HEBRE
BANG: JHANG FOIN: KAID DA" MOUGSOUG"
(Hebrews)
He: da" Hebre byu yi jhang foin: kaid da" mougsoug" gi lagyoo: Polu lhid" zi nghoid ga tid ago". Hau: lho: he: pyaid mo da" jhoem: mougsoug" sara yi we' lagyoo: Polu lhid" foin: jang" moo bo kaid to" ago". Nghoid loug we' Martin Luther yo' Calvin Baza gi Polu lhid" zi anghoid ga: tid nyid ago". Phoung da" nya: phoo Origen gi hang" lhid" to" ein: zigi yhau: gyen: zi anghoid- mougsoug" moo ce: noem jhau" byid: nyid ein: zi za: yhau: gyen: da" zi nghoid. Hang" lhid" zigi Mangsoo dase' ngoonu" we' houg: su" kham: yu boem shang- khakhyo" nghoid loug we' lhid" su: gi Yuda byumyu" yi da" loem" jeing" khyoo: yo' noku coung" nghei khyoo: ri jid" jid" nug nug se' da" Hebre Khristain byu dayug nghoid eung- lhid" su: gi Yerusalem voo mo Hebre Khristain byu yi khyoo: ri tid nyid yoomo Yerusalem voomoo" byo, lo" thang: ri AD, 70 zain da" shid moo lhid" too" eung bye:. Hebre mougsoug" gi Khristain laloem lakhau: ri je" je thug theung khaid zain: khyoo: alhung: adam: shau" nyid boem yoomo Khristain loem" jeing" da" khyoo: ri alug, lug ci: phyoug da" akhyoo" khyoo:- Khristain phung: zoo: daloem ri lhid" kaid da" mougsoug" nghoid.
Mougsoug" lhid" su: gi Aseing Yesu gi Mangsoo da" khyoo: ri deingmain" khyo" lo" thang moo thoin" pang byid: su nghoid. Hau: khyoo: ri toin" shid zoore nyangnu" da" loem" jeing" khyoo: ri yoem: byid: nyid. Houg: su" yoem: byid: jang" moo vhoo: mo khyoo: soem" khaid ri ayang: qei" to" khyoo: ri yo" myang.(1) Aseing Yesu gi kyikhyeig kham lho: Nya: phoo Mangso da" dang: ri tam" gyo: nyid Mangso da" apyaid atoo: mo nya: zoo: nghoid nyid lho: nyang: gi thang" cab xoug" pyaid mo lapi: yi da" tho' mo we' moug: lagyoo: yi da" tho' mo we' je" gyi: su: nghoid nyid. (2) Aseing Yesu gi thang" cab, xoug" jhoem: mougsoug" mo khainjung agyi moo" nghoid nyid da" khyoo: ri Mangso wigi tid fu" byid: nyid. (3) Aseing Yesu ri loem" jeing" bang: gi yau: noo yooboo yo' shidgyoin noogyoin gyoug ci' pho" jangmo we' khyoid khyi: yu zi shau" bye:. Yuda yi da" noku thung yo' xoin" ngei" byid: da" khyoo: joem gi khyoid yu khyoo: moo ce" noem ca" nyid ein: ziri ayoeb, abang shi" toin" shid nyid zi za: nghoid wigi nya: gung du nyang: ce" yooboo adab da" xoin" du: bue" wigi dalheung: dam moo bain sho' da" xoin" to' pyam byid: ziyo' deingmain" da" khyoid khyi: yu khyoo: ri yo" byid: da" Aseing gi nyang: nghoid khyoo: ri lhid" kaid to".
Israela byumyu" mo myeing thu da" byu dayham" bang: khyoo: yo'- nyangnu" dayham" gi Mangsoo ri khayhi' loem" jeing" lo da" khyoo: ri( hebre 11) moo dang: tu byid: to" lho: he: mougsoug" ri nghab mo, gi hau" Aseing ri xo' lho: loem" jeing" loo" wa da" khyoo: ri (12) moo Aseing ri yu" zhoug to" lho: lo" thang moo ju' sho' zid" lhid, nyid ca" da" khyoo: ri ce" ja" wigi pyi: sho: shen" yhen loo nghoid loug we' yoem: kaid zeung: oung thoug shang" loo" ca" da" khyoo: ri yoem: byid: nyid. Hau: thang: ri phajhi" byid: da" dang: joem zid" lhid nhang: da" dang: joem yo" lhid" pug" ri athang: said pyam bye:.
1
Goonham, da" apyaid moo Mangsoo gi ngoonu" da" phoug" phyid" yi ri dang: tid da" khyoo: myoo" sho' lheing- akhyoo" again aja: ja: khyo" lapi: yi da" nhoid mo tid kyo" lid loo bye:. Nghoid loug we' he: da" lo" thang apyaid ayo, moo koem gi nya: zo: nhoid mo wigi ngoonu" ri nya: mungdang tid too" byid: bye:. Hau: nya: zoo: yo' nyang: jo, moojo, ri phain" so: too" byid: bye:. Lo" thang jang" moo gi mougmyid jo, moojo, ri vhoeb khang" wa nyang: ri Aseing bui" wa shid re" khyen: nyheung too" bye:. Nyang: gi Mangso myonhoo: phung" yoeb, ri thoin" pang shug wigi Mangsoo nya: da" gungdu: azuang, ri void ci: lho: wigi mougmyid yoosoo" yo' mougkhung: mougdi bid kyi: lhammoo" dangain" ri nya: da" phung" yoeb, yoem: moo" bo da" mungdang: yo' zung" lhug goem coung: too" bye:. Nyang: gi Xangsu: byu yi da" yau: noo yooboo ri bain khyoid khyu: cid" yung" cid" lho, yu thang: ri mougkhung: mougdi tho' moo phung" yoeb, yoem: moo" bo Mangsoo da" lo, yo shoid moo zhoung: jo, bye:.
Nyang: ri Mangsoo byid: to" da" voolang' myeing yung" khyang" gi moug: lagyoo: yi da" myeing tho' moo je reung su: bue" loo nhang: bye:. Khasu" wim gari Mangsoo tid zigi Nang gi nga" zoo: nghoid nyid da- akhid" nyid" ngoo gi re" phoo' bue" loo bye:- ga: Mangsoo gi kha: moug: lagyoo: ri we' khanham we' atid yu". Nghoid loug we' Mangsoo gi Nya: zoo: mang: moo" ri mougmyid tho' khyoo: nhang: kaid wa ga: soin' uri nyang: tid zigi ?Mangso da" moug: lagyoo: yi dangain" nyang: ri noku coung" nghei boem wa? ga: wigi tid to" abye:. Mangsoo gi moug: lagyoo: yi da" khyoo: tid uri Mangsoo gi nya: moug: lagyoo: yi ri lid' koid lho: Nya: deizoo: yi ri dab nyid da" myiyham: doem koid- ga: tid. Hau: lho: nya: zo: khyoo: doem tid uri gi Mangsoo gi Phoo Mangsoo we"- re" da" mungdain apyaid atoo: dajo, jo wa Nang gi re" da" byumyu" yi ri tarha: nyeung, veung" khyo" vhoeb khang" nyid wa zi nghoid. Nang gi deing byeung" khyoo: ri jheddab nyid wigi shoid vhang: khyoo: ri avhoo: angei nyid nghoid da. Houg: yoomo re" Mangsoo ein: da" Mangsoo gi nang ri khyen: yu lho: re" da" byencang" yi ri byid: tho' moo- je" gyi: gau yi ein: da" mainkaid xu: joid byid: wigi tu: to' tu: coung" too" bye:-" ga: tid. 10 Hau: lho: nyang: doem tid zigi Aseing we" xangshid" moo mougmyid ri nang phain" to" lho:- re" da" lo, yo' mougkhung: mougdi ri koid too" bye:. 11 Houg: bang: gi doem byug thang loo" wa zi za: nghoid- nghoid loug we' Nang koem gi dageing: teing jo, wa zi nghoid. Nyangnu" dangain" mo, gi byimi, yhangti" phoojoid, bue" lo" byug boem wa zi za nghoid. 12 Nang gi thobyi: ri yhang: ti" deung: shoung: pyam zi shug" lhoo: byimi yhang: ti" thid lo" wa nghoid loug we' nang koem gi dageing: teing jo, wigi Re" da" apyaid we' thang ga: zi jo, wa anghoid. 13 Mangsoo gi nya: moug: lagyoo: yi ri doem tid zigi Re" da" gyivoo joem ri re" da" khyid: nang: wa da" zhungtang ngoo bui" nhang: jang" moo ju" sho' nga" lo, yo shoid moo dazhoung: jo, shi" we' ga: wigi kha: moug: lagyoo: ri we' khanham we' atid yu".
14 Hougsu" nghoid rigi moug: lagyoo: yi gi hang" nghoid lha". Nyangnu" gi khyoid yu shau" da" agyid asoo: kham: yu bang: ri pang" thoug wa shid mo Mangsoo nhang: kaid zi shau" da" Mangsoo ri noku nyid Venyi: joem nghoid ago".