11
1 Loem" jeing" khyoo: ein: zigi ngoonu" nheig byu to" da" zi joem ri gyeing" nyang: bue" loo wa" ein: da" khyoo: ri nheig shid: nheigdeig nyid ziyo' amyang yu" shi" da" zi joem ri gyeing" nyang: jo, bye" ein: se' gyo: loem" yu khyoo: ri loem" jeing" khyoo: ga: zi nghoid.
2 Goonham mo da" byu yi gi nyangnu" gi loem" jeing" da" nheigloem: bo boem yoo mo Mangsoo myed vhoo: myed ngei lho: joo bye: ga: da" khyoo: ri yo" yu boem bye:.
3 Amyang yu" shi" da" zi joem mo myang yu" bye: da" zi joem bue" loo wa shid re" Mangso mungdang: yo' he: da" jo, moojo, ri phain" too" bye" khyoo: ri nyangnu" gi yo" se' yu boem bye: zigi hau: loem" jeing" da" nheigloem: yoomo nghoid nyid.
4 Loem" jeing" da" nheigloem: yo' Abela gi Ka-in tho' moo je" ge da" xoin" ri ngei" byid: bye:. Nyang: loem" jeing" khyoo: ri yu" yu" lho: nyang: ri deing byeung" da" byu- ga: wigi Mangsoo lhoem: kham: yu byid: abye:. Khasu" wim gari nyang: to' byid: da" xoin ri Mangsoo nyang: vho: ngei nyid yoomo nghoid- Abela gi shid: byug bye: nghoid loug we' loem" jeing" khyoo: yoomo akhid" nyid ju" sho' nyang: gi dang: da tid nyid ashi.
5 Loem" jeing" yoomo Enug gi ashid: loo: za: Mangso wigi shu" to' yu ziri shau" abye:. Houg: yoomo nyang: ri hang" we' amyang loo- Mangso wigi shu" to' yu zi ashoug" shi" da" uri Enug gi Mangsoo vho: ngei nyid su: nghoid, ga: wigi jhoem: mungdang: moo bo nyid.
6 Loem" jeing" zi abo nghoid rigi hang" we' Mangsoo vho: ngei zi ayo" bui. Khasu" wim gari Mangso jhang khyoo: yu: vang loo" mo, hang" we' Mangsoo nyid nyid ziyo' nyang: ri cang shoo: bang: ri jeju" toug" byid: nyid ein: da" khyoo: ri yo" loem" jeing" su: nghoid wa zi nghoid.
7 Ju" loo wa da" ayo, moo bue" loo wa da" amyang yu" shi" da" zi joem yo' sen: lho: wigi Mangsoo tid poin" nyid ziri No- a shau" gyo: zigi nyang: loem" jeing" nyid yoomo nghoid. Nyang: gi Mangso dang: ri tam" gyo: wigi Sangphoo' lhid daloem: ri zhug lho: nya: yhoem: ekoin deungkhu: ri yo" khyoid yu abye:. Hougsu" nghoid yoomo mougmyid ri nyang: dang: phyed wigi No- a gi loem" jeing" khyoo: yo' sen: da" deingmain" da" agyid asoo: ri yo" kham: yu abye:.
8 Abraham gi Mangsoo nyang: ri byid: wa"- ga: da" dang: soo" bo nyid da" mung" khyoo:- thu' yhe: loo" wa da" shid re" loem" jeing" nheigloem: gi nyang: ri tam" gyoo: nhang: nyid. Houg: yoomo nyang: gi khakhyoo: yhe: loo" wa zi lang" ase' zi nya: mungdain: mo wigi thu' so" loo" bye:.
9 Mangsoo dang: soo" byid: to" da" mung" khyoo:- nyang: gi being" voo yhang: ti" yhe: nyid yen". Nyang: gi Mangso jhang mo, nyang: yhang: te" dang: soo" khoin" da" agyid asoo: ri yo" coem, kham: yu da" Isag' yo' Yaku, yhang: ti" pain" zoem" khoug joem moo loung" jo.
10 Khasu" wim gari Abraham gi Mangso wigi akhyoo" toin" shid lho: geingteing da" apoem: ayang: yo' bain zhoug too" bye: da" voogung ri nyang: gi nheig byu lho: dalang" nyid.
11 Abraham gi gye" mang: loo" bye:. Sara nyang: we' apyaid bain lid loo" bye: yoomo zoo: age yoo" loo. Nghoid loug we' Abraham da" loem" jeing" nheigloem: yoomo zoonu" nya: ba" doem yo" bue" loo bye:. Mangsoo gi nya: dang: soo" khoin" byid: to" ziyo' dakhyoo" ti" ge da" Aseing nghoid nyid ziri Abraham gi loemkhau: nyid.
12 Abraham gi gyeing" nyang: sushid: gung te" da" yug gi danghoid loo: loug we' nyang: dayug mo nyid byo lo da" nya: myid nya: zoo: yi gi Mougkhung: mo kyi: joem myhoo,- panglai: gyid yam, mo atho' nghab da" midcoo: doem: yhang ti" myo: lug da" myid: yi zoo: yi nyid je: lo boem abye: go".
13 He: da" byumyu" yi dangain" bang: gi hau: loem" jeing" khyoo: moo shid: lo" boem abye: go". Nyangnu" gi Mangsoo byid: da" dang: soo" khoin" yo' sen: da" agyid asoo: ri ashau" kham: yu boem- nghoid loug we' nyangnu" gi hau: khyoo: ri vi" vi: mo yo" yu" myang boem bye: ziyo' lhoem: yo" tau, yu nyid boem bye:. Nyangnu" gi he: mougmyid tho' moo lam" yen" da" tungbau, being" voo joem yhang: ti" te: nghe: khau: nyid mo, date: nghoid nyid boem ziri bang bang za: yhen: yu khare" boem bye:.
14 Hau: khyoo: joem ri hougsu" ga: wigi tid mo, gi nyangnu" nyid wa da" mungdain daloem: sho: nyid boem zigi bang bang myang nyid.
15 Nyangnu" gi nyangnu" thu' too" kho' da- voogung mungdain ri myid boin: lho: nheignge nyid boem zi anghoid- hau: mung" moo dato' loo" nau: rigi yo" lo" da" akhang" yoo" mo, nghoid.
16 Akhid" koem gi hau: tho' mo je" pyo: da" mougkhung: mougdi mo voogung mungdain ri nheignge nyid boem- houg: su" nghoid yoomo Mangsoo gi nyangnu" da" Mangsoo ein: wa ziri sho: nyid zi anghoid. Khasu" wim gari Mangsoo gi nyangnu" nyid wa da" joyoo daloem: ri nyheung too" byid bye:.
17 Abraham gi Mangso wigi ca: yu" zi shau" nyid uri loem" jeing" ziyo' nya: zoo Isag ri xoin" du: khyo" ngei" byid: pyam bye:. Abraham gi Mangso jhang mo dang: soo" khoin" kham: yu shau" su: nghoid- nghoid loug we' nyang: gi nya: zooti" zoo: ri xoin" du: khyo" ngei" byid: pyam wa zi jen" nyid gu nghoid.
18 Mangsoo gi Abraham ri Ngoo nang ri dang: soo" khoin" byid: to" da" amyu" akung: ako' joem Isag mo wigi nyid yab, byo lo boem wa,, ga: wigi tid to".
19 Mangsoo gi Isag ri shid: jangmo doem dei to' loo nhang: wa ga: wigi Abraham myid soin: to" ziyo' dakhyoo" ti" gyeing" nyang: Abraham gi Isag ri shid: da" jangmo doem yo" yu bye:.
20 Loem" jeing" ziyo' Isag ri ju" loo wa da" ayo, moo kham: yu wa zi nghoid da" mainkaid jeju" yo' sen: lho: wigi Yaku yo' Eso eig yug ri dang: soo" khoin" khyo" mainkaid byid: bye:.
21 Loem" jeing" ziyo' Yaku gi nyang: shid: lo" nyid uri Yoseb da" nya: zo: eig yug ri mainkaid byid wigi nya: lham: dung: phyoo" moo thoug nghe: ci: lho: noku da.
22 Loem" jeing" ziyo' Yoseb gi nyang: shid: wa zi jhang lo da" uri Israela byumyu" yi Egutu moug: mo byoin, thu loo wa da" khyoo: ri tid kyeing" tid poin" kyo" lho: nya: shooyoug: shooyang" joem ri khasu" koid wa da" khyoo: ri we' pyeing: too" kho.
23 Loem" jeing" ziyo' Moshe da" nya: myhi' yo' nya: pho eig yug gi nyang: ri bain khu: lang" lhammoo" soem" khyab,- nyang: ri yhoem" to". Moshe gi gye" young" da" zoonu" nghoid ziri nya: eig yug myang yoomo Khokham" tid to" dang: ri ngeug pyam wa ziri agyug nghoid ago".
24 Hau" Moshe gyi: loo lang" gi Yu Phara, u myiyi: zo: da" nya: zoo: ein: wa ziri ngeug pyam bye:.
25 Nyang: gi dayo' daboin: za: yooboo da" pyo: khyoo: moo Mangso da" byumyu" yi yo' dage" yaukhi" kyikhyeig shau" wa ziri nyang: je vho: nyid.
26 Nyang: gi Meshia shid mo juang" yi boem zi shau" wa shid re" gi Egutu ziyoo jonu" dangain" tho' moo gi je ge nyid"- ga: myid soin: bye:. Khasu" wim gari nyang: gi ju" loo wa da" ayo, moo shau" kham: yu wa da" myonhoo: ngi: shab jhung shug ri nheig byu lho: dalang" nyid.
27 Loem" jeing" ziyo' Moshe gi Khokham" phoo' nheig yoo: wa ziri agyug loo: za: Egutu moug: mo thu lo" abye:- Nyang: gi myojid" yo' amyang da" Mangsoo ri myang yhang: ti" nyang- Egutu moug: khyoo: doem tau" loo" khyoo: ri ngeug pyam bye:.
28 Nyang: gi loem" jeing" ziyo' zooshid" yi ri said pyam lo da" moug: lagyoo: yiri Israela byumyu" yi da" zooshid" yi ri abo said pyam wa shid re" lhid: kaid da" pui" ri shu" koid shed" wigi yang suid" joem ri khoem" bung' zeing yo' khoem" baid joem moo byeug, sain" gyoin: too" wa shid re" pyeing: too" bye:.
29 Loem" jeing" ziyo' Israela byumyu" yi gi tung: gung yhang: ti" gyid thoem" ni khoug: khyo" yo" phyed lo boem bye:. Egutu byu yi we' houg: su" bo gu: neug, ca: yu" boem ga: rigi noeb, shid: lo" pyam byug boem bye:.
30 Loem" jeing" ziyo' Israela byumyu" yi gi nyhed' nyid" bain sho' Yerikho" voogung ri bain so" lheung yu thang: ri hau: voomoo" vang khyam: ri yo" khyau" mhoin' phyo' sain" byid: pyam boem bye:.
31 Loem" jeing" ziyo' shava myhi' Rahab, gi Israela dab mo joo" yu" mo, ri si' go" khyo" lhoem: zoem" khau: kham yu yoomo Mangsoo ri atam" gyo: da" yooboo yo" mo, ri said pyam da" jang" moo abo shid:.
32 Ngoo xo' tid shi" wa la". Khasu" wim gari Gidon gi: Barag Samson Yebtha- David Samuela yo' lapi yi dangain" mo, da" khyoo: ri tid kyoo ba, ein: rigi nga" da" ayo, gi tho' tham: wa zi anghoid.
33 Houg: bang: gi loem" jeing" ziyo' sube" mung" ri gyi zain: lho: yo" oung: lo boem- nyangnu" gi deingmain" khyoo: ri cang zei: lo" boem wigi Mangsoo byid: to" da" dang: soo" khoin" ri shau" kham: yu boem bye:.
34 Gye" thain: nge" da" myi: so' ri we' yo" said pyam boem wigi sube" sham: soo" mo we' yo" loid byoin, lo" boem bye:. Nyangnu" gi yoem: nu: boem nghoid loug we' yoem: foin, byid: zi yo" yu boem yoomo gyi zain: jang: moo sarhi' yo" koid boem ziyo' tungbau gyiphung: joem ri yo" zain: oung: lo" boem.
35 Myi: yi yi we' loem" jeing" ziyo' shid: byug bye: ngoonu" da" bidnoem yi ri doem dei to'' loo nhang: khyoo: ri doem yo" yu boem bye:. Byu dayham" gi nyangnu" ri lhoid pyoin kaid wa ga: da" amyeung" akhang" ri atam" gyoo: loo: za: je" ge thang da" kangso dei khyoo: khyoo: dei to'' lho: yo" vang loo" wa shid re" shen" yhen khyoo: kham zo: lho: shid: lo" boem bye:.
36 Dayham" ri gi juang" yi gei sang: lho: yug baid said pyam wigi dayham" rigi myheug tei" thung moo lhoung pyam zi shau" nyid ago".
37 Nyangnu" gi lug go, yo' du" said pyam zi seig sheig yo' adu du sheug phyid pyam zi sham: yo' jab, said pyam zi shau" nyid ago".
38 Nyangnu" gi sho" jhin: yaukhi" zi shau" boem wigi nghe: khoug: jang: sho: yhen" da" byu yi yhang: ti" siyoo sigam: moo boem moug: mo lug ug joem moo myid khyung: joem moo cang nyid yen" boem ago".
39 Houg: bang: dangain" mo, gi nyangnu" da" loem" jeing" khyoo: yoomo coung" byid: nghei byid xoin" to' zi shau" yu boem ago". Nghoid loug we' Mangsoo byid: to" da" dang: soo" khoin" mo agyid asoo: gi ashau" kham: yu boem shi" nghoid ago".
40 Khasu" wim gari Mangsoo gi nyangnu" shid re" je" ge da- nyheung, soin' khyoo: ri koid too" byid: bye:- houg: su" nyheung soin' to" da" khyoo: joem gi nyangnu" gi ngoonu" bo ri za: joeb byeung" mo, yo" bue" loo wa shid mo nghoid nyid.