4
Lo" thang jang" moo gi- mangnhung" yi we"- Mangsoo vho: ngei wa shid re" nanu" gi kha: khyo" kangso dei nyid ca" da" khyoo: ngoonu" jhang mo nanu" jhau" yu abye: go". Nanu" gi hau:khyoo: khyo" nyang: kangso dei nyid boem bye:- hau: tho' moo je" yo" zei: soo, wa shid re" Yesu Khristu da" myeing khyang" khoug: moo nau" ri ngoonu" mho' mho' sang: joug, jhoin" kaid boem. Khasu" wim ga: ri khate" da" khyoo" shed' dang: joem ri Aseing Yesu da" akho: akhang" yo' ngoonu" byid: too" bye: ziri gi nanu" nyang: se' nyid boem bye:. Ngoo gi nanu" ri gyeungshang: mo, bue" loo nhang: nau, ziyo' nyam, da" moozoo" mo bain sho' yo" loid loo" wa shid re" vho: ngei nyid. Nanu" yug gi yi dayug yo' dayug gi nyang: nya: da" yhoem: seing: myhi' yo' gyeungshang: lho: yu" yung" sho' khakhyo" nyid wa da" khyoo: ri si' ca". Mangsoo ri ase' da" tungbau byumyu" yi yhang: ti" nyam, mhain: da" nheigloem: age boo. Hid: yhang: te" da" moo" zoo" moo nanu" mo hang" nghoid loug we' nyang: nya: da" Khristain mangnhung" phoo ri shoid vhang: da" khyoo:- houg: su" anghoid lang" gi mangnhung" pho da" atho' moo lhoid, sham: zain: da" khyoo: ge koid- he:khyoo: xangshid" moo nanu" ri tid kyo" yu" bye nghoid yoomo Mangsoo gi shoid vhang: bang: ri shen" yhen wa da" khyoo: nanu" ri thain: thain: nyang: tid poin' kaid bye:. Mangsoo gi nyangnu" ri agyeungshang: da" kangso dei khyoo: moo kangso dei nyid wa shid re" khe: yu to" zi anghoid- gyeungshang: da" kangso dei khyoo: moo lhid wa shid re" dakhe: yu to". Hougsu" nghoid yoomo he: da" jhau" shid khyoo: ri ngeug pyam mo, hang" nghoid loug we' byu yiri anghoid- gyeungshang: da" Venyi: ri byid: kaid su: Mangsoo ri ngeug pyam su: nghoid. Nanu" da" loem" jeing" mangnhung" phoo' ri jheddab wa da" khyoo: yo' sen: lho: wigi ngoo nanu" jhang khyoo: lhid" kaid anoo" loo: nyang: cang" nyang: jheddab go" nyid wa shid re" Mangso wigi jhau" byid: nyid ziri nanu" shau" kham: yu boem bye:. 10 Gyeing" nyang: ga: rigi nanu" gi Makedoni mung" goin" jangmo Khristain mangnhung" yi dangain" bang: yo' zoem" khau: jang" moo houg: khyo" jheddab go" da" khyoo: ri cang lo" boem bye:. Houg: yoomo mangnhung" yi we"- nanu" da" jheddab nheigloem: je gyi: loo wa shid re" nanu" ri ngoonu" mho' nyid. 11 Nanu" gi xangshid" ri ngoonu" tid pyeing: too" kho' ziyo' dakhyoo" ti" myen, jham" za: cang yhe: kangso dei nyid wa shid re" we' byu gooji yi da" khyoo: moo abo tid phyo' lhu: lheug, yen" wa shid re" we' nyang: nya: da" voemdoug: khu: moo' zoo" ri nyang: nyang: hougsu" da zei: zo: nyid wa shid re" we' myid soin: to" boem goo" baja. 12 Khyoo: he: khaid khyo" wigi nanu" gi loem" jeing" bang: phung: byu anghoid mo, da" phau" myang: khyoo: ri shau" kham: yu boem wa zi nghoid- hau: tho' moo gootu: nanu" da" ca" yo, khyoo: yo' sen: lho: hang" ri we' anghe: khoug ca" lo: boem wa zi nghoid.
13 Ngoonu" da" mangnhung" yi we' nheig byu jang: ayoo" lo: da" byu gooji yi yhang: ti" nanu" kougshu: zi ashoug" goo" baja" nyhang" gi shid: loo" bang: yo' sen: lho: wigi hau: deingmain" da" khyoo: nanu" ri se' gyoo: nhang: nau. 14 Aseing Yesu gi shid: jangmo doem dei to'. Lo da" khyoo: ri nanu" loem" jeing" nyid boem nghoid rigi Yesu ri loem" jeing" lho: shid: lo" byug bang: ri we' Mangsoo gi Yesu yo' dage"- nya: jhang khyoo: shu" loo wa zi nghoid- ein: ngoonu" loem" jeing" nyid boem. 15 Akhid" vhoo: moo ngoonu" ri jhau" byid: to" da" khyoo: gi Aseing Yesu nyang: jhau" byid: da" khyoo: nghoid bye:- Aseing Yesu nyang doem ju" re" da" bidnyid moo ngoonu" dei nyid shi" bang: gi shid: loo" bye: bang: da" shid khyoo: dajhi' we' yhe: loo" lang" wa zi anghoid. 16 Hau" Aseing da" yoid nyho: amyeung" thui: yo' moug: lagyo: agyi da" thui:- Mangso laboo" thui: zeing yo' Aseing nyang: mougkhung: mougdi mo gyoo" loo wa zi nghoid- Khristu ri loem" jeing" lho: shid: loo" bang: gi xangshid" moo dei to'' lo boem wa zi nghoid. 17 Hau: thang: ri hau: Aseing yo' mouglaid phyoo" moo shau" goo" wa shid re" ngoonu" dei nyid shi" mo, gi shid: loo" bye: mo, yo' dage" jhoem" moug" phyoo" moo shu" do, lo" zi shau" boem wa nghoid wigi ngoonu" gi hau" Aseing yo' dage" khanham we' danyid nyid wa zi nghoid. 18 Hougsu" nghoid yoomo he: dang: joem yo' nanu" nyang: cang" nheig teung, yoem: byid: go" nyid ge.