49
1 Yaku nya: zoo: tang: yiri khe: yu lho: ?Zeing: loo ge'. he: thang: nyid" nanu" cisu" bue" loo wa khyoo: ngoo nanu" ri tid wa.
2 ?Yaku da" zooshang: tang: yi zeing: lo wigi tam" gyoo: ge'.
Nanu" nya: phoo Israela da" dang: tam" gyoo: ge'.
3 Ruben nang gi nga" zooshid" nga" yoem: vhu" nghoid.
Yuggi yoem: mo xang: shi" da" ashi" nghoid. Nang gi nga" pyaid mo mang: zeing yug we' nghoid.
Nga" zoo: yi dangain" tho' myonhoo: bo lho: yoem: bo thang su: nyang: nghoid bye:.
4 Nang gi gyid khyoid zoo" te" nghoid da:-
Nghoid loug nang gi yhouggyen: thang su: yo" bui" wa anghoid.
Ciwim gari: nang gi nga" dangcang: myhi' yo' yhoeb- houg: lho: re" phoo da" yhoeb yoo ri aphoug" akhyoid koid da:.
5 Simun yo' Levi gi nya: tang: nyang: nghoid.
Nanu" gi nanu" da" gyi zi jonu" ci: lho: athoug" akhyoug: yooboo shoid abye:.
6 Nya: tang: da" myid soin' khyoo: moo ngoo gi abo boo wa.
Nya: tang: da" sham: go" khyoo: moo: we' abo zhung: wa.
Ciwim gari: nya: tang: gi nheig yo: lho: byu said.
Houg: lho: lhu: shi' pui" shid re" nujung lo: da" khyid: ri gyoug: nhang: bye:.
7 Hau: zigi athoug" akhyoug: yoomo nya: tang: da" nheig yo: khyoo: moo nheing" khoin" zang" baja".
Houg: lho: nheig khyeug shoo" myen: abo da" gang mo nya: tang: da" nheig joem: yo: khyoo: moo we' nheing" khoin" jo, bye:.
Ngoo gi nyangnu" ri Israela moug: goin" khyoo: pyo: sain" loo" nhang: wa
Ngoo gi nyangnu" ri nga" byumyu" khoug: mo kho' thu pyam wa.
8 Yuda we"- re" mang: nhung" yigi nang ri coung" baja".
Nang gi re" gyivoo yi da" leung zeung: ri yo" zei: baja".
Re" mang: nhung" yigi re" shidkhoin" moo goeb pid goo" baja".
9 Yuda gi khangkhyi dadu: yhang: ti" bue" nyid bye:-
Nya: zoo: shoo" ri ngaid said lho: nya: khyung: khyoo: doem tau" lo wigi
Gung nyhang: lho: vhoeb nyid bye:. Nyang: ri hang" we' avoem" re" zi" loo.
10 Yuda gi khokham lhamdung: ri ci: su: nghoid.
Houg: lho: nya: amyed ashen gi ajang" davhoeb khang" nyid wa bye:.
Byumyu" yigi nyang: ri kheing" di" byid: wigi
Nya: shidkhoin" moo tam" gyo: vhu" nghuid" nghuid" boem wa bye:.
11 Nyang: gi nya: loo zei: zoo: ri zabyid gam moo tei" wigi ge thang da" zabyid nei moo tei" too" bye:.
Nyang: gi nya: byimi ri soid" su" ne da" zabyid yhid: moo cid" bye:.
12 Nya: myojid" gi zabyid yhid: shug jang" mo soid" tho' ne wa
Nya: zei joem gi nunoug" shug tho' mo phyu: jo,
13 Zebulun gi panglai: gyid yam moo nyid wa nghoid.
Nya: gyid yam gi gyid lhid moo" zeing theing: jang: bui" wa nghoid.
Nya: mougkyoo" doem: gi Sidon moo ju" sho' nghoid wa bye:.
14 Isakha gi nya: too: agyoo: moo vhoeb jo, da" loo zei: dadu: yhi' yoem: aboo wa.
15 Nghoid loug nyang: gi theing: joyoo ri myang wigi nheugshid: nheugdeug da" mougmyid ri yoo" bye:.
Houg: yoomo nyang: gi nya: yoovoin voin vu wa shid re"
Nya: lo, sain: kham: wigi join dayug yhang: ti" yoem: kaid nyid bye:.
16 Dan gi nya: byumyu" yi da" zoug: ludaid bue" loo wa bye:.
Nyangnu" gi Israela byukung: goo" bang: yhang: ti" bue" loo wa nghoid.
17 Dan gi khyoo: yam mo lhangmyu dadu: bue" loo wa.
Khyoo: moo" yam mo dug thain: da" lhangmyu nghoid wa.
Myang: da" khanheig thung" thang: moo thei" wigi
Myang: jui: su: ri byid gyoo" nhang: sho' koid zi nghoid.
18 Aseing we"- ngoo gi re" da" khyoid yu khyoo: ri lang" nyid.
19 Gad gi khyangtoug: joem wigi khaid zain: zi shoug" wa nghoid.
Nghoid loug nyang: gi nyangnu" ri doem tau" zain: lho: myheig tei" pyam wa nghoid.
20 Ashera da" mougmyid gi gug zoo myoo" sho' thu wa nghoid.
Nyang: gi khokham zoo: nau ja: zo: shug pang" thoug byid: loo wa nghoid.
21 Naphtali gi phang: byoin lo" da" xaid dadu: nghoid.
Nyang: gi gye" yung" da" xaid nu" xang" wa nghoid.
22 Yoseb gi gyid zoo: lang yam mo kyang: da" loo zei: dadu: yhang: ti" nghoid.
Boem moug: mo kyang: da" myang: dadu: nghoid.
23 Nya: gyivoo joem gi nyang: ri gye" gyoug pho" meing: zain: loo wa
Nyangnu" da" lid: joem myoo: khaid joem yo' nyang: ri cang khaid loo wa.
24 Nghoid loug nya: lid: gi sam: sam: deing jo, kho' wigi
nya: gyi zi joem gi Yaku da" myhang: thang Mangsoo yoem: so' yo' we'
Israela ri goem loem nyid su: da" yang zung" su: khyo" we' yoem: boo nhang: wa.
25 Hau: zigi re" phoo da" Mangsoo gi nang ri pang" thoug nyid zi nghoid.
Gyi: myhang: thang da" Mangsoo gi nang ri mainkaid byid: zigi
Moug: tho' khyo" jeju" moug: gyid moo we'
Houg: lho: myidjang khoug: mo gyid moo we' Myoo" sho' da" jeju" gougnyhoug joem yo' zooshang: yi moo we'
26 Jeju" shivoo yo' bainboo" joem moo we'
Goonham' gooco' re jeju" boem lang joem moo we'
Apyaid ato: boem moug: joem cang mo yu" jhed yu" ngei tung" da" zi joem moo we' jo, jo, bye:.
He: da" mainkaid jeju" joem gi Yoseb da" vhu" di tho' mo dajo, jo, baja" o".
Mang: nhung" yi jang" mo kang" thu kaid shoug" su da" vhujid" lagung tho' moo jo, jo, baja".
27 Benyamin gi akhyeing" da" zeigni yhang: ti" nghoid-
Nyid" ri we' myen" ri we' nyang: gi nya: zoo: noem shoo" ri cang ngaid said yen" lho: vhoo: boo tung" zo: nyid? ga: wigi tid.
28 Hid bang: gi Israela byumyu" daxe: eig kung: nghoid wigi he: dang: gi nya: zoo: yugkhang" moo" moo bui" moin: khyoo: ri tid kho' da" nya: phoo da" dang: thang nghoid.
29 Hau: thang: Yaku nya: zoo: yiri amyeing" byid: zigi ?Akhid" ngoo gi nga" byumyu" yi yo' ngoo gi shid: lo" khyo" xo' tei" loo" loo: wa nghoid. Hiti byumyu" Ephron dain" moo jo, da" lug khyung: moo nga" phoug" phyid" bi" yo' dage" ngoo ri myhoeb goo" la.
30 Hau: joyoo gi Khanan mung"- Mamre da" bidthu shoid mo Mokphela moo jo, da" lug khyung: nghoid. Abraham gi he: lug khyung: yo' dain" ri loeb yoo koid wa shid re" Ephron jang" mo qei to" zi nghoid.
31 Hau: joyoo gi Abraham yo' Sara ri myhoeb to" da" joyoo we' Isag yo' Rebekha ri myhoeb to" da" joyoo we' houg: lho: ngoo Lea ri myhoeb to" da" joyoo we' nghoid.
32 Hau: dain" yo' lug khyung: gi Hiti byumyu" yi jang" mo qei to" da" joyoo nghoid. Ngoo ri we' houg: moo myhoeb ge'? ga: wigi tid.
33 Yaku gi nya: zoo: tang: yiri pyeing: dang: bain tid lang" nyang: gi doem jhang" lho: shid: khari" bye:.