1 Yoseb gi nya: phoo gung tho' moo nya: gung yo' nhe' zeig lho: ngau wigi nya: myonhoo: moo babug bug byid: da:. 2 Hau: thang: Yoseb gi nya: phoo mang ri aboeb wa khyo" nam: pyo: xu: yo' macid" sara: yiri nyheing nhang: bye:. 3 Aboeb loo: sho' koid too" yoomo hau: mang ri myid: xi: nyid" to" to" boem. Egutu byumyu" yi we' Yoseb da" gang mo nyhed xi: nyid" nyang: bo ngau nyid boem ago". 4 Koug shu: da" ayo, lid: khari" lang" Yoseb gi khokham da" zoug: ludaid yiri ?Jeju" mo he: lu dang: khokham jhang di" byid: goo" la? ga: tid. 5 Nga" phoo nyang: ashid: shi" ri nyang: soin' nyheing to" da" Khanan mung" mo lug khyung: moo nyang: ri lo" myhoeb byid: wa shid re" nyang: gi ngoo ri dang: theing jham tang: nhang: da:. Houg: yoomo nga" phoo ri lo" yo" myhoeb wa akhang" byid: we' houg: lho: ngoo doem tau" loo wa? ga: tid. 6 Khokham phoo gi ?Nang dang: theing byid: to" khyo" re" phoo ri lo" myhoeb shoung: we'? ga: doem tid. 7 Houg: yoomo Yoseb gi nya: phoo ri lo" myhoeb bye:. Khokham da" zoug: ludaid yi dangain"- khoo" khoug: mo nheigboo zookho' yi dangain" yo' Egutu mo nheigboo vhujhung: yi dangain" bang: gi Yoseb yo' dage" cang lo" boem ago". 8 Nya: yhoem: byu- nya: mang: nhung" yi yo' nya: phoo da" yhoem: byu yi dangain" bang: we' bo cang lo" boem. Zoonu" zooshang: yi yo' nyangnu" da" yang phung:- coid phung:- yo' nu: phung: joem za: Goshen moo nyid gyoo" kho' boem da:. 9 Myang: rheing" khaid mo, yo' myang: zhung: gyizoo: yi we' nyang: yo' dage" bo cang lo" boem wigi hau: zigi byu phung: moo" zeing nyang: nghoid bye:. 10 Nyangnu" gi Yodan da" bidthu shoid mo Atad mo gug nang: jang: moo lo" ju" lang" nyangnu" gi soo" soo" myang" sho' thui: moo" yo' lo" ngau boem lho: Yoseb gi kougshu: ngougmyeing" to" da" pui" nyhed nyid" lo" koid. 11 Khanan mung" byu yigi hau: byuphung: yi Atad moo ngau nyid ziri myang lang" nyangnu" gi ?Egutu byumyu" yigi cite" ngau myeing" shoo" thui: pui" zeing koid nyid bye: go" la'? ga: tid boem ago". Hau: zigi Abela- Mizraim ga: wigi hau: joyoo myeing yo" lo" da" khyoo: nghoid. 12 Houg: yoomo Yaku da" nya: zoo: tang: yigi nyang: nyangnu" ri amyeing" byid: khare" khyo" nyang: koid boem bye:. 13 Nyangnu" gi nya: da" mang ri Khanan khyoo: ci: lo" lho: loeb yoo khyo" Hiti byumyu" Ephron jang" mo Abraham qei to" wigi Mamre da" bidthu shoid dain" moo jo, da" Makphela mo lug khyung: moo nyang: ri lo" myhoeb bye:. 14 Yoseb gi nya: phoo ri bain myhoeb shoung: thang: ri nyang: gi Egutu mung" khyoo: nya: mang: nhung" yi yo' houg: moo cang loo mo, dangain" bang: yo' dage" doem tau" loo bye:.

15 Nyangnu" nya: phoo shid: byug thang: ri Yoseb da" nya: mang: bang: gi Yoseb gi akhid" ju" sho' ngoonu" ri ngheing" lho: nyhang"- nyang: ri koid yhang: ti" nyang: ri we' latoo: to' phug loo abe? ga: tid go" nyid boem ago". 16 Houg: yoomo nyangnu" gi Yoseb jhang mungdang: pyeung: kaid zigi ?Nyha" phoo ashid: shi" ri 17 Nang ri tid wa shid re" nyang: ngoonu" ri tid kho' zigi nang gi nyangnu" koid lid lo da" re" mang: bang: da" shoid vhang: yooboo ri khyoid byid: we' ga: tid khare". Re" phoo da" Mangsoo dei zoo: yi koid lo yhang: ti" akhid" ngoonu" zei: shoid lo da" yooboo ri khyoid byid: la? ga: kyo" kaid ago". Yoseb gi hau: lu dang: ri shoug" gyoo: lang" ngau bye:. 18 Hau: thang: nya: mang: nhung" bang: nyangnu" nyang: re" lho: nya: shidkhoin" moo re" goeb pid boem ago". ?Re" da" join yi ngoonu" gi re" da" shidkhoin" hid: moo re" nyid nyid bye:? ga: nyangnu" tid boem. 19 Hau: thang: Yoseb nyangnu" ri ?Seing" akhoo" goo"- ngoo gi ngoonya: gung ri Mangsoo joyoo mo too" wa anghoid. 20 Nanu" gi ngoo ri age khyo" koid kaid nghoid loug bue" loo bye: da" moo" zoo" gang mo akhid" nyid" dei nyid bang:- mung" byu yi da" kangso' yo" khyoid yu wa shid re" Mangsoo gi houg: age ziri ge khyo" koid byid: bye:. 21 Nanu" gyoug ca" wa khyoo: ci: ajo, loo. Ngoo gi nanu" ri we' nanu" nya: zoo: bang: ri we' yu" coung: yu" goin wa nghoid. Houg: yoomo nyang: gi nyangnu" ri nyangnu" da" nheigloem: moo zang" sho' nheig khyeug nu" nham' da" dang: yo' yoem: byid: dang: tid bye:.

22 Yoseb gi Egutu mung" moo nya: phoo yhoem: byu yi yo' dage" doem xo' nyid nyid. Nyang: gi dasho: daxi: zain nyid kho' lho: shid: khari" bye:. 23 Nyang: gi Ephrim da" nya: zoo: yi yo' nya: myid: zoo: yiri myang sho' nyid nyid kho'. Nyang: gi Manashe da" nya: zoo: Makhira zooshang: yoo" sho' nyid nyid. 24 Nyang: gi nya: mang: nhung" yiri ?Ngoo gi shid: loo: yid nghoid bye:- nghoid loug Mangsoo gi nanu" ri gyeing" nyang: yu" coung: goem lho: Abraham- Isag yo' Yaku bang: ri nyang: dangsoo" byid: to" da" moug: khyoo: he: moug: mo nanu" ri shu" vhu" thu loo" wa nghoid? ga: wigi tid. 25 Hau: thang: Yoseb nya: byumyu" yiri dang: theing theing nhang: zigi ?Ngoo ri dang: soo' byid: ge'. Hau: zigi Mangsoo gi nanu" ri hau: moug: khyoo: shu" loo" lang" nanu" gi nga" mang ri nanu" yo' dage" ci: thu loo" wa nghoid ein: wigi dang: theing byid: ge'? ga: tid. 26 Yoseb gi dasho: daxi: zain lang" Egutu mung" moo shid: bye:. Nyangnu" gi nya: mang ri aboeb sho' nam pyo: xu: yo' koid to" lho: gung: khoug: moo kaid to" boem ago".