hau: gougnyhoug da" xoin" mang joem rigi dab nghe: shoid moo lhoung, nghe pyam ago".
12 He: khyoo: yoomo Yesu we' nya: da" suid" yo' byu Xangsu: yi ri yau: noo yooboo mo cid" shang: yu wa shid re" voogung nghe: shoid moo shid: kham: abye:.
13 Hougsu" nghoid yoomo ngoonu" we' voogung nghe: shoid mo nya: jhang khyoo: bo thu' yhe: lo" lho: nyang: kham zo: da" asho, ashid: aphoug" akhyoid koid ziri coem kham zo: boem shang.
14 Khasu" wim gari he: da" mougmyid tho' moo ngoonu" shid re" geingteing da" joyoo ajo, yoomo thang: phyang" ju" loo wa da" voogung ri ngoonu" dasho: nyid boem.
15 Houg: su" nghoid yoomo ngoonu" gi nyang: ri ngoonu" da" Aseing nghoid ein: yhen: yu da" nhoid joem yo' jeju" ri coung" byid: da" ngoonu" xoin" joem ri Aseing Yesu khyo" wigi Mangso jhang khyoo: khanham we' dangei" byid: nyid boem shang.
16 Ge, da" moo" zoo" moo nanu" nyang: cang" nyang: pang" thoug goo" wa da" khyoo: ri ato" myhed pyam goo". Khasu" wim gari houg: yhang: te" da" xoin" gi Mangsoo vho: ngei nyid xoin" nghoid.
17 Nanu" ri khyoo: shid' vhu" shu" she: nyid mo, da" dang: ri tam" gyo: nyid lho: wigi nyangnu" tid to" da" dang: khoin" joem ri cang yhe: loo" ge. Nyangnu" gi nyangnu" zei: byid: loo bye: da" moo" zo" zhayen" joem ri Mangsoo ri toin" shid boem wa zi nghoid wigi nyangnu" gi nanu" da" nheigloem: ri atheung: anoo: loo: zung" lhug nyid. Nyangnu" dang: ri nanu" tam" gyo: nyid boem nghoid rigi nyangnu" zei: da" moozoo" ri- gau yi ziyo' zei: boem wa zi nghoid. Houg: su" anghoid rigi nyangnu" nheig koug ziyo' zei: boem wa nghoid wigi nanu" shid re" ce" akyu" we' yo" ze" bui" goo" wa zi anghoid.
18 Ngoonu" shid re" atheung: anoo: loo: akyu" mho' nyid ge'. Ngoonu" gi ngoonu" nya: da" phug, soo" lheig myid yu" emyed gi gyeing" gyeungshang: shang: nghoid da" khyoo: ri loem" jeing" nyid boem. Khasu" wim gari ngoonu" gi ayo, loem: khang" moo" moo deingmain" da" moo" zei: nau nheigloem: bo nyid boem.
19 Mangsoo gi ngoo ri nanu" jhang khyoo: phyed doem" ju" ri" nhang: wa shid re" soo" soo" nyang: akyu" mho' goo" baja"- ein: ngoo nanu" ri joug, jhoin" lho: mho' kaid zi nghoid.
20-21 Nya: kangso ri xoin" to' pyam lho: shid: kham: ziyo' apyaid atoo: moo dang: theing go" to" da" dazid ri thung" bye: yoomo Yang phung: yi da" yang lhug zoug: moo" ein: da" ngoonu" da" Aseing Yesu ri Mangsoo gi shid: jangmo doem dei to' loo nhang: bye:. Nanu" gi nyang: myid vho: khyoo: ri yo" cang dei: loo" wa shid mo nanu" moo ca" nyid da" khyoo: khaid khang" moo" ri- ngei pyo: Aseing Mangsoo gi nanu" ri joeb, byeung" loo nhang: baja"- Aseing gi nyang: myid vho: ziyo' dakhyoo" ti" Khristu da" gang mo nanu" ri joeb, byeung" loo nhang: loo nhang: bye:. Yesu Khristu moo myonhoo: phung" yoeb, gi apyaid atoo: dajo, jo, baja" o".
22 Mangnhung" yi we"- he: da" yoem: byid: tid poin" tid kyeung" nyid da" mungdang: ri kham zeung: ziyo' tam" gyo: yu wa shid mo ngoo nanu" ri mho' sang: kaid. Khasu" wim gari ngoo nanu" jhang khyoo: lhid" kaid da" he" mougsoug" gi gye" sheung: zi anghoid.
23 Ngoo nu" da" mangnhung" phoo' Timothi gi thung: yhoem: mo loid, thu lo da" khyoo:- nanu" ri si nhang: nau. Nyang: gi nga" jhang khyoo: ayo, myhi: ju" re" nghoid rigi nanu" yo" we' shoug" goo" wa shid mo ngoo ju" re" uri nyang: ri ngoo yo' dage" bo shu" ri" wa.
24 Nanu" da" khyooshed' vhu" shi: bang: dangain" yo' Mangsoo da" byumyu" dangain" bang: ri bo vhu" byid ge. Itali mung" mo mangnhung" yi gi nanu" ri vhu" kaid ago".
25 Mangso jeju" gi nanu" dangain" bang: yo' dage" dajo, jo, baja" o".